Ikiumut angusat aamma aqutsisuusussat marts 2019
Ukiumut angusat aamma aqutsisuusussat Kalaallit Airports Holdingimut ukiumut nalunaarusiaq siulersuisunit akuerineqaqqammerpoq aamma nalinginnaasumik ataatsimeersuarnermi ulloq 7. maj 2019 akuerineqartussanngorlugu innersuussissutigineqarpoq.
Angusat missingersuutinik malittarinnipput, aamma Ilulissani Nuummilu nunanut allanut mittarfiit aningaasaliiffigineqarnissaat pillugu, Danskit Naalagaaffiannik isumaqatigiissuteqarnerup kinguneranik, suliffeqarfik aaqqissuussinermi nutaami mittarfiit allilerneqarnissaannut atatillugu suliassat isumaginissaannut piareersimavoq.
Kalaallit Airportsimi siulersuisut 2018-imut naatsorsuutit akuerisimavaat. Ingerlatsinermi angusat 9,5 mio. kr.-mik amigartooruteqarput. Taakku 2017-imut naleqqiullugu minnerulaarput, tassani amigartoorutit 10,1 mio. kr.-iusimapput. Angusat missingersuutinut aamma naatsorsuutigineqartunut assingupput.
Ingerlatseqatigiiffimmi namminerisamik aningaasaatit taamaalillutik ukiup naanerani 180 mio. kr.-iupput, Namminersorlutik Oqartussanit 100%-imik pigineqartumi.
Nutaamik aaqqissugaaneq aningaasaliinernik sanaartortitsinernillu tunngavilersuipput
Ukiumut nalunaarusiaq 2018-imik nalunaajaavoq, kisianni pissusissamisoortumik annertuumik siunissamut sammivoq, tassa ingerlatseqatigiiffiup aaqqissugaanera januaari 2019-imi aningaasaliinermut isumaqatigiissutigineqartumut naleqqussarneqarmat, tassani Danskit Naalagaaffiat aningaasaleeqataavoq aamma Nuummi Ilulissanilu mittarfinnik piginneqataalerpoq, massa Qaqortumi mittarfik taamaallaat Kalaallit Nunaannit aningaasaliiffigineqartussaasoq pigineqarlunilu:
- Suliffeqarfissuaq Kalaallit Airports Holding A/S, suli Namminersorlutik Oqartussanit 100%-imik pigineqassaaq
- Suliffeqarfiutigineqartoq Kalaallit Airports Domestic A/S, Qaqortumi mittarfissaq nutaaq ingerlattissavaa aamma Kalaallit Airports Holdingimit 100%-imik pigineqarpoq
- Suliffeqarfiutigineqartoq Kalaallit Airports International A/S, Danskit Naalagaaffiannit 1/3-imik pigineqarpoq aamma 2/3-imik Kalaallit Airports Holdingimit.
Piviusumi, sanaartornerup nalaani ingerlatseqatigiiffinnut pingasunut tamanut, suleqatit taakkuuinnassapput: Suliffeqarfissuarmi atorfeqarlutik, aamma suliffeqarfiutigineqartuni marlunni, ingerlatseqatigiiffinni immikkut, sulinerminni akilerneqartarlutik.
Pisortaaneq (CEO) atorfinitsitaasoq – nutaamik suliniummut pisortaqalissaaq
Peter Wistoft, aningaasaqarnikkut pisortaasimasoq, qullersaqarfimmilu aggusti 2017-imiilli ilaasimasoq aamma Steffen Ulrich-Lynge soraarmalli pisortaanerugallarsimasoq, siulersuisunit siunissami Kalaallit Airportsimi pisortaanertut (CEO) siulersortussatut qinerneqarsimavoq. Ilutigalugulu ingerlatseqatigiiffik suliniutinut pisortamik nunani allani misilittagaqarsimasumik pissarsiorpoq, sanaartorluni suliniutinik, suliassinneqartartunut suleqateqarnermik, pisortanik, innuttaasunik, atuisunit il. il. aqutsisussamik, aamma qullersaqarfimmut ilannguttussamik, taamaalillunilu marlunnik inuttaqaqqilerluni.
Siulersuisut siulittaasuat Jóhannus Egholm Hansen oqarpoq: ”Peter Wistofti ulluinnarni ingerlatsinermi siulersortoralugu, atajuarnermik, sumiiffimmi ilisimasaqarnermik aamma aningaasaqarnikkut piginnaaneqarnermik katiterinermik pitsaanerpaamik kissaatigisinnaasatsinnik pissarsivugut. Aamma aasap ingerlanerani inummik sanaartornermi suliniutini annertuuni misilittagartuumik atorfinitsitsisoqarpat, siunissami suliassamut annertuumut katiterineq taamaattorpiaq pisariaqartoq angussavarput.”
Suliaq aallartereerpoq
”Takorluukkat piviusunngortinniarlugit aallarteruttorpugut”, oqarpoq Jóhannus Egholm Hansen: ”Aamma ilisimavarput, suliassanik suliassinneqartartut piukkunnartussarsiarineqarsimasut annertoorujussuarmik sulisoqartoq, taakku neqeroorutigisartik 2019-imi maajip qeqqani tunniuttussaavaat. Qilanaaraarput, suliassap qanoq pitsaanerpaamik suliarineqarnissaattut aamma qanoq akilimmik isumaqarnerisa takunissaannut”, taama oqaaseqarpoq.
Pisarnertut ataatsimeersuarneq ingerlanneqassaaq 7. maaji 2019. Tamanna pisinnagu naatsorsuutigineqarpoq immikkut ataatsimeersuarnermik ingerlatsisoqarnissaa, Kalaallit Airports Internationalimi siulersuisut naleqqussarniarlugit, tassani Danskit Naalagaaffiat isumaqatigiissut malillugu ilaasortanik marlunnik toqqaassapput.
Apeqqutaasinnaasut apeqqutigeqquneqarput uunga Peter Wistoft oqarasuaat +299 55 06 35 imaluunniit +45 25 42 40 33, mail: peter@kair.gl