Kalaallit Airports Domestic A/S-ip Qaqortumi mittarfissamut aamma mittarfiup illutassaannut neqeroortitsinermik taamaatitsineranik nittartagaq SermitsiaAGp allaaserinninneranut oqaaseqaatit

Kalaallit Airports Domestic A/S-ip Qaqortumi mittarfissamut aamma mittarfiup illutassaannut neqeroortitsinermik taamaatitsineranik nittartagaq SermitsiaAGp allaaserinninneranut oqaaseqaatit

25. August 2020

Nuummi, Ilulissani aamma Qaqortumi mittarfiliassat suli tamanit, politikkikkut tusagassiuutitigullu annertuumik eqqumaffigineqarput. Taamaattumik Qaqortumi mittarfissamut aamma mittarfiup illutassaannut neqeroortitsinerup taamaatinneqarnera pillugu ingerlatseqatigiiffiup aqutsisui aalajangertut, Kalaallit Airports Domestic A/S-ip nalunaaruteqarnera pillugu nutaarsiassaq sapaatip akunnera kingulleq Kalaallit Nunaanni tusagassiuutitigut allaaserineqarmat tupaallannartuunngilaq.

Nittartakkami SermitsiaqAGmi ilanngutassiat ilaanni, ilaatigut oqaaseqaatit allaaserineqarput, soorlu Kommune Kujallermi borgmesteri aamma borgmesterip tullia kiisalu najukkami GE-mut siulittaasup oqaaseqaatai issuarneqarlutik, taakkua pisoq sakkortuumik isornartorsiorlugu.

Oqaaseqaatit allaaserineqartut taakkua immikkoortuni arlalinni eqqunngitsortaqarput tunngavissaqaratillu, taamaattumik Kalaallit Airports Domestic A/S sinnerlugu suliamut tunngatillugu pissusiviusunik ilanngusserusuppunga, ilanngullugu oqaaseqaatinut Kommune Kujallermi borgmesterip aamma borgmesterip tulliata, kiisalu najukkami GE-mut siulittaasup oqaasiinut aviisimi issuarneqartunut marlussunnik oqaaseqaateqarlunga.

Politikkikkut pasinapiluttumik iliuuseqarneq

Borgmesterip, borgmesterip tulliata aammalu najukkami GE-mut siulittaasup neqeroortitsinerup taamaatinneqarnera, tamatumalu malitsigisaanik kinguaattoornissaa pakatsissutigisorujussuummassuk, aammalu pisoq qisuariarfigimmassuk, paasinartorujussuuvoq. Taamaattoq oqaatsinik atuineq ingasattajaarineruvoq eqqunngitsumillu paasissutissiinerulluni.

Aviisimut ilanngutassiani annertunerusumik annikinnerusumilluunniit toqqaannartumik pasitsassaarutigineqarpoq Naalakkersuisut pasinapiluttumik iliuuseqarsimasut, aammalu Qaqortumi mittarfiliassap piviusunngortussaannginnera ilisimajuaannarsimagaat.

Uanga politikeriunngilanga aammalu politikkikkut isumaliutersuuteqarnerit Naalakkersuisut iluanni ingerlanneqartut suunersut ilisimanissaannut tunngavissaqarnanga, kisianni Kalaallit Airports Domestic A/S-imut siulersuisunut siulittaasutut aalajangersimalluinnartumik oqaatigisinnaavara, ingerlatseqatigiiffimmi aqutsisunut Qaqortumi mittarfiliassap pingaarnersiuinermi salliutinnginnissaanut, imaluunniit taassuma pisuusaarluni nqeroortitsiviginissaanut Inatsisartut imaluunniit Naalakkersuisut sukkulluunniit sunniiniarsarisimanngimmata.

Kalaallit Airports Gruppen siulersuisui aallaqqaataaniilli suliassamik pisussaaffiliiffiusumik suliakkerneqarpoq, tassalu Nuummi, Ilulissani aamma Qaqortumi mittarfissanut sanaartugassanut pilersaarusiornissaq, neqeroortitsinissaq, sananissaq ingerlatsinissarlu, taamaattumillu ingerlatseqatigiiffiup suliassanik piareersaalluni suliaqarnermi Qaqortumi mittarfissaq, mittarfissat marluk sinnerisut, assinganik pingaartissimavaa. Taamaalilluni mittarfiliassat tamarmik siunnersuisartunit atorneqartunit aammalu sanaartugassanik pilersaarusiornermut malittarisassat assigeeqqinnaat malillugit, sanartugassanut pilersaarusiorneqarput, taamatullu taakkua neqeroortitsinermut piumasaqaatit assigeeqqinnaat atorlugit neqeroortitsivigineqarlutik. Assigiinngissutituaasoq tassaasimavoq Qaqortumi mittarfissamut neqeroortitsinerup pilersaarusiornermik pissuteqartumik, Nuummi Ilulissanilu mittarfissanut neqeroortitsinermut piffissamut pilersaarutip tassani malinneqarsinnaasimannginnera.

Ingerlatseqatigiiffiup aqutsisuisa Qaqortumi mittarfissamut nassuiaatit Naalakkersuisunut oqaloqatigiissutigisarnerini, Qaqortumi mittarfissaq Inatsisartut aalajangiinerat naapertorlugu piviusunngortinneqassasoq,  Naalakkersuisut aalajangiusimaannartarsimavaat.

Qaqortumi mittarfissamut neqeroortitsinermut siunertaasunut tunngatillugu Naalakkersuisut aamma/imaluunniit ingerlatseqatigiiffiup tungaaniit pasinapiluttumik iliuuseqarneraalluni pisuutitsiniaaneq taamaalilluni pissusiviusuni ilumuunngilaq aammalu ilumuunnginnerarneqartariaqarluni.

Suliassamik piareersaalluni suliaqarnerup suliarinerlutaanera

Kalaallit Airports Domestic A/S-imi sulisut suliassamik piareersaalluni suliaqarneq suliarilluarsimanngikkaat, nittartagaq SermitsiaAGp ilanngutassiaasa ilaanni borgmesteri Kiista P. Isaksen-ip oqarsimanera issuarneqarpoq.

Borgmesterip tamatumunnga oqaaseqarnermini suut tunngaviginerai ilisimanngilara, tassami borgmesteri sukkulluunniit neqeroortitsinerup piareersarneqarnerani akuutinneqanngimmat, aammalu ilisimasakka malillugit suliassamik piareersaalluni suliaqarneq, ingerlatseqatigiiffimmi sulisut suliarisaat, pillugu sumilluunniit paasisimasaqanngimmat, ammattaaq sanaartugassanik piareersaanerni aamma mittarfissanut neqeroortitsinernut immikkut ilisimasaqartuunani.

Ingerlatseqatigiiffimmi sulisut ukiut 3½ missaanni kingullerni – mittarfiliassanut tunngatillugu politikkikkut aalassassimaarneq annertugaluartoq ingerlaavaraluartorlu – ingerlatseqatigiiffiup siunnersortai peqatigalugit mittarfissanut angisuunut pingasunut aningaasalersuutissarsinissamut, oqartussat akuersissutaannik pissarsinissamut, sanaartugassamut pilersaarusiornernik neqeroortitsinernillu piffissaq sivikinnerpaaq atorlugu inissitsitsiniarlutik pikkorilluinnarlutik suliaqarsimapput; suliaqarneq nalinginnaasuunngitsumik suliassamut tunniusimaneq aammalu suliassamut ”akisussaaffimmik tigusineq” malunnarluarsimallutik. Matuma siuliani allassimasutut ingerlatseqatigiiffik aammalu ingerlatseqatigiiffimmi sulisut suliassanik piareersaalluni suliaqarnerminni Qaqortumi mittarfissaq, mittarfissat sinnerisut marluttut pingaartissimavaat, taamatullu sanaartugassanik pilersaarusiorneq neqeroortitsinerlu mittarfissanut sinnerinut marlunnut pisut asserluinnaannik tunngaveqarluni ingerlanneqarsimalluni.

Sulisut aamma mittarfiliassani marlunni suliaqarneq aallartissimavaat, sapaatit akunneri marluk matuma siorna mittarfissani pingasuni tamaginni mittarfiit illutassaannut neqeroortitsillutik, aammalu mittarfissanut pingasunut tamaginnut mittarfimmi teknikkikkut atortunut tamaginnut neqeroortitsinissap piareersarneqarnera ingerlallualereersimallugu.

Taamaalilluni borgmesterip sunilluunniit uppernarsaatissaqarani oqaaseqarnermini ingerlatseqatigiiffimmi sulisut suliaqarnerannut avoqqaarinninnera tunngavissaqanngilaq assuarnartuliornerullunilu, soorlu aamma ataani atsiortup kommunimi sulisut kommunalbestyrelsip aalajangiinerinut isornartorsiorniarlugit aalajangeraluarpat, tamanna assuarnartuliornerussagaluartoq.

Borgmesteri aamma borgmesterip tullia, tamarmik najukkami politikkeriusut pikkorissut ilakkuminartullu, ingerlatseqaatigiiffiup suliaqarneranut isornartorsiuerusukkunik, soorunami taamaaliorsinnaapput, kisianni taamaassappat sulisut tusagassiuutitigut avoqqaarinagit, ingerlatseqatigiiffiup aqutsisuinut saaffiginnittariaqaraluarput, aammalu isornartorsiuinertik pissusiviusunik aallaaveqartillugit saqqummiunnissaat isumagisariaqaraluarpaat, aningaasaqarnikkut piviusut, ingerlatseqatigiiffimmut siulersuisut ataqqisariaqagaat, pakatsissutiginerat pissutigalugu misigissutsitik sallinngortiinnarnagit.

Neqeroortitsinerup taamaatinneqarnerata pakatsissutigineqarnera ingerlatseqatigiiffimmi sulisunilu, Kommune Kujallermi najukkami politikkerini pakatsinertuulli, annertutigimmat, qularutigineqassanngitsoq oqaatigisinnaavara.

Neqeroorutinut akigititat tamanut saqqummiunneqarnissaat pillugu piumasaqarneq

Borgmesterip tullia Simon Simonsen taamatuttaaq ingerlatseqatigiiffiup aningaasartuutissanut missingersugaasa aammalu neqeroorutinut akigititat tamanut saqqummiunneqarnissaat piumasarigaa, nittartakkami SermitsiaqAGmi issuarneqarpoq.

Ingerlatseqatigiiffimmi ingerlatsinermut paasissutissat mianernartut tamanut saqqummiunniarsariaqarnerinut sunulluunniit Kalaallit Airports-imi aqutsisut pinaasersimasut aammalu pinaasertuaannartussaasut, siusinnerusukkut Attaveqaqatigiinnermut Naalakkersuisuusimasutut borgmesterip tulliata ilisimalluinnarpaa.

Neqeroortitsinerup ingerlanneqarneranut siunertaavoq unammilleqatigiissitsinissaq, tassani neqerooruteqartut ilaatigut akigititanut unammilleqatigiittussaallutik. Taamatut pisoqarnerani tamanna neqerooruteqartut unammilleqatigiissutissat atuukkunnaarsissinnaappasigit aammalu neqeroorutitik akunnerminni naleqqussarsinnaappasigit, kiisalu ingerlatseqatigiiffiup nammineq aningaasartuutissanut missingersuineri pillugit paasissutissat malillugit pisinnaassappata, tamanna ingerlatseqatigiiffimmut, naggataatigullu ingerlatseqatigiiffiup piginnittuanut Namminersorlutik Oqartussanut,  ajoquseerujussuartussaavoq.

Tamatuma saniatigut neqerooruteqartut ataasiakkaat mianersuunneqartussaapput, tassami taakkua neqeroorutimik aammalu niuernikkut isumaliutersuutimik aammalu ingerlatsinerminnut paasissutissanut mianernartunut, neqerooruteqarnerminni tunngavigisamik, tamanit ilisimaneqalinnginnissaat, taamaalillunilu unammillertiminnit atornerlunneqalinnginnissaat, tatigisussaavaat.

Taamaattumik Kalaallit Airports Domestic A/S-imi aqutsisut, aktiaatileqatigiiffittut arlaannaannulluunniit attuumassuteqanngitsumik siulersuisoqarluni namminersortutut, ingerlatseqatigiiffiup aamma neqerooruteqartut ingerlatsinerannut paasissutissat mianernartut pillugit paasissutissat tamanut saqqummiunneqannginnissaat suli aalajangiusimaannarniarpaat.

Alloriarneq tulleq?

Nittartakkami SermitsiaqAGmi ilanngutassiami, Qaqortumi mittarfiliassap piviusunngortinneqarnaviannginneranik isumaqarneq sorsualiarineqarniarpasikkaluartoq, Qaqortumi mittarfiliassamut ineriartortitsinermut, neqeroortitsinermut, sanaartornermut ingerlatsinermullu Kalaallit Airports Domestic A/S akisussaasuussasoq, Naalakkersuisut kissaateqaannartillugit, ingerlatseqatigiiffimmi aqutsisut sulisullu mittarfiliassani maannakkorpiaq unammilligassanut aaqqiissutissarsinissap qasusuillutik sulissutiginiaraat,  uppernarsarsinnaavara.

Suliaqarnermi tassani ilaatigut suliassap naleqqussarneqarsinnaanera pillugu entreprenørit marluk isumaqatiginninniarfigineqarsimasut, aammalu ingerlatseqatigiiffiup sanatitsisunut siunnersortaata aammalu sanaartugassamut pilersaarusiornermut siunnersortaata oqaloqatigineqarnerat ingerlaannartussaavoq, kiisalu aningaasalersuinissamut periarfissat pillugit Naalakkersuisut oqaloqatigineqartussaallutik. Ingerlatseqatigiiffiup tungaaniit siunnerfigineqassaaq 2021-imi imaluunniit suliassamut iluarsisamut oqartussanit akuersissutit pisariaqartut pissarsiarineqarniariarpata, nutaamik neqeroortitsisoqarsinnaanissaa.

24. august 2020

Kalaallit Airports Domestic A/S sinnerlugu

Johannus Egholm Hansen

Siulersuisunut siulittaasoq