Nittartakkamik saqqummersitsineq, sanaartornermi pisussanut pilersaarummik suliaqarneq il.il.

Nittartakkamik saqqummersitsineq, sanaartornermi pisussanut pilersaarummik suliaqarneq kiisalu Qaqortumi, Ilulissani aamma Nuummi mittarfittaassanut tamaginnut siunnersuisartumik sanaartornissamut pilersaarusiortussamik piukkunnartussarsiuussinissaq, naammassipput.

Nittartakkamik saqqummersitsineq

Kalaallit Airport A/S-ip Nuummi, Ilulissani aamma Qaqortumi mittarfinnik nutaanik sanaartornissamik suliaqarnera pilersaarutit malillugit ingerlavoq.

Suliassap siumut ingerlanera aamma ingerlatat pillugit tamanut attaveqaqateqarneq nukittorsarniarlugu, ingerlatseqatigiiffik maannakkut nittartakkamik saqqummersitsivoq, tassani ingerlatseqatigiiffik suliassat pillugit tamanut ingerlaavartumik ilisimatitsissuteqartassalluni. Nittartagaq uani takuneqarsinnaavoq: www.kair.gl

Sanaartornermi pisussanut pilersaarutit aamma mittarfinnut tamaginnut siunnersuisartussamik toqqaanissaq:

Qaqortumi, Ilulissani aamma Nuummi mittarfittaassanut pingasunut tamaginnut sanaartornermi pisussanut pilersaarummut siunnersuutit, aningaasartuutissanut missingersuinertaqartut, Kalaallit Airport A/S-ip maannakkut sanaartortitsisumut siunnersortaasumit Inuplan A/S-imit tigusimalerpai. Sanaartornermi pisussanut pilersaarutit tunngavigalugit 2017-imi maajimiit juunimut mittarfinnut sanaartugassanut pilersaarummut tamaginnut siunnersuisartup suliassai neqeroortitsivigineqassapput.

Sanaartugassamut pilersaarusiornermut siunnersuisartut pingasut piukkunnartussarsiuussinermi toqqarneqareerput aammalu mittarfinnut tamaginnut siunnersuisartup suliassaannut neqerooruteqarnissamut periarfissinneqassallutik. Taakkua tassaapput

1. Verkis hf., Reykjavik, Island. Verkis hf saniatigut suliffissuarmiipput Isavia ohf, Island-imeersoq, Multiconsult, Norge-meersoq, aamma S&M – Verkis Kalaallit Nunaanneersoq.
2. Rambøll Danmark A/S Rambøll Kalaallit Nunaat A/S aamma Orbicon Arctic A/S, marluk taakkua tamarmik Kalaallit Nunaanni angerlarsimaffeqartut, aammalu Orbicon A/S, Danmark-imeersoq, peqatigalugit.
3. COWI A/S, Danmark-imeersoq, Masanti A/S Kalaallit Nunaanneersoq peqatigalugu.

Kalaallit Airport A/S-ip 2017-imi juunimi mittarfinnut pingasunut tamaginnut, sanaartugassanik pilersaarusiornermut tamaginnut siunnersuisartumik inaarutaasumik toqqaanissaq naatsorsuutigaa.

Kommunit aamma inuussutissarsiortut ilisimatitsissuteqarluni ataatsimeeqatigineqarnerat:

Suliassanut piareersaalluni suliaqarnerup ingiaqatigisaanik Kalaallit Airport A/S-ip, ilaatigut suliassat taakkualu siumut ingerlanerat pillugit ilisimatitsiniarluni, ilaatigullu inuussutissarsiortut suliassanik suliaqarnermi peqataanissamut periarfissai kissaataallu oqallisiginiarlugit, Qaqortumi, Ilulissani aamma Nuummi kommunalbestyrelsit aamma inuussutissarsiornermi kattuffiit ataatsimeeqatigisarlugit aallartippoq. Ilulissani Qaasuitsup kommunia aammalu Ilulissani Sulititsisut aammalu Nuummi Kommuneqarfik Sermersooq aamma Sulititsisut qullersaqarfiat ataatsimeeqatigineqareerput, aammalu maajip qiteqqunnerani Qaqortumi kommune Kujalleq aamma najukkami inuussutissarsiortut aallartitaat ataatsimeeqatigineqassapput.

Aningaasaqarnermut siunnersuisartussamik aamma inatsisilerinermut siunnersuisartussamik toqqaaneq

Suliassat siumut ingerlanerisa kingunerisaannik Kalaallit Airport A/S 2017-imi juunip/juulip ingerlaneranni neqeroortitsiniarpoq aammalu suliassanut aningaasalersuutissanik pissarsiniarnermi aamma sanaartornermut suliassani annertuuni taakkunani siunnersuisartunut aamma sanaartornermut akigititassanut isumaqatigiissutit isumaqatiginninniutigineqarnerannut ikiortissanik aningaasalersuisarnermut inatsisilerinermullu siunnersuisartussanik toqqaassalluni. Suliassat Kalaallit Nunaanni aamma Danmarkimi neqeroortitsivigineqassasut naatsorsuutigineqarpoq.

2017-imi nalinginnaasumik ataatsimeersuarneq:

Ulloq 2. maj 2017 ataatsimeersuarnermi maannakkut siulersuisuusut qineqqinneqarput, Johannus Egholm Hansen siulersuisunut siulittaasutut ingerlaqqittussanngorluni. Siulersuisuni ilaasortat sinneri tassaapput siulittaasup tullia Aviâja Lyberth Lennert (Allattoqarfimmi pisortaq, Royal Arctic Line), Peter Christensen (Mittarfeqarfinni aningaasaqarnermut pisortaq), Berit Koertz (Danmarks Skibskredit-imi Senior Relationship Manager) aamma Jákup Sverri Kass (Vágar-ip Mittarfiani mittarfimmut pisortaq). Deloitte ingerlatseqatigiiffiup kukkunersiuisuatut toqqaqqinneqarpoq.

”Mittarfiit pingasut taakkua sanaartorneqarnissaannut suliassanik piareersaarnermi suliat suli ingerlalluarput, aammalu aasamut tamaginnut siunnersuisartussamik toqqaasoqarnissaa qilanaaraarput, taamaalilluta tamaginnut siunnersuisartup suliassamut siunnersuummik sukumiisumik suliaqarnera, sanaartornermut suliassanut aningaasalersuutissarsinissamut neqeroortitsinissamullu tunngavissaliisussaq, pimoorullugu aallartissallutigu. Aamma mittarfittaassani terminalip illutassaanut aamma illutassanut sullissiviusussanut illussanik titartaanermik unammisitsinissap aalajangiunneqartup inernissai qilanaaraagut", oqarpoq pisortaq Steffen Ulrich-Lynge. "Taamatuttaaq kommunit aamma inuussutissarsiortut ataatsimeeqatigineranni suliassat pillugit ilisimatitsissuteqarnissamut periarfissaqarsimagatta aammalu suliassat najukkani anigorniagassanik unammillernartortaqarnerisa oqallisiginissaannut periarfissaqarsimagatta, nuannaarutigaarput, oqarpoq Steffen Ulrich-Lynge.”

***

Tusagassiuutitigut nalunaarut manna pillugu saaffigineqarsinnaavoq pisortaaneq Steffen Ulrich-Lynge, oqarasuaat +299 55 44 33.