MT Højgaard International, Nuup mittarfiani nutaami pingasunik illuliorniarpoq
MT Højgaard International, Nuup nunanut assigiinngitsunut mittarfissaani mittarfiup illorsuartaanik (aallartarfimmik tikittarfimmik) nutaamik ataatsimik, kiffartuussinermi illuliamik ataatsimik aamma timmisartunik tikittussanik aallartussanillu nakkutilliiffimmik ataatsimik sanaartornissamut suliassaq ajugaallutik pissarsiarisimavaat.
Namminersorlutik Oqartussat, Kalaallit Airports International A/S aqqutigalugu, 2016-imili Nuummi Ilulissanilu mittarfinnik nutaalianik, nunanut assigiinngitsunut timmisartuussinissamut takissusilinnik pilersitsiniarluni suliaqarsimavoq. MT Højgaard International Nuummi mittarfimmut nutaamut illuliat sananeqarnissaat tamakkerlugu suliarinnittussarsiuussinermi ajugaasimavoq.
Aviaaja Karlshøj Knudsen, Kalaallit Airports International A/S-imi suliniummi pisortaq oqarpoq;
- Qujanarpoq suliniutip ilaa taanna iluatsilluartumik suliariumannittussarsiuunneqarsimammat. Illuliat mittarfinnut suliniutinut pingaaruteqarput aamma nunanut assigiinngitsunut mittarfinni nutaani taakkunani sullissinerup pitsaassusianut ilaasullu misigisaannut pitsaassutsimik aalajangiissapput. Kalaallit Airports International A/S-ip suliassami pingaarutilimmi tassani MT Højgaard Internationalimik suleqateqarnissani qilanaaraa.
Jóannes Niclassen, MT Højgaard Grønlandimi pisortaaneq oqarpoq:
- Mittarfimmi illulianik nutaanik sanasinnaatitaalernerput tulluusimaarutigaarput. Nunanut assigiinngitsunut mittarfik nutaaq Nuummut annertuumik pingaaruteqalersinnaavoq. Suliniut annertuvoq aamma soqutiginarpoq, tassani Kalaallit Nunaanni illoqarfinni aalajaatsumik attaveqarnerput nuannaarutigaarput.
Illuliortaatsip Kalaallit Nunaanni pinngortitaq ersersippaa
Suliniut ataatsimut isigalugu mittarfiup illorsuartaanik (aallartarfik tikittarfik) ataatsimik 7.200 m 2 annertussusilimmik, mittarfimmi ingerlatsinermi atortussanik kiffartuussinermi illuliamik ataatsimik 3.200 m 2 annertussusilimmik aamma timmisartunik tikittussanik aallartussanillu nakkutilliiffimmik ataatsimik 230 m 2 annertussusilimmik sanaassanik pilersaarusiornernik aamma sanaartornernik ilaqarpoq.
Illuliat pingasut tamarmik sisammik ilusilersorneqassapput oqitsunik igalaanik aamma aluminiumik immikkoortortanik, taama tulleriillutik qallersorneqarlutik sananeqassapput. Mittarfiup illorsuartaa (aallartarfik tikittarfik) Nuummi qaqqat illoqarfimmik ungalusimasut aaqqissugaanerat ersersillugu qallersorneqassaaq. Suliniut atortussat pitsaalluinnartut atorlugit sananeqassaaq.
Illulianik nutaanik taakkuninnga Zesco Architects suleqatigalugit MT Højgaard Internationalimit sananeqartussanik pilersaarusiorneq, ukiortaap kinguninngua aallartinneqassaaq aamma sanaartornermut pilersaarut malillugu Nuummi sanaartorfissami ulloq 1. juuli 2021 aallartinneqassaaq.
- Qiimmatsaatigaarput Zeso Architects suleqatiginissaat, taakku suliniummik ilisimalluarput. Saniatigut nuannaarutigaarput, uagut nammineq ingeniørigut silarluttumi sulinermik aamma atortussanik nassiussuinermi piffissat sivisusarnerisa kingunerisaannik pilersaarusiornermut piumasaqaatinik qaffasissunik misilittagaqarluarmata, Jóannes Niclassen oqarpoq.
Timmisartunik tikittussanik aallartussanillu nakkutilliiffik juuni 2022-mi tunniunneqassaaq, massa mittarfiup illorsuartaa (aallartarfik tikittarfik) aamma mittarfimmi ingerlatsinermi atortussanik kiffartuussinermi illuliaq juuni 2023-mi tunniunneqartussaasut.
Suliniut pillugu suli paasissutissanik pisariaqartitsiguit, tulliuttunut saaffiginninnissannut tikilluaqqusaavutit:
Suliniummi pisortaq; Aviaaja Karlshøj Knudsen, +299 583858, akk@kair.gl
Tusagassiortoq Sarah van Hagen Lind Sejr, +45 2270 9695, sals@mth.dk