Kalaallit Airports Domestic A/S-ip Qaqortumi mittarfiup aamma mittarfiup illutassaannut neqeroortitsineq taamaatippaa

Kalaallit Airports Domestic A/S-ip Qaqortumi mittarfiup aamma mittarfiup illutassaannut neqeroortitsineq taamaatippaa

20. August 2020

Kalaallit Airports Domestic A/S-ip Qaqortumi mittarfiup aamma mittarfiup illutassaannut neqeroortitsineq taamaatippaa

Neqeroorutit tiguneqartut ingerlatseqatigiiffiup missingersuutaannit annertunerujussuunerisa malitsigisaanik Qaqortumi mittarfimmik sanaartornermik suliaqarnissamut neqeroortitsineq taamaatinneqarpoq. Tamatuma sunniutigisaanik Qaqortumi mittarfiup illutassaannut neqeroortitsineq ingerlatseqatigiiffiup peqatigisaanik taamaatippaa.

Qaqortumi mittarfissamut sanaartornermik suliaqarnissanut suliariumannittussarsiuussineq Kalaallit Airports Domestic A/S-ip ulloq 27. april 2020 ingerlappaa. Neqeroorutit tallimat, tamarmik akimikkut ingerlatseqatigiiffiup sanaartornermut missingersuutaannit annertunerujussuit, ingerlatseqatigiiffiup tiguai.

KAIR-ip entreprenørit ilaannut marlunnut isumaqatiginninniarnerit nalaanni aammalu taakkua suleqatigalugit, suliassami sipaarutissanik, aningaasartuutit tamarmiusut ingerlatseqatigiiffiup aningaasaqarnikkut killissaasa iluanniititsilersinnaasunik, nassaarniarnissaq sulissutigaa. Tamatumunnga ingiaqatigitillugu suliassamut aningaasartuutaanerulertussanut matussutissanik Namminersorlutik Oqartussanit annertunerusumik aningaasalersuutissarsinissamut periarfissat ingerlateqatigiiffiup oqaloqatigiissutigai.

Kisiannili suliassami sipaarutissanik pisariaqartunik nassaarnissaq imaluunniit neqeroorummut akigititap appartinnissaa ajornartoq, ingerlatseqatigiiffiup paasivaa, taamatullu maannakkut neqeroorutit atorunnaarfissaat sioqqullugu aningaasalersuutissanik annertunerusunik neriorsuummik pissarsinissaq periarfissaqarsimanani. Tamatuma saniatigut paasineqarpoq 2020-imi ukiaanerani sanaartornermik suliaqarnerit aallartiffissaattut neqeroortitsinermut najoqqutassani naatsorsuutigineqartoq naammassineqarsinnaajunnaartoq.

Ingerlatseqatigiiffimmi aqutsisut, siunnersortitik peqatigalugit, aammalu Namminersorlutik Oqartussat isumasioqatigalugit, aappaagu nutaamik neqeroortitsinissaq siunertaralugu suliassamut nalilersueqqissapput. 

”Qaqortumi mittarfissamut suliaqarnerit ukioq manna aallartinnissaat Kalaallit Airports Domestic A/S qilanaarisorujussuusimavaa, taamaattumillu neqeroortitsinerup taamaatinnissaa pillugu aalajangiinissaq pisariaqarmat ajuusaarutigisorujussuullugu”, oqarpoq siulersuisunut siulittaasoq Johannus Egholm Hansen.

”Ingerlatseqatigiiffimmi aqutsisut maannakkut Namminersorlutik Oqartussat isumasioqatigalugit, aningaasartuutissat appartinnissaat siunertaralugu, suliassamut allannguutaasinnaasut suussusersiniarlugit suliaqarneq ingerlateqqissavaat, taamatullu suliassamut aningaasalersuutissanik annertunerusunik aningaasaliinissaq pillugu Namminersorlutik Oqartussat oqaloqatigineqarnerat ingerlatseqatigiiffiup ingerlateqqissallugu, taamaalilluni Qaqortumi mittarfiliassap 2021-imi nutaamik neqeroortitsivigineqarsinnaanera aammalu 2024-imi naammassineqarnissaa, naatsorsuutigineqarsinnaassalluni”, naggasiivoq Johannus Egholm Hansen.

***

Tusagassiuutitigut nalunaarut manna pillugu saaffigineqarsinnaavoq siulersuisunut siulittaasoq Egholm Hansen, oqarasuaat +299 55 06 31 imaluunniit +45 2389 8008.