Ilulissani, Nuummi aamma Qaqortumi mittarfittaassanut nammineq aningaasaatinit aningaasalersuinissaq aamma piffissamut pilersaarut inissipput

Ilulissani, Nuummi aamma Qaqortumi mittarfittaassanut nammineq aningaasaatinit aningaasalersuinissaq aamma piffissamut pilersaarut inissipput

Inatsisartut 2018-imut aningaasanut inatsit akuerimmassuk Ilulissani, Nuummi aamma Qaqortumi mittarfiliassanut suliassat, 2018-imi suliaqarnerit aallartinnissaasa tungaanut annertuumik ingerlariaqqipput.

2017 Kalaallit Airports A/S-imi ulapaarfiuvoq, tassani ingerlatseqatigiiffiup ilaatigut sanatitsisumut siunnersortaasussaq toqqarlugu, mittarfissanut pingasunut taakkununnga sanaartornermut pisussanut pilersaarutit siulliit naammassillugit, mittarfissanut siunnersortaasussaq sanaartugassanik pilersaarusiortussaq neqeroortitsivigitillugu toqqarlugulu, inatsisilerinermut siunnersortaasussaq neqeroortitsivigitillugu toqqarlugulu, aammalu suliassanut aningaasalersuinissamut nunani tamalaani taarsigassarsisarfinni taarsigassarsiviusussanut aningaasalersuinermut siunnersortaasussaq neqeroortitsivigitillugu toqqarlugulu.

Ingerlatseqatigiiffiup tamatuma saniatigut mittarfinni illorsuassanut sanaartornissamut siunnersuisartunut sanaartornermut pilersaarusiortussanut tamakkiisumik suliarinninnermut siunnersuisartunik unammisitsilluni piukkunnartussarsiuussineq, neqeroortitsineq aallartitsinerlu ingerlappaa.

Ingiaqatigisaanik Kalaallit Airports A/S-ip mittarfissanut taakkununnga ingerlatsinermut aningaasalersuinermullu pilersaarut suliaraa, peqatigisaanik Namminersorlutik Oqartussat suliassanut nammineq aningaasaatinit aningaasalersuinissaanut tunngavissat pillugit Naalakkersuisut qanimut oqaloqatigineqarnerat ingerlanneqarluni.

Inatsisartut 2018-imut aningaasanut inatsit akuerimmassuk, Namminersorlutik Oqartussat mittarfiliornerni suliassanut nammineq aningaasaatinit aningaasalersuinissaannut aningaasaliissutitigut inatsimmi tunngavissat qulakkeerneqarput, taamatullu taarsigassarsianit aningaasalersuinissamut qularnaveeqqusiinissamut inatsimmi tunngavissaqalersitsisoqarluni.

Suliassanut piffissamut pilersaarutit iluarsaannerisigut, ingerlatseqatigiiffiup taarsigassarsititsisartuni kr. 1,5 mia. missaannik aningaasalersuutissat sinnerinik aningaasalersuutissarsiornissamut suliaqarnerata ingerlaqqinnissaanut tunngavissat pitsaanerulersinneqarput.

Ingerlatseqatigiiffiup piffissamut pilersaarutaa, aningaasanut inatsisip ilaatut akuerineqartoq, malillugu taarsigassarsianit aningaasalersuinissaq 2018-imi aasaanerani inissereersimasussaavoq, aammalu mittarfimmi siullermi (Nuummi) sanaartornermik suliaqarnerit 2018-imi aasap naalernerani aallartittussaallutik. Tamatuma kingorna Ilulissani aamma Qaqortumi mittarfinnut tunngatillugu sanaartornermik suliassat aallartinnissaat 2019-imi upernaakkut tulliutissaaq.

Maannakkut piffissamut pilersaarutaasoq malillugu mittarfiit pingasut tamarmik 2022-imi ukiaanerani naammassinissaat naatsorsuutigineqarpoq.