Ilulissani Nuummilu Mittarfinnut suliniutit suliarineqalerput

”Ukiut pingasut sakkortuumik piareersarluni sulinerup kingorna, Nuummi Ilulissanilu mittarfinnut suliniutit suliarineqalerput, Kalaallit Airports A/S-ip siulersuisui ippassaq ataatsimiinnerminni aalajangerput, Ilulissani Nuummilu mittarfinnik taakkununngalu atasunik aqqusinernik il. il. sanaartornermi suliassat, qallunaat ingerlatseqatigiiffiannut Munck Gruppen A/S-imut tunniunniarlugit,” taama oqaaseqarpoq pisortaaneq, Peter Wistoft.

Sanaartornermik suliat aallartilerput

Kalaallit Airports International A/S suliassanik suliassinneqartartunit pingasunit neqeroorutinik tigusaqarsimapput:

• BAM International bv. (Holland)

• Munck Gruppen A/S (Danmark)

• Pennecon Dexter Joint Venture (Canada)

Neqeroorutit tunniunneqartut tamarmik pitsaalluinnartuusimapput. Ingerlatseqatigiiffiup neqeroorutinik ataatsimut nalilersuineranik tunngaveqartumik, siulersuisut aalajangersimapput mittarfinnut marluusunut isumaqatigiissut Munck Gruppen A/S-imut tunniunniarlugu, taakku ataatsimut isigalugu neqeroorummik pitsaanerpaamik tunniussaqarsimapput.

Isumaqatigiissutip annikitsortai inissinniarlugit juuli 2019-ip ingerlanerani isumaqatigiinniutigineqassapput, isumaqatigiissutit Nuummi aggusti 2019-imi atsiorneqarnissaat siunertaralugu. Munck Gruppen A/S taamaattoq, suliat aallarnersaataasut pisariaqartut suliaralugit maannakkut aallartereerpoq, soorlu avatangiisinut pilersaarummik, piffissamut pilersaarummik annikitsortaanik ilanngussisumik, aallartitsinissamullu pilersaarusiornermik suliat, aamma 2019-imi ukiakkut mittarfinni marluusuni aallarnersaataasumik sanaartornermi suliat piviusut aallartinneqassapput.

Naammassisaqarsinnaaneq aamma aallartitsinissaq sapinngisamik pitsaanerpaajutinniarlugu, aallaqqaammut suliap annertussusaa Nuummi aallunneqarnerpaassaaq, 2020-milu upernaap ingerlanerani, assinganik Ilulissani sanaartornermi suliat annertusarneqassapput.