Tusagassiuutitigut nalunaarut
Kalaallit Airports A/S-ip siulersuisuni ilaasortanik nutaanik marlunnik toqqaanikkut siulersuisut allanngortippai amerlillugillu
Kalaallit Airports A/S-ip ulloq 16. februar 2018 immikkut ittumik ataatsimeersuarnermi siulersuisuni ilaasortat marluk nutaat, Louise Hasle aamma Finn Gaarsmand toqqarpai.
Louise Hasle Berit Koertz, inuttut pisunik peqquteqartumik siulersuisuni aniniarluni aalajangersimasoq, taarserlugu siulersuisuni ilaasortanngorpoq.
Louise Hasle 47-inik ukioqarpoq, aammalu Danmarkimi EKF-imi (Eksport Kredit Fonden) Chief Underwriter-itut atorfeqarluni. Nunarsuaq tamakkerlugu suliniutinut aningaasalersuinermi annertuumik misilittagaqarpoq, immikkut anorip nukinga atorlugu suliniutit aallussimallugit, ilanngullugit suliassani annertoorujussuarmik angissuseqartuni aammalu pisariussuseqartuni taarsigassarsititsinermi atugassarititaasut aalajangersimasut isumaqatiginninniutigineqartarneri.
2007-imi EKF-imi atorfininnissani sioqqullugu Louise Hasle ilaatigut Københavns Fondsbørs A/S-imi aamma Novo Nordisk A/S-imi sulisimavoq. Sulinermi saniatigut Louise Hasle Aningaasalersuisarnermut Copenhagen Business Schools Institut-imi suliniuteqarnernut aqqutissiuussisartutut sulisarpoq.
Louise Hasle Københavnimi Handelshøjskole-mi (maannakkut Copenhagen Business School) Aningaasalersuinermi aamma Naatsorsuuserinermi Cand. Merc.-itut ilinniarsimasuuvoq.
Finn Gaarsmand siulersuisunut ilaasortat 5-iniit 6-inut amerlisinneqarneranni, siulersuisunut ilaasortanngorpoq.
Finn Gaarsmand 60-inik ukioqarpoq, ingeniøriuvoq, aammalu Danmarkimi FLSmidth A/S-imi Global EPC Director-itut atorfeqarluni, tassani cementinik suliffissuaqarnerup iluani suliniutinut EPC / turnkey-nut neqerooruteqartarneq aammalu taakkuninnga suliaqartarneq nunarsuaq tamakkerlugu suliaqarfigalugu.
Finn Gaarsmand nunani tamalaani suliniutini aqutsinermik aammalu assigiinngitsunik kultureqarlutik aaqqissuussaanerni annertoorujussuarmik misilittagaqarpoq, aammalu arlaleriarluni ilaatigut Egypten-imi, Tunesien-imi, Columbia-mi, Chile-mi, Spanien-imi, Tyskland-imi aamma Mexico-mi suliartorluni aallartitaasarsimalluni. Finn Gaarsmand ilaatigut tuluttut, tyskisut aamma spaniamiutut oqaluttarpoq.
”Louise Hasle aamma Finn Gaarsmand ingerlatseqatigiiffiup siulersuisuini ilaasortaalernissamik, taamaalillutillu Nuummi, Ilulissani aamma Qaqortumi mittarfiliassat piviusunngortinneqarnissaannut peqataanissamut, neqerooruteqarneq tigulluarmassuk Kalaallit Airports A/S-imi siulersuisut naammagisimaartorujussuuaat. Sanaartornermik suliassani taama annertutigisuni, suliassanut aningaasalersuutissanik pisariaqartunik pissarsiniarnermik aammalu suliassat ingerlanneqarnissaasa aqunneqarnerannut suliassanut, suliaqartussat misilittagaqartut piginnaaneqartullu pisariaqartinneqarput. Louise Hasle-p aamma Finn Gaarsmand-ip siulersuisuni ilaasortaalerneranni, tamarmik siulersuisut piginnaasaqarfiinik nukittorsaasuullutik, aammalu siulersuisut sinnerinut aammalu ingerlatseqatigiiffimmi ulluinnarni aqutsisunut isumasioqatissatut piginnaasaqarlutik sulisinnaasunik nutaanik marlunnik siulersuisuni ilaasortaqalersugut, misigisimavunga. Peqatigisaanik ingerlatseqatigiiffik sinnerlugu, piffissaq iluatsillugu Berit Koertz piffissami siulersuisuni ilaasortaanermini ingerlatseqatigiiffimmut pikkorilluni suliaqarsimaneranut qutsavigerusuppara", oqarpoq Johannus Egholm Hansen, siulersuisuni siulittaasoq.
***
Tusagassiuutitigut nalunaarut manna pillugu saaffigineqarsinnaavoq siulersuisunut siulittaasoq Johannus Egholm Hansen, oqarasuaat +45 2389 8008.