Angallannermik allanngortiterineq: Illerngit 2001-imik matusineq

Nuummi mittarfiup nutaap sanaartorneqarneranut atatillugu aqqusineq Illerngit 2001, Borgmester Anniitap Aqqusernanit (Qinngorput eqqaani transformatoreqarfik) Air Greenlandip hangari 3-mi isaaffianut ingerlasoq, ataasinngorneq ulloq 18. novembari 2019-imit matuneqassaaq. Aqqusineq angallattunut tamanut matuneqassaaq biilertunut pisuttunut sikkilertunut il. Il. Aqqusinermik matusineq suliniummi killiffimmut siullermut ilaavoq, tassani aqquserngup ilaa, siunissami mittarfimmik aamma aallartarfimmik tikittarfimmillu inissaqartitsiniarluni allanngortinneqassaaq.

Aqqusineq assiaquserneqassaaq aamma Sisorarfinnut Sisorarfinnillu, inissiisarfimmut inissiisarfimmillu, Air Greenlandimut Air Greenlandimillu, mittarfimmut mittarfimmillu (Mittarfeqarfiit) taakkununngalu atortunut atasunut, taamaammat aqquserngit Siaqqinneq aamma Aqisseqarajooq aqqutigalugit angallanneq pisassaaq. Munck-gruppeni sapaatit akunneri aggersut ingerlaneranni, suliaqarfimmik killiliisumik ungalulersuissaaq. Nuup Bussii, bussinut aqqutigisaminnik 3-mik aamma X3-mik allanngortiterissapput, tamannalu pillugu sullitaminnut ingerlatseqatigiiffiup Facebookimi quppernera aamma nittartagaa aqqutigalugu paasissutissiissapput.

Innuttaasut ilaasa upalungaarsimanerup tungaatigut ernumanertik saqqummiussimavaat. Ernumanerlu peqqutissaqanngitsoq Nuummi upalungaarsimanermi pisortap oqaatigaa: ”Ukiuni aqqaneq marlunni Borgmesterip Anniitap Aqquserna atuunnerani ajoqutiginikuunngilarput, taamaammat mittarfiup aqqutaa matuneqarallarnera upalungaarsimanerup tungaatigut ernumanartussatut isiginngilarput” upalungaarsimanermi pisortaq Knud Petersen oqarpoq