Kalaallit Airport A/S-ip siulersuisui siullermeertumik siulersuisunut siulittaasutaamit, Johannus Egholm Hansen-imit, aqunneqartumik siulersuisuni ataatsimeeqqammerput, tassani siulersuisut Qaqortumi, Ilulissani aamma Nuummi mittarfiliassanut piareersaanermut piviusunngortitsinissamullu tunngatillugu arlalinnik pingaarutilinnik aalajangiillutik.
Taamaalillutik aappaagu sanaartornermik suliaqarnerit aallartivinnginneranni ingerlatassat pisariaqartut ingerlaqqinnissaannut piffissamut pilersaarummik aalajangersimasumik anguniagaqarfiusumillu siulersuisut aalajangiussipput. Ingerlatassani taakkunani ilaatigut ilaapput sanaartornermut pisussanut pilersaarutit, mittarfinnik sanaartornerup pilersaarusiornissaata neqeroortitsivigineqarneranut, suliassamut siunnersuummik aamma suliassap pingaarnersaannik suliaqarnermut tunngavissaliisussat 2017-imi martsip aamma apriilip ingerlanerani inaarsarneqarnissaat.
Tamatuma saniatigut oqartussaasut akuersissuteqarnissaannut pisariaqartunut qinnuteqartoqartussaavoq, ilanngullugit VVM-ip akuerineqarnissaa, nunaminertamik atugassiinissaq aamma mittarfinnut oqartussaasunit suliassat akuerineqarnissaat pillugu qinnuteqaateqarneq.
Kiisalu ingerlatsinermut aningaasalersuinermullu pilersaarutip, suliassamut aningaasalersuutissanik pissarsinissamut, il.il. tunngavissaliisussap inaarsarneqarnera suliarineqarpoq.
Taamatuttaaq sanaartugassanut isumaqatigiissutit neqeroortitsivigineqarnissaat qaqugu naammassereersimassanersoq, aammalu sanaartornermik suliaqarnerit qaqugu aallartissanersut piffissamut pilersaarummik aalajangersaasoqarpoq, taamaallaat piffissamut pilersaarutip naatsorsuutigineqartup iluani oqartussaasut akuersissuteqarnissaat pisariaqartut apeqqutaassallutik.
Siulersuisut sanaartugassanut pilersaarusiornernut suliassanut aamma sanaartugassanik neqeroortitsinermut atatillugu Kalaallit Nunaanni suliffissanik pilersitsinissaq aamma piginnaasaqarfinnik ineriartortitsinissaq, aammalu suliffeqarfinnik kalaallinit pigineqartunik naleqquttunik pikkorissuseqartunillu, Kalaallit Nunaanni pissutsinut ilisimannittunik aammalu issittumi sanaartugassanik annertuunik suliaqarnerit ingerlattarnerannut ilisimasaqartunik akuutitsinissaq, sapinngisami annertunerpaamik pingaartinniarpaat.
Taamatuttaaq Qaqortumi, Ilulissani aamma Nuummi 1.500 meterisut, 2.200 meterisut aamma 2.200 meterisut takissuseqartunik mittarfittalinnik, pilersaarutit malillugit 2020-imi (Qaqortoq) aamma 2021-imi (Ilulissat aamma Nuuk) naammassisussanik aammalu atorneqalernissamut piareersimasussanik, mittarfiliornissaq pillugu aalajangiineq pillugu siulersuisut Naalakkersuisunut ilaasortat akisussaasuusut pitsaasumik pilersitsiviulluartumillu oqaloqatigaat.
”Mittarfiliassat angisoorujussuit pingasut suliarineqarnissaannut piffissamut pilersaarut annertoorujussuusoq siulersuisut eqqumaffigaat, kisianni maannamut suliassamut piareersaalluni suliaqarnerup siumut ingerlasimanera, aammalu siuilersuisut Naalakkersuisunit tapersersorneqarnerat tunngavigalugit misigisimallutik piffissamut pilersaarut aalajangiunneqartoq atoruminartuusoq", oqarpoq siulersuisunut siulittaasoq Johannus Egholm Hansen.
***
Tusagassiuutitigut nalunaarut manna pillugu saaffigineqarsinnaavoq Pisortaaneq Steffen Ulrich-Lynge, oqarasuaat +299 55 44 33.