Danskit naalagaaffiat Kalaallit Airports International A/S-imi ilaasortaalerpoq

Danskit naalagaaffiat ulloq 7. maj 2019 Kalallit Nunanni mittarfinnut ingerlatseqatigiiffimmi, Kalaallit Airports International A/S-imi, Nuummi aamma Ilulissani atlantikukkoortunut mittarfiit marluk sananeqarnissaannut, ingerlanneqarnissaannut ineriartortinneqarnissaannullu isumaginnittuusumi, ilaasortaalerpoq.

Naalagaaffiup ingerlatseqatigiiffimmi ilaasortaalerneranut atatillugu Merete Eldrup aamma Marlene Haugaard immikkut ittumik ataatsimeersuarnermi danskit naalagaaffiat sinnerlugu siulersuisuni ilaasortaalertussatut inassutigineqassapput.

Aningaasaqarnermut ministeri Kristian Jensen oqarpoq:

Suliassami pingaaruteqartumi, mittarfissanik nutaanik Kalaallit Nunaanni attaveqaqatigiinnerup nutarterneqarneratut ittumi naalagaaffik maannakkut tapersiisinnaammat nuannaarutigaara. Taamaattumik naalagaaffiup ilaasortaalernerani siulersuisunut ilaasortanik pikkorissunik piginnaasaqarluartunillu marlunnik, Merete Eldrup aamma Marlene Haugaard ilaasortanngortinneqarneranni tapersiisinnaagatta pingaartittorujussuuara.

Danskit naalagaaffiat ingerlatseqatigiiffimmi nammineq aningaasaatinut katillugit 700 mio. koruuninik akiliuteqarniarpoq aammalu taanna aqqutigalugu 33,3 procentinik annertussusilinnik piginneqataalissalluni. Sinneruttut 66,7 procentit Kalaallit Airports Holding A/S-imit, 100 procentimik Namminersorlutik Oqartussanit pigineqartumit, pigineqassapput.

Aningaasaatinut akiliuteqarnerup saniatigut danskit naalagaaffiat aammattaaq ingerlatseqatigiiffimmut katillugit 450 mio. koruuninik taarsigassarsititseqqissaaq kiisalu 450 mio. koruunit tikillugit taarsigassarsianut Kalaallit Airports International A/S-ip Den Nordiske Investeringsbank-imi taarsigassarsiariniagassaannut, naalagaaffik qularnaveeqqusiissalluni.

Naalagaaffiup Kalaallit Nunaanni mittarfinni suleqataaneranni, danskit naalakkersuisuisa aamma Folketing-imi partiit tamarmik akornanni isumaqatigiissummik ulloq 11. december 2018-imeersumik kiisalu danskit naalakkersuisuisa aamma Naalakkersuisut akornanni politikkikkut isumaqatigiissummik ulloq 10. september 2018-imeersumik, piviusunngortitsineruvoq.