Kalaallit Airports A/S‐imi siulersuisut qinerneqaqqipput aamma Nuummi, Ilulissani Qaqortumilu mittarfiit illutassaannut siunnersortinik unammisitsinermi ajugaasoq toqqarneqarpoq

Kalaallit Airport A/S‐imi siulersuisut ingerlatseqatigiiffiup ulloq 15. maj ataatsimeersuarnerani qinerneqaqqipput. Johannus Egholm Hansen siulittaasutut aamma Peter Christiansen siulittaasup tulliatut ingerlaannarput.

Tamatuma saniatigut siulersuisut ataatsimiititaliaanni makkua ilaasortanngorlutik, siulersuisut inissitsiterput:

• Sanaartornermut ataatsimiititaliaq: Johannus Egholm Hansen, Finn Gaarsmand aamma Steffen Ulrich‐Lynge.
• Aningaasalersuinermut ataatsimiititaliaq: Johannus Egholm Hansen, Louise Hasle aamma Peter Wistoft.
• Ingerlatsinerup ineriartortinneqarneranut ataatsimiititaliaq: Peter Christiansen, Aviâja Lyberth Lennert, Jákup Sverri Kass aamma Peter Wistoft

Kalaallit Airport A/S‐ip ataatsimeersuareernerup kingunitsianngua tamakkiisunut siunnersortinik unammisitsinermi, Nuummi, Ilulissani aamma Qaqortumi mittarfissani mittarfiit illutassaasa sanaartornissaannut pilersaarusiorneq pillugu ingerlanneqartumi, ajugaasoq saqqummiuppaa. Immikkut naliliisartut amerlanerussuteqartunik arlaannaannulluunniit attuumassuteqanngitsunik ilaasortaqartoq, siunnersuutinik nalilersuivoq aammalu ajugaasumik toqqaallutik.

Mittarfinnut pingasunut tamaginnut unammisitsinermi ajugaasoq tassaavoq COWI A/S siunnersortit taassuma ataaniittussat Masanti A/S aamma Zeso Architects A/S peqatigalugit.

Mittarfiit illutassaannut siunnersuutit tiguneqartut ingerlatseqatigiiffiup nittartagaani, www.kair.gl, takuneqarsinnaapput aammalu ukiup ingerlanerani illoqarfinni pingasuni taakkunani, mittarfiit inissisimaffissaanni kiisalu Københavnimi Kalaallit Nunaata Sinniisoqarfiata allaffiani saqqummersinneqassallutik.

Kalaallit Airport A/S‐ip, ullut arlaqanngitsut ingerlaneranni sanaartugassanik pilersaarusiornissaq aammalu mittarfinni pingasuni tamaginni mittarfiit illutassaannut neqeroortitsinissamut najoqqutassanik suliaqarnissaq pillugu siunnersortimut isumaqatigiissutip COWI‐mut isumaqatiginninniutiginissaa, aallartissavaa. Siunertaavoq mittarfiit illutassaannik sanaartornissamut pilersaarusiorneq 2019‐imi apriilimi naammassereersimassasoq, taamaalilluni mittarfiit illutassaannut illuliortiternermi suliassat 2019‐imi maajimi neqeroortitsivigineqarsinnaalissallutik, aammalu 2019‐imi ukiaanerani suliassat aallartinneqarsinnaalissallutik.