2020mi ataatsimeersuarneranit naalisaaneq

2020mi ataatsimeersuarneranit naalisaaneq

18. May 2020

Ataasinngorneq ulloq 18. maj 2020, nal. 11:30 (Kalaallit Nunaata nalunaaqutaa malillugu) Kalaallit Airports Holding A/S-imi ingerlatseqatigiiffiup najugaani, Imaneq 33,  5. etage, Nuuk, nalinginnaasumik ataatsimeersuarneq ingerlanneqarpoq.

Corona virusip siaruannginnissaanut killilersuinerit atuutsinneqartut pissutigalugit ataatsimeersuarneq allaffissornikkut ataatsimeersuarnertut ingerlanneqarpoq, kisianni Namminersorlutik Oqartussanit, siulersuisunit aammalu pisortaasunit video atorlugu peqataaffigineqarluni. Peqatigisaanik ataatsimeersuarneq toqqaannartumik aallakaatinneqarpoq, taamaalilluni soqutiginnittut video aqqutigalugu malinnaasinnaallutik.

Ataatsimeersuarnermi oqaluuserisassat malittarisassat malillugit makkuupput:

  1. Ingerlatseqatigiiffiup suliaqarnera pillugu nalunaarut.
  2. Ukiumoortumik nalunaarutip akuerineqartussanngorlugu saqqummiunneqarnera. 
  3. Ukiumoortumik nalunaarut akuerineqartoq naapertorlugu sinneqartoorutit atorneqarnissaat imaluunniit amigartoorutit matussuserneqarnissaat pillugu aalajangerneq. 
  4. Siulersuisunut ilaasortanik qinersineq, ilanngullugu siulersuisunut siulittaasumik qinersineq.
  5. Siulersuisuni siulittaasup aammalu siulersuisuni ilaasortat sinnerisa aningaasarsiassaannik aalajangersaaneq.
  6. Kukkunersiuisumik toqqaaneq.
  7. Tamalaat.

Aqutsisup, eqqartuussissuserisoq Poul Knudsen-ip oqaatigaa, ataatsimeersuarneq ingerlatseqatigiiffinnut inatsimmut aammalu malittarisassanut naapertuuttumik aggersaaviusimasoq aammalu ataatsimeersuarnermut inatsisit malinneqartut aammalu aalajangiisinnaassuseqartoq.

Siulersuisunut siulittaasoq siulersuisut  2019-imi ingerlatseqatigiiffiup suliaqarnera pillugu nalunaarutaannik saqqummiivoq. Nalunaarutip assilinera ingerlatseqatigiiffiup nittartagaani, www.kair.gl, pissarsiarineqarsinnaavoq. Ataatsimeersuarnermi nalunaarut tusaatissatut tiguneqarpoq.

Tamatuma saniatigut ataatsimeersuarnermi  2019-mut ukiumoortumik nalunaarusiaq akuerineqarpoq, taamatuttaaq taanna ingerlatseqatigiiffiup nittartagaani pissarsiarineqarsinnaalluni, kiisalu ukiumi amigartoorutaasut ukiup tullianut nuunneqarnissaat pillugu siulersuisut inassuteqaataat akuerineqarluni.

Johannus Egholm Hansen siulersuisunut siulittaasutut toqqarneqaqqippoq aammalu Finn Gaarsmand siulersuisunut ilaasortatut toqqarneqaqqilluni. Niels Thomsen aamma Christian Berg ilaasortatut nutaatut toqqarneqarput, Aviâja Lyberth Lennert aamma Jákup Sverri Kass siulersuisuniit anillutik. Taakkua aammattaaq siulersuisunut siulittaasutut, siulersuisuni ilaasortatut ingerlatseqatigiiffinni

immikkoortortaqarfiusuni, Kalaallit Airports International A/S aamma Kalaallit Airports Domestic A/S, toqqarneqarput. Ingerlatseqatigiiffimmi immikkoortortaqarfiusumi Kalaallit Airports International A/S-imi Merete Eldrup aamma Marlene Haugaard aammattaaq siulersuisuni ilaasortatut toqqarneqarput.

Ataatsimeersuarnermi     2019-mut     siulersuisut     aningaasarsiaqartinneqarnerat aammalu     2020-mut    aningaasarsiarititassat    2019-tut      aningaasartaqartillugit    aalajangersarneqartut, akuerineqarput. 

Deloitte Statsautoriseret Revisionspartnerselskab ingerlatseqatigiiffiup kukkunersiuisuatut toqqaqqinneqarnissaa pillugu siulersuisut siunnersuutaat ataatsimeersuarnermi akuerineqarpoq.

”2019 sulisunut, pisortanut siulersuisunullu, kiisalu ingerlatseqatigiiffiup siunnersortaannut, ukioq ulapaarfiuvoq, ilaatigut Nuummi aamma Ilulissani sanaartornermik suliassanut isumaqatigiissummut neqeroortitsineq isumaqatigiissuteqarnerlu ingerlanneqarlutik. ukioq manna kingusinnerusukkut mittarfiliassanut atatillugu suliassanut annertunerusunut tamaginnut neqeroortitsinerup naammassinissaata ingerlatseqatigiiffimmit ilimagineqarnerani, aammalu mittarfissani pingasuni tamaginni sanaartornermik suliaqarnerup aallartereernerani, ukiuni aggersuni mittarfissanik siunissami ingerlatsinissap pilersaarusiornissaa, aammalu taakkuninnga ingerlatsinermi ineriartortitsinissaq, siulersuisut samminerulissavaat”, oqarpoq Johannus Egholm Hansen, siulersuisunut siulittaasoq

”Peqatigisaanik piffissaq iluatsillugu ingerlatseqatigiiffiit, siulersuisut sinnerlugit namminerlu uanga Aviâja Lyberth Lennert aamma Jákup Sverri Kass ingerlatseqatigiiffinni annertuumik pikkorissuseqarlutillu suliaqarsimanerannut qutsavigaakka”, nangippoq Johannus Egholm Hansen.

Ataatsimeersuarnermi aqutsisup nalinginnaasumik ataatsimeersuarneq naggaserpaa nal. 12.05.

Tusagassiuutitigut nalunaarut manna pillugu saaffigineqarsinnaavoq siulersuisunut siulittaasoq Johannus Egholm Hansen, oqarasuaat +45 2389 8008.

Nuuk, ulloq 18. maj 2020 Siulersuisut