Maannamut qujanaq aammalu tikilluaqquarput...

Kalaallit Airports Holding A/S-ip ilinniarluni sungiusartussaq suli alla tikilluaqquaa.

Aasaanerani sulinngiffeqareernerup kingorna Kalaallit Airports Holding A/S-ip ilinniarluni sungiusartussaq suli alla tikilluaqqussavaa. Malik Vahl Rasmussen Qaqortumeersoq 2016-imili issittumi ingeniøritut ilinnialersimavoq, siullermik Sisimiuni ARTEK-imi, tamatumalu kingorna Lyngby-mi DTU-mi, maannakkorpiarlu Malik-up Trondheim-imi Norges Teknisk- Naturvidenskabelige Universitet-imi paarlaasseqatigiilluni semesteri ataaseq naammassileruttorpaa.

Malik Vahl Rasmussen oqaluttuarpoq meeraallunilu qulimiguulimmi timmisartortartunngornissani takorlooqqaaraluarsimallugu, kisianni annikitsumik qalipaatinik ilisarinnissinnaannginnerup taamatut takorluugaqarnera unitsissimagaa. Tamatumunnga taarsiullugu, Kalaallit Nunaata oqaluttuarisaanerani sanaartornermut suliassat annersaanni – tassalu Nuummi, Ilulissani aamma Qaqortumi mittarfissat nutaat - ilinniarnermini sungiusarnini atorlugu, timmisartornermut aammalu timmisartumik angalanermut soqutiginninnerminik aallussinissamut maannakkut periarfissaqalerpoq.

Inuusuttortatta ilinniarnerminni mittarfiliassanut suliassani sulinissamut soqutiginninnerujussuat, Kalaallit Airports Holding A/S-imi nuannaarutigaarput, oqarpoq pisortaaneq Peter Wistoft nangillunilu; ilinniarnermini sungiusartoq siulleq Povl Emil Rosing Olsen, DTU-mi pilersaarusiorneq aamma attaveqaqatigiinneq immikkut sammillugu Issittumi ingeniøritut ilinniarnini naammassisussaallugu, aasaanerani sulinngiffeqareernerup kingorna atuariartoqqittussaq, nuannaarutigisorujussuusimavarput.

Povl-Emil ilinniarnermini sungiusarnermi ingerlasimanera pillugu oqarpoq; ”Kalaallit Airports Holding A/S-imi qaammatit tallimat nuannerluinnarput, tassani suleriaatsit, soqutigisaqartut aammalu suliassani pilersaarusiornerup/aqutsinerup akornanni ataqatigiissaarinermi suliatigut annertuumik paasisimasaqalerpunga.

Meeqqat atuarfianni atuareernerma kingorna ingeniørinngornissara takorluulersimavara, piffissap ingerlanerani issittumi ingeniøritut ilinniarneq pissaganartilersimallugu. Ilinniarnerup ilarujussua nammineq nunagisami, Kalaallit Nunaanni, ingerlanneqarsinnaavoq. Tassani taanna Issittumi toqqavilersuinerup, suliniutinik aqutsinerup sanaartornerullu iluanni immikkut piginnaasaqalersitsivoq.

Sungiusarnerup ingerlanerata København-imi ilinniarnerma naammassinissaanut suli annertunerusumik pilerilersippaanga, tassanimi semesterit marluk kingulliit naammassisussanngorpakka. Suliniutinik aqutsineq, suliffeqarfimmi ingerlatsineq aamma aqutsineq annertuumik soqutigisaraakka aammalu siunissami MBA Arctic ilinniarnissaa takorluugaralugu.”

Kalaallit Airports A/S-imi Povl Emil semesterini kingullerni sulilluarnissaanik kissaapparput peqatigisaanillu uagutsinni suliniuteqarneranut qutsavigalugu. Malik aggustimi suleqatigilernissaanut qilanaarpugut.