ILULISSAT

Suliassami matumani Ilulissani mittarfimmik sanaartornermik suliaqarnissaq pineqarpoq

Ilulissani mittarfik nutaaq

Kalaallit Airports International A/S aamma Munck Gruppen A/S Ilulissani Nuummilu 2.200 meterimik nutaanik mittarfiliornissaq pillugu sanaartugassanut pingaarnernut akigititassanut isumaqatigiissuteqarput. Ilulissani sanaartornernik suliaqarneq 2020-imi qaammatit pingasukkaat aappaanni aallartinneqarpoq pilersaarutillu malillugit 2024-ip ingerlanerani naammassisussaalluni.

Ilulissani mittarfik ilaatigut mittarfilerlugu, minnermi marlunnik aqqutissalerlugu aammalu terminaleqarfilerlugu saqqaa aamma terminalip sullissiviillu illutaannut sanaartorfissalerlugu, sananeqassaaq.

Mittarfiup, minnermi aqqutissat aammalu saqqaata saniatigut sanaartornermik suliaqarnermi ilaatigut ilaatinneqassapput:
Ilulissat illoqarfianiit aqqutissanut aqqusinernut atassusiineq
qimussit aqqutaannik allanngortitsineq
terminaleqarfimmi biilinut unittarfiit
toqqavissanik aamma qaammaqqutinut napparutinik suliarinninneq
mittarfiup aamma terminalip sumiiffiisa iluanni kabelilersuinermut nunami suliassat
kuuffiit aqqutaat kiisalu mittarfiup ungalulerneqarnera.

Nuummi Ilulissanilu mittarfiit ilaatigut ILS-imik (Mitsitsinermi atortorissaarut), eqqoqqissaartumik minnissamut atortorissaarummik, isikkivilutsillugu missinnaalersitsisussamik, taamaalillunilu mittarfinni piffissamik eqquisarnermut pitsaanerulersitsisussamik, atortulersugaassapput.