Nuummi mittarfimmut suliniut pillugu nutaarsiassat kingulliit

Kalaallit Airports International A/S sanaartornerup nipiliornerata sakkortussusaanik malinnaalluinnarpoq

Kalaallit Airports International A/S (KAIR) maannakkut nipiliornermut uuttortaatinik sulinermi atorneqartartunik arfinilinnik, Nuummi mittarfik pioreersoq kaajallallugu ikkussuitsitsisimavoq. Nipiliornermik uuttortaanermut, Nuummi mittarfiup allineqarnerani sanaartornermi suliassanit nipiliornermut killissarititaasut nalinginik, pisortanit suliniummut piumasaqaatigineqarsimasunik qaangiisoqannginneranik uppernarsaanissaq siunertarineqarpoq.

ASN-imut akuersissummi piumasaqaatigineqarsimavoq, Nuummi mittarfiup sananeqarneranit sanaartornermi nipiliornermik pilersinneqartumik nakkutilliinermut pilersaarusiortoqarnissaa. Nakkutilliinermut pilersaarusiap siunertaraa, ASN-imut akuersissummit nipiliornermut killissarititaasut nalingisa eqqortinneqarnissaata qulakkeerneqarnissaa. KAIR siunnersorteqarfik suleqatigalugu nipiliornermut nakkutilliinissamut pilersaarummik suliaqarsimavoq, aamma taanna maannakkut Namminersorlutik Oqartussanik akuerineqarsimavoq. Tassunga ilanngullugu nipiliornermut uuttortaatit arfinillit, danskit suliffeqarfiutaannit EMS Brüel og Kjærimit pisiarineqarsimasut ikkussorneqarsimapput. EMS illoqarfimmi suliffeqarfiit Polar Teknik aamma Arssarnerit suleqatigalugit nipiliornermut uuttortaatut arfinillit ikkussorsimavaat, tamarmik maannakkut atulereersut

Nipiliornermut uuttortaatit nipiliornerup sakkortussusaanik, sanaartornermi suliat aallartinnginnerini uuttortaapput. Uuttortaanerit taakku atorneqassapput, ullumikkut nipiliornerup qanoq inneranut, sanaartornerup nalaani nipiliornermut pilersinneqartut naleqqiussinnaaniarlugit. Taamaalilluni sanaartornermi sulianit nipiliorneq naliliiffigineqarsinnaaqqullugu.

Nipiliornermi uuttortaatinit paasissutissat piffissami pineranni computerimi serverimut nuunneqassapput. Paasissutissat ingerlaavartumik nakkutilliinermut atorneqarsinnaapput, kisianni aamma nalunaarusianik suliaqarnermi atorneqarsinnaapput. Ataqatigiimmik aaqqissuussineq paasissutissanik katersisoq, saniatigut aamma killissarititaasut nalingi qaangerneqassappata, kalerrisaarinernik nassiussisinnaassaaq, taamaalilluni tamanna isumagineqarsinnaaqqullugu.

Sumiissusersiornermut antennamik (localizer) nutaamik ikkussineq

Kalaallit Airports International A/S-i Mittarfeqarfiit suleqatigalugit Nuummi mittarfiup eqqaani sumiissusersiornermut antenna (localizer) pisoqaq nutaamik ikkussisimavoq. Sumiissusersiornermi antenna (localizer) arfinilinnik antennartalik pisoqaq, 1979-imi ikkussorneqarsimasoq, pingasunngorneq septembarip sisamaani 2019-imi, ukiut 40-t ingerlareerluni qaminneqarpoq, sumiissusersiornermilu

antennamik (localizer) nutaamik 12-inik antennartalimmik, suliffeqarfimmit Indra Naviamit Norgemeersumit taarserneqarluni. Taanna atassuteqarnermik pitsaanerusumik tunisivoq, illoqarfimmi angallannermit aamma mittarfimmut qanittumi ingerlatanit sunneruminaannerusumik. Sanaartornermi killiffiup nalaani mittarfimmi timmisartut aalajangersimasumik tikittarnerat pitsaanerulerneranut tuniseqataassaaq.

Sumiissusersiornermi antennamik (localizer) taarsiineq illoqarfimmi suliffeqarfinnik arlalinnik qanimut suleqateqarluni ingerlanneqarsimavoq, ilagalugit:

• Siunnersuinermik Ingeniørit suliffeqarfiat Inuplan A/S, pilersaarusiornermik titartakkanillu suliaqarsimasoq.

• Grønlands skibs- og entreprenørværksted ApS, toqqaviit allilerneqarnissaannut sinaakkutinik sanasimasoq ikkussuisimasorlu.

• Nuuk Entreprenøren A/S, assaanermik toqqavilerinermillu suliaqarsimasoq.

• Godthåb Transportservice A/S, containerimik assartuinermik nuussinermillu suliaqarsimasoq.

• Royal Arctic Line A/S, Aalborgimit tuaviuussamik containerimik assartuisimasoq.

• Air Greenland A/S

Ukiut marluk qaangiuppata sumiissusersiornermi antenna (localizer) nutaaq piiaaqqinneqassaaq Qaqortumilu mittarfimmi atajuartussatut ikkussorneqarluni. Sumiissusersiornermut antenna (localizer) Trafik-, bygge- og boligstyrelsenimi (TBST) akuerisaavoq.

Erseqqissaanermi boksi:

- Sumiissusersiornermi antenna (localizer) mittarfimmi ILS-systemimut ilaavoq (Instrument Landing System, nutsernera: Sakkuutit atorlugit mikkiartornermi Systemi), radiup maligaasaanik nallarissunik marlunnik nassiussisartoq.

- Sumiissusersiornermi antenna (localizer) radiup maligaasaanik assigiinngitsunik marlunnik nassiussisarpoq, mittarfiup isuani 25 sømilit missaannit, timmisartup aquttuanut nalunaarutigalugu, mittarfiup qeqqani titarnermut naleqqiullugu timmisartoq sumiinnersoq. Sumiissusersiornermi antenna (localizer) aamma ersernerluttumi mikkiartornermi timmisartup aquttua ikiortarpaa.

- Antennat amerlanerit ikkussoqqatillugit nassiussat sakkortunerusarput. Nunanut assigiinngitsunut mittarferujussuit antennanik 48-t tikillugit atortarpaat, mikkiartorneq suli eqqorluarneroqqullugu.

Umiarsuup siulliup Nyborgimi aamma Hafnarfjordurimi usilersornerani assit

Assartuut BBC Lagos, Nyborgip umiarsualivianit ataasinngorneq 23. septembari aallarpoq, aamma pilersaarutigineqartutut Húsavikimi Hafnarfjordurimilu uneriarluni, umiarsuaq maanna maskiinanik atortussanillu sanaartornermi atorneqartussanik usilluni Nuummut ingerlaqqippoq.