Sanaartorluni sulianut neqeroorutinut piffissarititaq maajip naaneranut sivitsorneqarpoq

Kalaallit Airportsip neqerooruteqartut, Nuummi Ilulissanilu mittarfinnut sanaartorluni sulianut neqeroorutiminnik naammassinninnissaannut suli sapaatip akunnerinik marlunnik tunivai. Piffissarititat aamma killigititat sinneri allannguuteqanngillat.

Kalaallit Airports Internationalip suliassanik suliassinneqartartut piareersaataasumik piukkunnartutut nalilerneqarsimasut nalunaarfigisimavai, neqeroorutinik tunniussinermut piffissarititaq 15. maajimit 31. maajimut 2019 nuunneqarsimasoq.

"Neqerooruteqartut piffissamik sivisunerusumik tunineqarnissamik qinnuigisimavaatigut, taamaalillutik neqeroorutertik sapinngisamik naammattumik najoqqutaqarlutik tunngavilerumallugu", taama oqaluttuarpoq Peter Wistoft, pisortaaneq, nangillunilu: "Tamanna tusarnaarniarlugu qinersimavarput, tassami uagutsinnut neqerooruteqartunullu pingaarluinnarpoq, neqeroorutit tamarmik tatiginartuunissaat, suliarilluarsimanissaat aamma tamakkiisumik uppernarsarsimanissaat – taamaammat neqerooruteqarnermut piffissarititaq sapaatit akunneri marluk sinnilaarlugit sivitsorparput."

Kinguartitsineq neqerooruteqartunut tamanut atuuppoq, aamma suliarineqarnerinut piffissamut pilersaarummut imaluunniit taassuma saniatigut pissutsinut allanut sunniuteqassanngilaq.

Suli allanik paasissutissat Peter Wistoft, oqarasuaat +299 55 06 35 / +45 25 42 40 33, mail: peter@kair.gl