Qaqortumi mittarfissap sanaartornissaanut pilersaarusiorneq aallartinneqarpoq
Kalaallit Airports ulloq 27. november 2018 siulersuisut ataatsimeereernerisa kingorna Qaqortumi mittarfissamut sanaartornissamut pilersaarusiorneq kiisalu mittarfissani pingasuni tamaginni mittarfiit illutassaannut sanaartornissamut pilersaarusiorneq, tamakkiisumik aallartittussanngortippaat.
Mittarfiit sanaartornissaannut pilersaarusiorneq
”Sanaartornissamut inatsisip akuerineqarnerani aammalu anorlertarneranik misissuinerit ilassutaasussat kissaatigineqartut ilaasa naammassineqarneranni, Qaqortumi mittarfissamik sanaartornissamut pilersaarusiorneq aallartissinnaalersimavarput”, oqarpoq Steffen Ulrich-Lynge, Kalaallit Airports A/S-imi pisortaaneq.
Taamaattumik Kalaallit Airports A/S-ip ingeniørit suliffeqarfiat COWI, aamma Nuummi aamma Ilulissani mittarfissat sanaartornissaannut pilersaarusiortuusoq, aammalu Masanti A/S-imik Kalaallit Nunaanneersumik siunnersortitut atuisussaq, Qaqortumi mittarfissamut sanaartornissamut pilersaarusiorneq piaartumik aallartinneqassasoq, isumaqatigiissuteqarfigaa.
Anorlertarneranik misissuinerit ilassutaasussat
Ilaatigut Qaqortumi mittarfissap kissaatigineqartup angissusissaata politikkikkut nalornissutigineqalernera, aammalu anorlertarneranik uuttoortaanerit aammalu anorlertuusaartitsilluni misileraanerit annertuut suliarineqareeraluartut, Kalaallit Airports A/S-ip mittarfissap nutaap taassuma eqqaani anorlertarneranut aalaruluttarnermullu tunngasunik annertunerusunik isissuinissamik kissaateqarnera pissutigalugu, Qaqortumi mittarfissamut sanaartornissamut pilersaarusiornissaq uninngatinneqarallarsimavoq.
Misissuinerit taakkua ilai naammassineqareerput, taamatullu sumiiffimmit ukiumi ataatsimi anorimik uuttortaanerit annertunerusut pigineqalerlutik. Kisiannili misileraalluni timmisartornerit kissaatigineqartut ingerlanneqarsinnaasimanngillat, ilaatigut silamik pissuteqartumik anigorniagassaqarsimaneq pissutigalugu, ilaatigullu ingerlasussanik piareersaanikkut anigorniagassaqarneq pissutigalugu, Kalaallit Airports A/S paasissutissiivoq.
”Tunngavissat pigineqartut tunngavigalugit sanaartornissamut pilersaarusiorneq aallartinneqassasoq Kalaallit Airports A/S aalajangerpoq, taamaalilluni oqartussanit akuersissutit sinneruttut qinnuteqaatigineqarsinnaalissallutik aammalu mittarfissamut sanaartornermi suliassanut neqeroortitsinermut najoqqutassat suliarineqarsinnaalissallutik. Peqatigisaanik aalarulunneranik ilimasaareriaasissamut, mittarfissani pingasuni tamaginni pilersinneqartussamut atugassamik, anorimik uuttortaanerit annertunerusut aammalu aalaruluttarneranik misissuinerit suliarineqarnerat ingerlaannassaaq”, oqarpoq Steffen Ulrich-Lynge.
Piffissaq sanaartorfiusussaq sivikinnerusoq
Qaqortumi mittarfissamut 2019-imi aammalu illutasaannut 2020-imi sanaartornissamut pilersaarusiorneq ingerlanneqassasoq pilersaarutigineqarpoq. 2020-imi aasaanerani mittarfiup sanaartorneqarnera aallartinneqassaaq aammalu 2021-imi aasaanerani illutassaasa sanaartorneqarnerat allartinneqassalluni.
Qaqortumi mittarfissamut piffissaq sanaartorfiusussaq, mittarfissat sinnerinit sivikinnerusussaammat, Qaqortumi mittarfissaq Nuummi aamma Ilulissani mittarfissat peqatigalugit naammassissasoq, suli siunnerfigineqarpoq – tassalu 2023-imi qaammatini pingasukkaani kingullerni.
Mittarfiit illutassaannik sanaartornissamut pilersaarusiorneq
Qaqortumi mittarfissamut sanaartornissamut pilersaarusiornerup aallartinneqarnerata aammalu Nuummi aamma Ilulissani mittarfissanut sanaartornernik suliassat 2019-imi januaarip naalernerani neqeroortitsivigineqarnissaata naatsorsuutigineqarnerata saniatigut, Kalaallit Airports A/S aamma mittarfissani pingasuni tamaginni mittarfiit illutassaannut sanaartornissamut pilersaarusiornerup aallartinneqarnissaa pillugu COWI-mut isumaqatiginninniarpoq. Mittarfiit illutassaannut sanaartornissamut pilersaarusiorneq decembarip imaluunniit januaarip qaammataani aallartissasoq, aammalu illutassani suliassat neqeroortitsivigineqarnerat 2020-imi pissasoq, naatsorsuutigineqarpoq. COWI-p saniatigut, Masanti A/S Kalaallit Nunaanneersoq aammalu danskit illussanik titartaasartut suliffeqarfiat Zeso Architects, siunnersortip ataani siunnersuisartussatut mittarfiit illutassaannut sanaartornermut pilersaarusiortuussapput.
Tusagassiuutitigut nalunaarut manna pillugu saaffigineqarsinnaavoq Steffen Ulrich-Lynge, CEO oqarasuaammi +299 554433.