Tusagassiuutitigut nalunaarut

Tusagassiuutitigut nalunaarut

27. March 2018

Kalaallit Airports A/S Ilulissani, Nuummi aamma Qaqortumi mittarfissanut sanaartugassanik suliarinnittartunik piukkunneqartunik toqqaavoq

Kalaallit Airports A/S-ip piukkunnartussarsiuussinermi sanaartugassanik suliarinnittartut nunani tamalaani misilittagaqartut arfinillit Ilulissani, Nuummi aamma Qaqortumi mittarfissani sanaartornermik suliassanut neqerooruteqartussatut toqqarpai

Sanaartugassanik suliarinnittartut ataatsimoortukkaat arfinillit Ilulissani, Nuummi aamma Qaqortumi mittarfissanut sanaartornermut suliassanut aamma sanaartorfissagissaanermut neqerooruteqarnissamut piukkunnartussarsiuussinermi toqqarneqarput. Suliassat pingaartumik mittarfissanik, mittarfiup iluani aqqusinernik aamma silataanni nunaminertanik, timmisartoqarfiit ungaluisa iluani teknikkikkut ikkussuinertaqartunik, sanaartornermut tunngassuteqassapput. Silataanni suliassat mittarfeqarfiup sumiiffianut aqqusinniassanut, biilinut unittarfinnut, pilersuinermi aqqusersuutit allanngortiterneqarnerinut aamma mittarfiit illutassaannut nunaminertanik piareersaanermut tunngassuteqassapput, kisianni illutaannik, aatsaat kingusinnerusukkut neqeroortitsivigineqartussanik, sanaartornermut tunngassuteqassanatik.

Piukkunnartussarsiuussinissamut neqerooruteqaqqusineq Europa-mi, Asien-imi aamma Amerikami avannarlermi nunani arlalinnut nassiussuunneqarpoq. Sanaartugassanik suliarinnittartunit pikkorissorujussuarnit aammalu unammillersinnaassuseqartunit piukkunneqarnissamik qinnuteqaatit katillugit 11-it tiguneqarput, aammalu Kalaallit Airports A/S-ip peqqissaartumik nalilersuilluni suliarinnereernerata kingorna ataatsimoortukkaat arfinillit makkua piukkunneqassasut aalajangiisoqarpoq:

  • Aarsleff – Ístak Joint Venture (Danmark/Island)
  • BAM International bv. (Holland)
  • China Communications Construction Company Ltd. (Kina)
  • Munck Gruppen A/S (Danmark)
  • MT Højgaard A/S (Danmark)
  • Pennecon Dexter Joint Venture (Canada)

Sanaartugassanik suliarinnittartunik toqqaanermi, neqerooruteqartut aningaasaqarnikkut pisinnaasaqassusaat taamatullu teknikkikkut suliatigullu pikkorissuseqarnerat pisinnaasaqarnerallu, pingaartinneqarput. Ilanngullugu aamma sanaartugassanik suliarinnittartut Kalaallit Nunaanni pissutsinut naapertuuttuni sanaartugassanik suliaqarnermik misilittagaqarnerat, pingaartinneqarpoq.

Ilulissani aamma Nuummi sanaartugassanik suliaqarnissat, Nuummi 2018-imi
septembarimi/oktobarimi aammalu Ilulissani 2019-imi apriilimi sanaartorneq aallartittussatut, 2018-imi aasalernerani ataatsikkut neqeroortitsivigineqassasut naatsorsuutigineqarpoq. Qaqortumi sanaartornermik suliaqarnerit 2020-imi sanaartorneq aallartittussatut, 2019-imi neqeroortitsivigineqassasoq naatsorsuutigineqarpoq.

Mittarfissat pingasut taakkua tamarmik 2022-imi ukiaanerani atorneqalernissaat pilersaarutigineqarpoq.

Sanaartugassanik suliaqartartut ataatsimoortukkaat piukkunneqartut taakkua qaammatit tulliuttut ingerlaneranni, sumiiffiit suliaqarfiusussat aammalu najukkani pissutsit namminneq tikillugit paasisaqarfiginiarlugit, Ilulissat aamma Nuuk tikeraassavaat. Takusaalluni angalanermut ilaatillugu aamma najukkani inuussutissarsiortunut, ilinniarfinnut oqartussanullu ilisaritinnerit aaqqissuunneqassapput.

”Sanaartugassanik suliarinnittartut suliffeqarfiit nunani tamalaani iluarineqartut akornanni, piukkunneqarnissaq pillugu qinnuteqarnissamut soqutiginninnerup annertuujunera, Kalaallit Airports A/S-ip naammagisimaartorujussuuaa. Pikkorissuunerat unammillersinnaassuseqarnerallu nuannaarutigaarput, aammalu Ilulissani, Nuummi aamma Qaqortumi mittarfissat nutaat taakkua piviusunngortinneqarnissaannut alloriaqqinnissamut tullermut qilanaarpugut, oqarpoq pisortaaneq Steffen Ulrich-Lynge.”