Kalaallit Airports A/S-ip sanaartornermut inatsisissatut siunnersuummut tusarniaanermut akissuteqaataata Aviisimi Sermitsiaq-mi eqqartorneqarnera
”Nuummi aamma Ilulissani nunani tamalaani mittarfiit kiisalu Qaqortumi nunap immikkoortuani mittarfiup sananeqarnissaannut aningaasalersorneqarnissaannullu sinaakkutissatut piumasaqaatit pillugit Inatsisartut inatsisissaattut siunnersuummut” (Sanaartornermut inatsit) Kalaallit Airports A/S-ip tusarniaanermut akissuteqaataata 15. februar 2018-imeersup ilai toqqartukkat sapaammi ulloq 15. april 2018 Aviisip Sermitsiap nittartakkamini ilanngutassiami allaaserai. Kalaallit Airports A/S isumaqarpoq aviisimi Sermitsiaq-mi ingerlatseqatigiiffiup tusarniaanermut akissuteqaataata saqqummiunneqarnera immikkoortut ilaanni erseqqissarneqartariaqartoq aammalu ilassutaasunik oqaaseqarfigineqartariaqarluni.
Aalajangiisinnaarusunneq
Kalaallit Airports-ip nammineerluni ilaasunut timmisartunullu akigititat aalajangersarsinnaanissaat piumasaqaatigisimagaa, tamannalu pissutigalugu inatsisissatut siunnersuummi §10, imm. 3 peerneqassasoq ingerlatseqatigiiffiup kissaatigisimagaa, Aviisimi Sermitsiaq-mi innersuussutigineqarpoq imatut qulequtserlugu: “Akulerunnasi - akit uagut aalajangersassavagut”.
Tamanna eqqunngilaq.
Akigititanik aalajangersaasarnermut maleruagassat Naalakkersuisut namminneq inatsisissatut siunnersuutaanni §10, imm. 1-imi aammalu inatsisissatut siunnersuummi §10, imm. 1-imut aamma 2-imut nassuiaatini ilaareerpoq, imatut oqaasertaqarluni:
”Kalaallit Airports A/S-ip akit akinullu tunngaviusut niuernermik piumasaqaatit tunngavigalugit aalajangersartassavai. Akit akinullu tunngaviusut aalajangersarneqarnerini ingerlatseqatigiiffiup pisussaaffini, taakkununngalu taarsigassarsititsisunut pisussaaffii ilanngullugit naammassisinnaassagai naatsorsuutigineqarpoq.”
§10, imm. 3-ip peerneqarnissaanut Kalaallit Airports-ip siunnersuuteqarneranut pissutaasoq tassaavoq, aalajangersakkap taassuma aammalu §10, imm. 1-imi aamma imm. 2-imi aalajangersakkap imminnut assortuunnerat. Kalaallit Airports A/S-ip tamatuma saniatigut oqaatigaa, §10, imm. 3-imi aalajangersakkap attatiinnarneqarnissaa kissaatigineqarpat, erseqqissaneqartariaqartoq akigititat innersuussutigineqartut tassaasut ilaasunut timmisartunullu akitsuutit.
Naalakkersuinikkut akuleruttoqassanngitsoq
Aviisi Sermitsiap innersuussutigaa Kalaallit Airports-ip tusarniaanermut akissuteqaammini ”kissaatigigaa ..., naalakkersuinikkut akuleruttoqartannginnissaanut aalajangersaasoqassasoq”.
Tamanna eqqunngilaq.
Namminersorlutik Oqartussat ingerlatseqatigiiffiutaannut Naalakkersuisut malittarisassiaat malillugit naalakkersuinikkut akuleruttoqannginnissaanut tunngaviusoq atuutereerpoq, aammalu nutaajunngitsup taassuma atuutsinneqarnissaa Kalaallit Airports-ip kissaatigalugu. Namminersorlutik Oqartussat ingerlatassaminnik aktiaatileqatigiiffik nammineerluni siulersuisoqartoq pisortaatitaqartorlu aqqutigalugu aaqqissuussinissamik aalajangiussigaangata, ingerlatseqatigiiffimmi pisortaatitat ingerlatseqatigiiffimmut tunngasut pillugit aalajangiinerit pisariaqartut aalajangiiffigisussanngortarpai, aammalu aktiaatillip ataatsimeersuarnermi ingerlatseqatigiiffimmi siulersuisunik toqqaanermikkut sunniuteqarnissani atortarpaa. Tamanna aammattaaq ingerlatseqatigiiffinnut inatsit atuuttoq malillugu pisussaavoq.
Naalakkersuisut suliffeqarfimmi suliassaqarfimmi ataatsimi ulluinnarni ingerlatsinermut toqqaannartumik sunniuteqarnissaq kissaatigippassuk, tamanna aktiaatileqatigiiffittut nammineq siulersuisoqarlunilu pisortaqartutut aaqqissuunneqasinnaanngilaq, tassami ingerlatseqatigiiffimmi siulersuisut pisortaatitallu ingerlatseqatigiiffiup soqutigisaasa isumaginissaat suliassarimmassuk, aammalu politikkikkut soqutigisat suliassarinagit.
Ingerlatseqatigiiffinnik immikkoortortanik pilersitsineq
Aviisi Sermitsiaq allappoq ”Kalaallit Airportimit ... kissaatigineqarpoq ingerlatseqatigiiffik ingerlatseqatigiiffinnik allanik aamma pilersitsisinnaatitaassasoq, taamaalilluni ingerlatseqatigiiffiit pilersinneqartut Kalaallit Airportip suliassaasa ilaannik ingerlatsisinnaassammata.”
Tamanna eqqorpoq.
Mittarfissat taarsigassarsianit aningaasalersorneqarnissaat eqqarsaatigalugu, mittarfiit tapiiffigineqanngitsumik ingerlanneqartut (Nuuk aamma Ilulissat) mittarfimmit tapiiffigineqarluni ingerlanneqartumit (Qaqortoq) avissaartisimanissaat pisariaqartoq, Kalaallit Airports A/S-ip tusarniaanermut akissuteqaammini nassuiaqqissaarpaa. Qaqortumi mittarfik amigartooruteqarfiusumik ingerlanneqartoq Nuummi aamma Ilulissani mittarfittut ingerlatseqatigiiffimmi ataatsimiiginnassappat, tamatuma ingerlatseqatigiiffiup akiitsorsinnaassuseqarnera ajorseriartittussaavaa, taamaalillunilu mittarfinnut allanut marlunnut taakkununnga aningaasalersuutissat ilaannut taarsigassarsiat akisunerulernerannik tamanna malitseqarluni.
Qaqortumi mittarfiup Namminersorlutik Oqartussanit 100%-imik aningaasalersorneqarnissaanik siunnersuuteqarnermut tamanna tunngaviuvoq, mittarfiit allat marluk taakkua ilaatigut nammineq aningaasaatinit ilaatigullu taarsigassarsianik aningaasalersorneqassasut siunnersuutigineqarluni.
Aningaasalersuinerup aningaasartaasa akinut naleqqussarneqartarnerat
Aviisi Sermitsiaq allappoq ”ingerlatseqatigiiffiup [aamma kissaatigaa] aningaasaliissutit ukiumoortumik nalimmassarneqartarnissaat, taamaalilluni akit qaffannerani aningaasaliissutit eqqortorneqartannginnissaat anguniarlugu.”
Tamanna eqqorpoq.
Kalaallit Airports A/S-ip mittarfissanut pingasunut tamaginnut sanaartornermi pisussanut pilersaarutinik suliaqarnermut atatillugu, akigititat ulloq 1. januar 2017 atuuttut malillugit naatsorsorneqartoq, mittarfinnut akigititanut C-overslag-imik taaneqartartoq suliaraa.
Missingersuinermi tassani aningaasartuutit tamarmiusut (januar-2017-imi akigititat malillugit) kr. 3.6 mia.-inik annertussuseqassasut takutinneqarpoq. Mittarfissat aatsaat piffissami 2018 – 2022 sanaartorneqartussaammata, kingusinnerusukkut aningaasalersuinerup aningaasartaasa ”nungujartornerannut”, 2017-imiit 2022-imut pisussamut, matussutissatut aningaasalersuinerup aningaasartaasa qaffanneqarnissaat pillugu immikkut kingusinnerusukkut siunnersuummik Inatsisartuni suliarinninnissaq Naalakkersuisut kissaatigisimanngippassuk, 2017-imiit 2022-imut akinut kisitsisit ineriartornerat sillimaffigineqartariaqartoq ingerlatseqatigiiffik isumaqarpoq.
Tamanna oqaatigereerlugu, mittarfiliassanut isumaqatigiissutissat aningaasartaat inaarutaasut ilisimaneqanngimmata, taamatut akinut nalimmassaanissaq pisariaqartinneqassanersoq imaluunniit qanoq annertutigisumik taamaassanersoq nalorninartoq, Kalaallit Airports A/S-ip ataqqivaa.
Mingutsitsinermut akisussaasuuneq
Aviisi Sermitsiaq allappoq ”nunatat mingutsinneqarsimassagaluarpata saliinissamut piginnittuusimasut akisussaatinneqarnissaannut qulakkeerisoqarnissaa ingerlatseqatigiiffimmit [piumasarineqarpoq].”
Tamanna eqqorpoq.
Kalaallit Airports A/S-ip tusarniaanermut akissuteqaammini tikkuarpaa, mingutsitsinermut akisussaasuuneq pillugu tunngaviusumik tunngaviusoq, tassalu ”mingutsitsisoq akiliissasoq”, aamma Nuummi aamma Ilulissani mittarfissatut atuuttariaqartoq. Kalaallit Airports A/S-ip maannamut mittarfinni ingerlatsineq akisussaaffigisimanngilaa, taamaattumillu mingutsitsisoqarsimassagaluarpat tamanna akisussaaffigisinnaanagu. Tamatuma saniatigut mingutsitsisimasinnaanermut akisussaaffigineqartussaq qanoq annertutiginersoq Kalaallit Airports A/S-ip ilisimanngilaa.
Ingerlatseqatigiiffiup nammineerluni piliarinngisaanik, aammalu annertussusaa ilisimaneqanngitsumik mingutsitsisoqarsimasinnaaneranut Kalaallit Airports A/S akisussaatinneqassappat, tamanna nalinginnaasuussanngilaq aammalu suliassat taarsigassarsianit aningaasalersorneqarnissaannut, aammalu taarsigassarsianit aningaasalersuinermut atugassarititaasunut, periarfissanut tamanna sunniuteqarnerluttussaalluni. Taamaattumik mittarfiliassat ilaasa taarsigassarsianit aningaasalersorneqarnissaannik kissaateqarnerup toqqaannartumik kingunerisaanik, Kalaallit Airports A/S tusarniaanermut akissuteqaammini taamatut oqaaseqaateqarpoq.
Aqqusinernut il.il. aningaasartuutit
Aviisi Sermitsiaq erseqqissaavoq, inatsisissatut siunnersuummi aalajangersagaq manna peerneqassasoq Kalaallit Airports A/S-ip piumasarisimagaa:
”Mittarfinni pingasuni attaveqaqatigiinnermik pilersitsinissamik pisariaqartinneqalersunik sanaartornissamut aningaasartuutit agguarneqarnissaannik Naalakkersuisut Kalaallit Airportimut isumaqatigiissusiorsinnaapput.”
Tamanna eqqorpoq.
Kalaallit Airports mittarfiit nutaat atorneqalerneranni nunaminertamik, mittarfissat sumiiffiisa inissisimaffigisaannik, piginnittuulertussaavoq. Kisianni Kalaallit Airports illoqarfinnit mittarfiit tungaannut aqqusinernut piginnittuusussaanngilaq, taamaattumillu aqqusernit taakkua aningaasalersorneqarneranni peqataanissamut tunngavissaqarani.
Kalaallit Airports aqqusernit mittarfiit sumiiffiisa avataanniittut sanaartorneqarnerinut aningaasalersuissasoq piumasaqaatigineqassappat, ingerlatseqatigiiffiup aningaasartuutaannut missingersuinerit qaffanneqartariaqassapput, taakkununngalu aningaasassat Naalakkersuisunit aningaasaliissutigineqartariaqassallutik, tassami mittarfinnik sanaartornissamut taarsigassarsiarititassatut akuerisamik, tamatumunnga taarsiullugu Kalaallit Airports A/S-ip nammineerluni piginngisaannut aammalu taarsigassarsiat utertillugit akilernissaannut iluaqutaasussanik erniortinneqartussaanngitsunik aqqusinniornermut atorneqarnissaat ingerlatseqatigiiffimmut taarsigassarsititsisut akuerissagaat takorlooruminaappoq.
”Nuummi aamma Ilulissani mittarfiit nutaat niuernermik tunngavilimmik, aammalu Naalakkersuisunit tapiiffigineqanngitsumik ingerlanneqassasut Kalaallit Airports A/S-ip siunnerfigalugu nalunaarutigereerpaa. Taamaattumik ilaasut amerlanerpaajunissaasa angunissaa aammalu timmisartut tikittarnerisa aallartarnerisalu sapinngisamik amerlanerpaajunissaat ingerlatseqatigiiffiup sakkortuumik soqutigisaraa, tassami tamanna ingerlatseqatigiiffiup isertitaqarfiini pingaarnersaammat. Aningaasalersuinerup sapinngisamik pilerinaateqarnissaata, sanaartornermut aningaasartuutit sapinngisamik annikinnissaasa, aammalu ingerlatsinermut aningaasartuutit sapinngisamik annikinnissaasa angunissaa siunnerfigalugu ingerlatseqatigiiffimmi pisortat sulipput, taamaalillutik ilaasunut aamma timmisartunut akitsuutit sapinngisamik annikinnerpaamiitinneqarsinnaassallutik”, oqarpoq Johannus Egholm Hansen, siulersuisuni siulittaasoq.