Tusagassiuutitigut nalunaarut: Kalaallit Airports A/S-ip Ilulissani, Qaqortumi aamma Nuummi mittarfissaasa taarsigassarsianit aningaasalersorneqarnissaannut ”Financial Adviser and Arranger”-itut suliassap neqeroortitsivigineqarnerani Danske Bank ajugaavoq.

Tusagassiuutitigut nalunaarut: Kalaallit Airports A/S-ip Ilulissani, Qaqortumi aamma Nuummi mittarfissaasa taarsigassarsianit aningaasalersorneqarnissaannut ”Financial Adviser and Arranger”-itut suliassap neqeroortitsivigineqarnerani Danske Bank ajugaavoq.

09.10.2017

Kalaallit Airports A/S-ip Ilulissani, Qaqortumi aamma Nuummi mittarfissaasa taarsigassarsianit aningaasalersorneqarnissaannut ”Financial Adviser and Arranger”-itut suliassap neqeroortitsivigineqarnerani Danske Bank ajugaavoq.

Kalaallit Airports A/S-ip siulersuisuisa Ilulissani, Nuummi aamma Qaqortumi mittarfiliassanut aningaasa­lersuinermut siunnersortitut Danske Bank toqqarpaat.

Kalaallit Airports A/S ingerlatseqatigiiffiup Ilulissani, Nuummi aamma Qaqortumi mittarfiliassaannut aningaasalersuinermut siunnersortitut suliassap neqeroortitsivigineqarnerat septembarip aamma oktobarip ingerlaneranni ingerlappaat, aammalu 4. oktober ataatsimiinnermi suliassaq Danske Bank-imut, ataatsimut isigalugu pitsaanerpaamik neqerooruteqartumut, tunniunniarlugu aalajangerluni.

Ingerlatseqatigiiffiup Kalaallit Nunaanneersut, Danmarkimeersut, Savalimmiuneersut aamma Norge­meersut neqerooruteqaqquai aammalu aningaasalersuinermut siunnersortitut suliassamut neqeroorutit katillugit arfineq marluk tigullugit.

Danske Bank-ip suliassarilerpaa Kalaallit Airports A/S-ip taarsigassarsititsisartunut paasissutissanut najoq­qutassanik suliaqarneranik, kiisalu mittarfiliassanut Namminersorlutik Oqartussat tungaanniit nammineq aningaasaatinik akiliuteqarnikkut aningaasalersorneqartussaanngitsunut, nunani tamalaani taarsigas­sarsianik aningaasalersuisussarsiornissaanut, ikiuunnissaq. Ingerlatseqatigiiffiup aningaasalersuinissamut isummernissamut tunngavissiaata politikkikkut akuerineqarnissaa sillimaffigalugu, mittarfissanut nutaanut aningaasalersuinerit 50-55%-iisa Namminersorlutik Oqartussanit aningaasaatinut akiliutitut pissarsiarineqarnissaat, aningaasalersugassat sinnerisa 45-50%-it nunani tamalaani taarsigassarsititsisartuni taarsigassarsianit aningaasalersorneqarnissaat, ingerlatseqatigiiffiup siunertaraa. Aningaasaliinerit ataatsimut katillugit kr. 3,6 mia.-inut maannakkorpiaq nalilerneqarput.

Ingerlatseqatigiiffiup piffissamut pilersaarutaa pingaarneq malillugu, taarsigassarsititsisartunut uppernar­saatinik pisariaqartunik suliaqarnissamut, kiisalu aningaasalersuinissamik neriorsuutinik takussutissiisunik pissarsinissamut  Danske Bank 2018-imi januaarimut piffissalerneqarpoq, taamaalilluni Kalaallit Airports A/S 2018-imi upernaakkut mittarfinni sanaartornermik suliaqarnissamut neqeroortitsineq aallartereersinnaas­sallugu, aammalu taarsigassarsinissamut neriorsuutit inaarutaasut naammassillugit isumaqatiginninniutigi­sinnaassallugit, tamatuma kingorna suliaqarnerit 2018-imi aasaanerani aallartinneqassasut naatsorsuu­tigineqarluni. Taamaattoq taarsigassarsititsisartut mittarfiliassanut aningaasalersuinissamut soqutigin­ninnerat nalilersorniarlugu, taarsigassarsititsisartut 2017-imi novembari naatinnagu periarfissarsior­figigallariissallugit Danske Bank-ip naatsorsuutigaa.

”Aningaasalersuinermut siunnersuisartunit nukittuunit piginnaasaqarluartunillu suliassamut neqeroo­ruteqarnissamut soqutiginnittoqarnera Kalaallit Airports A/S-ip naammagisimaarluarpaa, aammalu neqeroorutit piukkunnartorujussuit arfineq marluk tigullugit. Taakkua akornanni Danske Bank, ingerlatse­qatigiiffiup tungaaniit ataatsimut isigalugu suliassamut pilerinaateqarnerpaamik neqerooruteqartoq, toqqassallugu ingerlatseqatigiiffiup siulersuisui aalajangerput.

Danske Bank-ip suleqatiginissaa qilanaaraarput, aammalu siunnersortigut peqatigalugit taarsigassarsinikkut aningaasalersuutissat pisariaqartut pissarsiarinissaasa iluatsinnissaa neriulluarfigalugu misigisimalluta”, oqarpoq pisortaaneq Steffen Ulrich-Lynge.

”Danske Bank-ip tungaaniit suliassamut pissaganartumut tassunga toqqagaanerput nuannaarutigaarput tulluusimaarutigalugulu. Mittarfiliassat Kalaallit Nunaanni attaveqarnermut pingaaruteqartorujussuusut ilisimalluinnarparput, aammalu aningaasalersuutissat ukiualunnguit qaangiuppata mittarfiliassanik piviusunngortitsinissamut pisariaqartut pissarsiarinissaat pillugu Kalaallit Airports A/S-ip suleqatiginissaa qilanaaraarput”, oqarpoq Bo Wetterstein, Danske Bank-imi Executive Vice President.