Kalaallit Airports A/S‐ip Nuummi, Ilulissani aamma Qaqortumi mittarfiliassanut suliassat suliaralugit ingerlatiinnarpai

Kalaallit Airports A/S‐ip ippassaq siulersuisuni ataatsimiinnermi ingerlatseqatigiiffiup ukiumoortumik nalunaarusiaa siulleq akueraat, aammalu Nuummi aamma Ilulissani 2018‐imi maajimi sanaartornermik suliassat neqeroortitsiviginissaasa piareersarneqarnerat ingerlatiinnassalugu aalajangerlugu.

Ukiumoortumik nalunaarusiaq 2016/2017

Ingerlatseqatigiiffiup piffissamut 2016‐imi juulip aallaqqaataaniit 2017‐imi decembarip 31‐anut (qaammatit 18‐it) ukiumoortumik nalunaarusiaa siulleq Kalaallit Airports A/S‐ip siulersuisuisa ippassaq akueraat.

Naatsorsuutit takutippaat, ingerlatseqatigiiffiup piffissami 54 millioner koruunit atorsimagai. Taakkunannga 10 millioner koruunit ingerlatsinermut atorneqarput, katillugit 44 millioner koruunit mittarfiliassanut suliassat ineriartortinneqarnerannut aningaasaliissutaallutik. Aningaasaliinerit imatut agguarsimapput:

• Suliassanut pingasunut tamaginnut suliassat akimorlugit, 10 mio. koruunit missai
• Nuuk, 10 mio. koruunit missai
• Ilulissat, 15 mio. koruunit missai
• Qaqortoq, 9 mio. koruunit missai

“Siulersuisut naatsorsuutit naammagisimaarluarpaat aammalu paasillugu Nuummi, Ilulissani aamma Qaqortumi mittarfiliassanut suliassat ineriartortinneqarnerat, ingerlatseqatigiiffiup pilersinneqarneraniilli, siuarsimasorujussuusoq, aammalu ingerlatseqatigiiffik aningaasanut aningaasaliissutaasunut annertuumik pissarsisimasoq. Tamanna immikkut ittumik suliniuteqarnissamik annertoorujussuarmik piumasaqaateqarfiusimavoq aammalu siulersuisut pisortat, sulisut suleqatillu Nuummi, Ilulissani aamma Qaqortumi sanaartornermik suliassat aallartinneqarnissaasa tungaanut suliassat siumut ingerlatinneranni peqataanerannut qutsavigaat”, oqarpoq Johannus Egholm Hansen, siulersuisunut siulittaasoq.

Suliassanik piareersaanerup ingerlaqqinnissaa

Kalaallit Airports A/S‐ip siulersuisui tamatuma saniatigut ippassaq aalajangerput, Nuummi aamma Ilulissani sanaartornermik suliassat 2018‐imi maajimi neqeroortitsivigineqarnissaasa tungaanut suliassanik piareersaalluni sulineq ingerlatiinnassallugu. Siulersuisut aamma aalajangerput taarsigassarsianik aningaasalersuinissamut atugassanik paasissutissanut najoqqutassanik suliaqarneq ingerlatiinnarniarlugu. Kiisalu siulersuisut aalajangerput mittarfissani pingasuni tamaginni illutassanik sanaartornissamut pilersaarusiornermi, taamatuttaaq 2018‐imi maajimi, siunnersuisartunik toqqaanissamut suliap ingerlanera ingerlatiinnarniarlugu. Tamatumani neqeroortitsinissamut tunngaviusut ilaasa aammalu aningaasalersuinissamut tunngaviusut Naalakkersuisunit aamma/imaluunniit Inatsisartut Aningaasaqarnermut Akileraartarnermullu Ataatsimiititaliaanit politikkikkut akuersissuteqarfigineqartussat, suliarinissaannut piffissamut pilersaarut ingerlatseqatigiiffiup attatiinnarpaa.

“Inatsisartunut qinersineq aammalu qinersereernerup kingorna Naalakkersuisunngortitsinissap tungaanut piffissaq Nuummi aamma Ilulissani sanaartornermik suliassat neqeroortitsivigineqarnerannut sunniissasut mattunneqarsinnaanngilaq, taamaalilluni Nuummi mittarfiliassap aallartinnissaa 2018‐imi oktobarimi pisussatut pilersaarutigineqartoq, kinguaattoorsinnaalluni. Kisiannili Ilulissani suliassat aallartinnissaannut aamma Qaqortumi suliassap neqeroortitsivigineqarnissaanut piffissamut pilersaarut qinersinermit sunnerneqassasoq naatsorsuutigineqanngilaq. Kalaallit Airports A/S‐ip 2018‐imut Aningaasanut inatsimmi tunngavissat Inatsisartunit akuerineqareersut aallaavigalugit, Nuummi mittarfiliassap aallartinnissaata kinguaattoornissaa pinngitsoortinniarsarissavaa”, oqarpoq Johannus Egholm Hansen, siulersuisunut siulittaasoq.