Nuummi Ilulissani Qaqortumilu mittarfinni illutassat nutaat
Tamakkiisumik siunnersortinik Piukkunnartorsiuvineq
Naliliisartut nalunaarusiaat
Illoqarfinni Nuummi, Ilulissani aamma Qaqortumi mittarfinnik nutaanik pingasunik pilersitsinikkut nunatsinni attaveqarneq nukittorsarniarlugu ineriartortinniarlugulu, Naalakkersuisut 2015-imi aalajangerput. Suliassap suliarineqarnissaanut Namminersorlutik Oqartussat Kalaalit Airports A/S, suliniutinik matuma siuliani taaneqartunik sanaartornissamik, piginnittuunissamik ingerlatsinissamillu siunertaqartoq, pilersippaat.
Suliassamut ilaatillugu, suliassanut ataasiakkaanut tamaginnut terminalip aamma sullissiviit illutassai nutaat pillugit tamakkiisumik siunnersuisartussanut unammisitsinermut, Kalaallit Airports A/S 2017-imi ukiaanerani, peqataaqqusivoq. Illutassat, mittarfinnik pingasunik taakkuninnga pilersitsinissamut suliassap tamarmiusup ilaatut ilaatinneqarput.
Ataatsimoortukkaat sisamat unammisitsinermut piukkunnartussarsiuussivigineqarput, taakkunannga pingasut Nuummut, Ilulissanut aamma Qaqortumut unammisitsinermi suliassanik tunniussillutik. Ataatsimoortukkaat ataatsit suliap ingerlanerani tunuarniarlutik aalajangerput. Peqataasunut piumasaqaataavoq, ilaatigut mittarfiit illutassaannik titartaanermik misilittagaqassasut. Maannakkut unammisitsinerup inernera pigineqalerpoq, aammalu naliliisartut nuannaarutigalugu oqaatigisinnaalerpaat, terminalip illutassaannut aaqqiissutissat atoruminartuunissaat, allanngortikkuminarnissaat malunnaateqartuunissaallu pillugit takorluukkat, illoqarfinnut pingasunut tamaginnut naammassineqartut.
Tulliuttuni unammisitsinermi suliat tamarmik, kommite-p naliliisussap siunnersuutinut ataasiakkaanut oqaaseqaatai ilanngullugit, allaaseralugit assiliatigullu saqqummiunneqassapput. Siunnersuutit neqerooruteqartunut ataasiakkaanut tamaginnut ataatsimoortillugit misissorneqarput, tassami suleqatigiiaat tamarmik illoqarfinnut tamaginnut ataatsimoorussamik najoqqutassamik aallaaveqarmata. Taamaaliornermi neqerooruteqartut suliniutaanni ataasiakkaani uteqattaarinerit arlallit pinngitsoorneqassapput. Naliliisartut aamma sanatitsisup, piffissaq iluatsillugu, peqataasut ataatsimoortukkaat suliniuteqarnerannut annertuumut aammalu siunnersuutaannut kusanartumik suliarineqarsimasunut qutsavigai.
