Kalaallit Airports-imi aqutsisuni allannguutit
Kalaallit Airports suliffeqarfissuarmi suliffeqarfiit pingasuusut Kalaallit Airports Holding A/S, Kalaallit Airports Domistic A/S, aammalu Kalaallit Airports International A/S ulloq 7. Maj 2019 nalinginnaasumik ataatsimeersuarput.
Danskit Naalagaaffiata mittarfinnik aningaasaleeqataanissaanik isumaqatigiissuteqarnerup malitsigisaanik naalagaaffiup Kalaallit Airports International A/S-imi siulersuisuni ilaasortassanik marlunnik toqqaanissamik pisinnaatinneqarneranut atatillugu Naaalakkersuisut tassunga peqatigitillugu aammattaaq aalajangiussimavaat Kalaallit Airports Holding A/S-imi kiisalu Kalaallit Airports Domistic A/S-imi siulersuisuni ilaasortat amerlassusaat ikileriaateqartinneqassasut tamatumani Naalakkersuisunit Kalaallit Airports International A/S-imi siulersuisunut ilaasortatut toqqarneqartut siulersuisuni pingasuusuni tamani ikkusimasussanngortinneqassasut.
Taamaasilluni Louise Hasle aammalu Peter Christiansen suliffeqarfinni pingasuusuni siulersuisuni ilaasortaajunnaassapput.
”Siulersuisuni ilaasortaajunnaartut marluk suliffeqarfiup aallarnisarneqarnerani mittarfissanillu suliniutit ullumikkut killiffigiligaani suliassanik kivitsinerni annertuumik sunniuteqarput. Louise Hasle suliniutinik aningaasaliinernik ilisimasaqarluinnarnini aallaavigalugu pingaaruteqaqisumik aningaasaliissutissanik suliniuteqarnissani maanna naammassineqarlutik inissinneqaleriartortuni sunniuteqarpoq, aammalu Peter Christiansen taamatuttaaq suliffeqarfiup aallarnisarneqarneraniit Kalaallit Nunaanni mittarfinnik ingerlatsinernik annertuumik ilisimasaqarluarnini aallaavigalugu annertuumik suliaqarpoq. Taamaammat suliaqarnerinut qujassutissaqaqaanga”, siulersuisuni siulittaasoq Jóhannus Egholm Hansen oqarpoq.
Siulersuisuni ilaasortat sisamaasut sinneri Kalaallit Airports Holding A/S-imiittut aammalu Kalaallit Airports Domistic A/S-imiittut qineqqinneqarput, taamaasillunilu siulersuisuni ilaasortaasut tulliuttutut ima inissisimalerput:
• Jóhannus Egholm Hansen (Siulittaasoq)
• Aviâja Lyberth Lennert
• Jákup Sverri Kass
• Finn Gaarsmand
Taamatuttaaq Kalaallit Airports International A/S-imi ataatsimeersuartoqarpoq. Ataatsimeersuarnermi siulersuisunik toqqarneqarput suliffeqarfinnik piginneqataasumi siulersuisuni ilaasortaasut sisamat ilaasortaareersut, tamatumani danskit naalagaaffianit siulersuisuni ilaasortassat toqqarneqartut marluk ilanngullugit.
Kalaallit Airports International A/S-imi siulersuisuni ilaasortatut naalagaaffimmit toqqarneqartut marluk tassaapput:
• Merete Eldrup
• Marlene Haugaard
Merete Eldrup, TV2-mi ukiorpassuarni pisortaavoq, siulersuisuni sulinermik annertuumik misilittagaqarpoq, ilaatigut realkredit-eqarnermik suliani, ingeniørbranche-mi aammalu tusagassiuteqarnikkut.
Marlene Haugaard, entreprenørvirksomhed-imi NCC (Danmark)-imi Senior Vice President-iuvoq sanaartornermilu suliassaqarfimmi annertuumik misilittagaqarluni, assersuutigalugu soorluttaaq Københavns Lufthavn-imi siulersuisuni ilaasortaalluni.
”Inuit marluk taama misilittagaqarluartigisut naalagaaffiup siulersuisuni ilaasortassatut toqqarnissai qinersimammagu nuannaarutissaavoq, mittarfeqarfissanik suliuniummimi suliassat ingerlateqqinneqarnissaani sulianik kivitseqataasinnaassammata, uangalu aammalu siulersuisuni ilaasortaasut sinnerisa toqqarneqartut suleqatiginissai qilanaareqaarput”, siulersuisuni siulittaasoq Jóhannus Egholm Hansen oqarpoq.
Kalaallit Airports-imi qullersaqarfimmi kiinnat nutaat
Nuummi Ilulissanilu sanaartornerup aallarnisarneqarnissaanut piareersarnissanut atatillugu, Kalaallit Airports Holding A/S-ip siulersuisuisa ilanngullugu aalajangiuppaat suliffeqarfiup qullersaqarfia ilaasortanik pingasunik ilaneqassasoq, taamaasilluni qullersat ima isikkoqalerlutik pisortat qullersaralugu Peter Wistoft, suliniutinik pisortaq Johannes Ehmanns aammalu suliniutinik pisortap tullersortaa Avijaaja Karlshøj Knudsen.
Johannes Ehmanns, Tyskland-imeersuuvoq Köln-imit, ingeniør-itut ilinniagaqarpoq, immikkut mittarfiit pillugit ilisimasaqarluni, teknisk konsulent-itut piffissami sivisuumi suliaqarnikuulluni, aammalu Afrika, Rusland, Mellemøsten, Asien kiisalu Sydamerika-mi suliniutinik aqutsisutut suliaqarnikuulluni.
”Johannes Ehmanns nunani tamalaani misilittagaqarnini aallaavigalugu tassarpiaavoq Kalaallit Airports-ip misilittagaartoq nassaarissallugu kissaatigisimasaa. Taannaavormi mittarfissanik iluarsartuussilluni pilersaarusiornissani, sanaartornissani aammalu ingerlatsilertuilernissani nunarsuarmi sumi tamani pissutsit eqqarsaatigineqarsinnaasuni assigiinngilluinnarfiusinnaasuni misiligittaqartoq, tamatumani aamma Sibirien-imi, aammalu tamatuma saniatigut immikkut ittumik qaffasissumik mittarfinnorpiaq tunngasunik ilisimaqartuulluni”, Kalaallit Airports-imi siulersuisuni siulittaasoq Jóhannus Egholm Hansen oqarpoq. Johannes Ehmanns ulloq 1. juni 2019 atorfinissaaq Nuummilu inissisimassalluni.
Johannes Ehmanns-ip atorfininneranut atatillugu aammattaaq ilanngullugu Aviaaja Karlshøj Knudsen, arkitekt-itut ilinniagaqartoq, aammalu Kalaallit Airports-imi suliniutinik pisortatut ukioq 2017-imili atorfeqartoq, suliffeqarfiup qullersaani suliniutinik pisortap tullersortaatut atorfinissaaq, ilaatigut akisussaaffigissallugit peqqissutsimut sillimaniarnermullu tunngasut, pitsaassutsimik qulakkeerinissat, Kalaallit Nunaanni pisortaqarfinnik tunngasut, iluarsartuussinermik pilersaarusiornerit akisussaaffigiinnassallugittaaq kiisalu mittarfiup illutassaasa suliariumannittussarsiuunnissaani akisussaaffik.
”Qullersani Aviaaja Karlshøj Knudsen suleqataanerani suliniummut tunngassuteqartunik aammalu Kalaallit Nunaanni pissutsinik annertoorujussuarmik ilisimasaqarluartumik sulisinnaasuseqartoqarpugut”, Jóhannus Egholm Hansen oqarpoq, nangillunilu;”Suliffeqarfiup ulluinnarni aqunneqarnissaani taama nukittutigisunik aqutsisussanik toqqaanerit siulersuisut nuannaarutigaat, Nuummilu Ilulissanilu entreprenørinit neqeroorutissanik tigooraalernissaq pissangalluni utaqqissavaa, neqeroorutit kingusinnerpaamik ulloq 31.maj 2019 tiguneqareersimassapput, sanaartornissallu naatsorsuutigineqarlutik september 2019 aallarnerneqassasut.”
Ulloq ataatsimeersuarfiusoq sioqqullugu danskit naalagaaffiata suliniutissani aningaasaleeqataanissaata isumaqatigiissuteqarfigineqarneri naammassillugit inaarsarneqarput, mittarfissanullu naalagaaffiup aningaasaliissutissaanit aningaasaliissutit siulliit tunniunneqarput. Tassungalu peqatigitillugu Kalaallit Airports International A/S-ip Nuummi Ilulissanilu mittarfeqarfissanut sumiiffiit areal-inut pisinnaatitaaffiit MIttarfeqarfinniit 38 mio. kr.-ilerlugit tiguaat, soorluttaaq suliniutissanut pisinnaatitaaffiit tamakkivillugit mittarfinnut Nuummi, Ilulissani aammalu Qaqortumi Kalaallit Airports Holding A/S-imit Kalaallit Airports International A/S-imut kiisalu Kalaallit Airports Domestic A/S-imut tunniunneqartut. Aammattaaq naatsorsuutigineqarpoq attartornissamut isumaqatigiissut Den Nordiske Investeringsbank-i peqatigalugu ukioq 2019-imi maj-imi isumaqatigiissuteqarfigineqarsinnaanissaa.
******
Tusagassiutikkut nalunaarut una pineqartoq pillugu siulersuisuni siulittaasumut saaffiginnissutigineqarsinnaavoq, Johannus Egholm Hansen, oqar. +299 55 06 31 imal +45 2389 8008.