Kalaallit Airports-ip neqeroortitsinerup aallartinneqarnissaanut Nuummi mittarfimmut VVM-ip paasinarsisinneqarnissaa utaqqivaa

Kalaallit Airports-ip neqeroortitsinerup aallartinneqarnissaanut Nuummi mittarfimmut VVM-ip paasinarsisinneqarnissaa utaqqivaa

25.01.2019

Naalakkersuisut Nuummi mittarfimmut VVM-mut nassuiaammut akuersissuteqarnerminnik inaarutaasumik nassiussinissaasa, aammalu Naalagaaffimmut aningaasalersuinermut atugassarititaasut pillugit isumaqatigiissutip inissinnissaata tungaanut, Nuummi aamma Ilulissani mittarfissanut neqeroortitsinerup nassiunneqarnissaa Kalaallit Airports-ip kinguartippaa.

 Piffissaq neqeroortitsiviusussaq kinguartinneqarpoq

”Sanaartornermik suliaqarnissanut neqeroortitsinerup nassiunneqarnissaata kinguartinnissaa toqqarparput, pissutigalugu VVM-mut akuersissuteqarnermut piumasaqaatit inaarutaasut taakkualu aningaasaqarnikkut sunniutissaat suli ilisimannginnatsigu”, oqarpoq Jóhannus Egholm Hansen, Kalaallit Airports A/S-imi siulersuisunut siulittaasoq, aammalu nangilluni: ”Naatsorsuutigigaluarparput neqeroortitsineq januaarip naalernerani nassiutissallutigu, kisianni killissaliussassat inissinneqanngimmata, tamatuma utaqqinissaa naleqqunnerpaatut isigaarput”.

Nassuiaavoq sanatitsisup aamma entreprenørit neqerooruteqarsinnaalernissamut piumasaqaatit tamaasa ilisimanissaat pisariaqartoq, tassami taamaanngippat suliassap allannguutaasa akisunerulersitsisut amerlavallaalersinnaammata.

Neqeroortitsinerup qaqugu nassiunneqarnissaanut Kalaallit Airports piffissaliinianngilaq, kisianni tamanna sapinngisamik piaartumik pisinnaassasoq sulissutigalugu.

 Aningaasalersuinissaq pillugu isumaqatiginninniarnerit inaarutaasut

Jóhannus Egholm Hansen oqaluttuarpoq, tamatumunnga ingiaqatigitillugu Danskit Naalagaaffiannut aamma Den Nordiske Investeringsbank-imut taarsigassarsinermut isumaqatigiissutini pineqartuni aningaasalersuinissamut atugassarititaasut inaarutaasussat pillugit isumaqatiginninniarnerit suli ingerlanneqartut, aammalu isumaqatiginninniarnerit taakkua qaqugu naammassissanersut maannakkorpiaq qularnaatsumik oqaatigineqarsinnaanngitsoq.

 Paasissutissat annertunerusut:

Steffen Ulrich-Lynge, CEO. Attaveqarfigineqarsinnaavoq uani +299 554433.