Titartaanermik unammisitsineq

Titartaanermik unammisitsineq

24.05.2017

Kalaallit Airports A/S Qaqortumi, Ilulissani aamma Nuummi mittarfissani terminalip illutassaannut aamma illutassanut sullissiviusussanut illussanik titartaanermik unammisitsiniarpoq, qulequtarineqassallutik Kalaallit Nunaannut tunngasunik immikkooruteqarneq, ilaasut ilorrisimaarnerat aamma niuernermik tunngaveqartumik ingerlataqarneq, aammalu maannangaaq mittarfiup illutaanni pisiniarfinnik aallartitserusuttut imaluunniit allaffinnik attartorusuttut, ingerlatseqatigiiffimmut attaveqaqquneqarput.

Mittarfinni terminalip illutassaanut aamma illuutassanut sullissiviusussanut illussanik titartaanermik unammisitsineq:

Kalaallit Airport A/S-imi siulersuisut aalajangerput Qaqortumi, Ilulissani aamma Nuummi mittarfittaassani terminalip illutassaanut aamma illutassanut sullissiviusussanut illussanik titartaanermik unammisitsisoqassasoq.

Siunnersuisartunik illussanik titartaanermik unammisitsinermi peqataanissamut kissaateqartunik piukkunnartussarsiuussinermut qaaqqusissut 2017-imi juunimi nassiunneqassaaq, aammalu piukkunnartussarsiuussineq 2017-imi aggustimi ingerlanneqassalluni. Siunnersuisartut piukkunneqartut tamatuma kingorna Qaqortumi, Ilulissani aamma Nuummi mittarfittaassani terminalip illutassaanut aamma illutassanut sullissiviusussanut siunnersuummik tunniussinissamut, 2017-imi novembarip tungaanut piffissalerneqassapput.

Illussanik titartaanermi unammisitsinermi peqataanissamut piumasaqaatit erseqqinnerusut suliarineqaleruttorput, kisianni maannakkut aalajangiunneqareerpoq qulequtarineqartuni pingaarnernut ilaatinneqartut tassaasut, siunnersuutit isikkuini aammalu atoruminassussaannut tunngatillugu Kalaallit Nunaannut tunngasunik immikkooruteqassasut, kiisalu ilaasunut ilorrisimaarnartut nutaaliaasut aammalu niuernermik tunngaveqartumik ingerlataqarnerit siunnersuutini eqqarsaatigineqarsimassasut, ilanngullugit ilatigut akitsuuteqanngitsunik tuniniaasartunut pisiniarfinnut, tammajuitsussanik tuniniaanermut aamma angalasunut neriniartarfinnut/cafe-nut periarfissaqartitsineq, kiisalu mittarfiup illutaanni allaffinnik attartornissamut periarfissaqartitsineq.

Niuernermik tunngaveqartumik ingerlataqarnerup annertussusaanut, mittarfimmi pisiniarfinnik inissaqartitsinissamut aammalu allaffinnik inissaqartitsinissamut niuerfimmi soqutiginninneq ujartuinerlu, apeqqutaassapput. Mittarfinni terminalit angissusaat, illussanik titartaanermik unammisitsinermut ilaatillugit aalajangersarneqartussaammata, suliffeqarfiit terminalini allaffeqarnissamik kissaateqarsimasinnaasut imaluunniit tassanngaaniit pisiniarfinnik ingerlatsinissamik kissaateqarsimasinnaasut, maannangaaq soqutiginninnertik paasitinniarlugu Kalaallit Airport A/S-imut attaveqarnissamut periarfissinneqarput.

Suliassat allat neqeroortitsivigineqartartut assigalugit, aamma illussanik titartaanermik unammisitsinermi siunnersuutip ajugaasup toqqarneqarneranut atatillugu, peqataasut issittuniittuni suliaqarnermik misilittagaqarnerat, taamaanngippallu suliffeqarfiit nunanit allaneersut, taamatut misilittagaqanngitsut, najukkami illussanik titartaasartunik aamma ingeniørit suliffeqarfiinik, taamatut misilittagaqartunik, suleqateqalersimanerat, pingaartinneqassaaq.

”Mittarfiup terminaliata ilusilersorneqarnerani atortorissaarutit ilorrisimaarnartut nutaaliaasullu mittarfinnut taanut ilanngullugit eqqarsaatigineqassasut, siulersuisut pissusissamisoortutut isigaat, taamaalilluni angalasut aammalu ulluinnarni mittarfinnik atuisut, mittarfinnut imaluunniit mittarfinnit angalanerminni, imaluunniit ulluinnani sulinerminni, nuannersumik misigisaqartassallutik. Ilaatigut Savalimmiuni Vagar-ip Mittarfiata allilerneqarneranit misilittakkat pitsaasorujussuit, Kalaallit Nunaanni mittarfittaassanut taakkununnga najoqqutassamik tassunga assingusumik ineriartortitsinissamik siulersuisut kissaateqarnerannut, ersarissumik isumassarsiorfigineqarput. Ilaasunut pitsaasunik atugassaqartitsilernermi, Kalaallit Nunaannut aamma Kalaallit Nunaannit angalanermi sullitat ilorrisimaarnerannik naammagisimaarinninnerannillu annertusititsiinnarani, kisianni aamma ingerlatseqatigiiffiup ingerlanneqarneranut aningaasaqarnikkut annertuumik iluaqutaasinnaassasoq, oqarpoq siulersuisunut siulittaasoq Johannus Egholm Hansen. Taamaattumik mittarfinni niuerfeqalernissamut imaluunniit allaffinnik attartornissamik soqutiginnissimasinnaasut tusagaqarfiginissaat soqutigisorujussuuarput, taamaalilluta terminalit ilusilersorneqartussanngorneranni taamatut kissaateqarnerit sillimaffigineqarsinnaaniassammata.”

***

Tusagassiuutitigut nalunaarut manna pillugu saaffigineqarsinnaavoq pisortaaneq Steffen Ulrich-Lynge, oqarasuaat +299 55 44 33.