Uunga

Naalakkersuisut Siulittaasuat aamma

Ineqarnermut Attaveqaqatigiinnermullu Naalakkersuisoq

Aningaasaqarnermut ministereqarfik

Københavnnimi, 13 august 2019

Isumaqatigiissutip imarisai aamma mittarfiliassani aningaasaqarnermut aammattaarlu inuiaqatigiit aningaasaqarnerannut sunniutaasussat pillugit ataatsimiititaliaq ilisimatinneqariinngippat, entreprenørimut ajugaasumut, Munck Gruppen A/S-imut isumaqatigiissut atsiorneqassanngitsoq, Naalakkersuisut Kalaallit Airports A/S nalunaarfigissagaat piumasaralugu Aningaasaqarnermut Akileraartarnermullu Ataatsimiititaliap, Aningaasaqarnermut Akileraartarnermullu Ataatsimiititaliap Naalakkersuisut Siulittaasuannut aamma Ineqarnermut Attaveqaqatigiinnermullu Naalakkersuisumut allakkiaata 9. august 2019-imeersup assilinera tiguara.

Ingerlatseqatigiiffinnut inatsisinut tunngatillugu oqaaseqaatit
Aallarniutigalugu Kalaallit Airports A/S International A/S sinnerlugu erseqqissassavara, ingerlatseqatigiiffinnut inatsisit atuuttut naapertorlugit aktiaatileqatigiiffiup siulersuisui ingerlatseqatigiiffimmi aktiaatilinnit peqqussutinik malinnittussaatitaanngimmata, kisianni taamaallaat ingerlatseqatigiiffinnut inatsimmi aalajangersakkat aamma ingerlatseqatigiiffimmut malittarisassat malittussaallugit. Kisiannili ingerlatseqatigiiffimmi aktiaatillit ingerlatseqatigiiffiup ataatsimeersuarnerani piginnaatitaaffimminnik atuisussaallutik.

Tamatuma saaniatigut ingerlatseqatigiiffik Munck Gruppen A/S-imut isumaqatigiissummi peqataasoq tassaammat Kalaallit Airports International A/S, aammalu Naalakkersuisut ingerlatseqatigiiffimmi toqqaannartumik aktiaateqartuunngimmata, taamaattumillu Aningaasaqarnermut Akileraartarnermullu Ataatsimiititaliaq imaluunniit Naalakkersuisut ingerlatseqatigiiffiup siulersuisuinut peqqusinissamut piginnaatitaaffeqanngimmata, eqqaasitsissutigisariaqarpara, takuuk ingerlatseqatigiiffiup ilusiligaanera manna:

Kiisalu eqqaasitsissutigissavara Kalaallit Airports International A/S-imi aktiaatillit tassaammata Kalaallit Airports Holding A/S aammalu danskit Naalagaaffiat, aammalu ingerlatseqatigiiffimmi siulersuisut aktiaatilinnit ataasiakkaanit, imaluunniit Inatsisartut Aningaasaqarnermut Akileraartarnermullu Ataatsimiititaliaannit peqqussutinik akuersaarnissamut periarfissaqanngimmata.

Kalaallit Airports Holding A/S-ip aamma danskit Naalagaaffiata imminnut atassuteqarnerat Kalaallit Airports International A/S-imut piginnittut isumaqatigiissutaanni illuatungeriit akornanni atsiorneqareersumi maleruagassiivigineqarpoq. Taamaalilluni Naalakkersuisut imaluunniit Aningaasaqarnermut Akileraartarnermullu Ataatsimiititaliaq ingerlatseqatigiiffiup aqutsisuinut sunilluunniit malitassiinissaq kissaatigippassuk (aammalu taamaaliorsinnaallutik), tamanna Kalaallit Airports Holding A/S aqqutigalugu aammalu Kalaallit Airports Holding A/S-ip aamma danskit Naalagaaffiata akornanni piginnittut isumaqatigiissutaanni atugassarititaasunut tamakkiisumik naapertuuttumik pisariaqarpoq, tassami siulersuisut oqaatigineqareersutut aktiaatilinnit ataasiakkaanit peqqussutigineqartut malinnissaannut ingerlatseqatigiiffinnut inatsisitigut imaluunniit malittarisassatigut inatsimmi tunngavissaqanngimmata.

Pissutsit allat
Munck Gruppen A/S-imut sanatitsisup aamma sanaartortussap isumaqatigiissutaasa imarisai aammalu mittarfiliassani aningaasaqarnermut aammattaarlu inuiaqatigiit aningaasaqarnerannut sunniutaasussat paasissutissiissutigineqarnissaannik kissaateqarneq pillugu Aningaasaqarnermut Akileraartarnermullu Ataatsimiititaliamit oqaaseqaatinut tunngatillugu, qulequttat ataasiakkaat matuma kingulianiittut ataanni oqaaseqaatit innersuussutigineqarput.

Taamaattoq aallarniutigalugu oqaatigineqassaaq, ingerlatseqatigiiffiup piginnaatinneqarnera malittarisassani aammalu Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisaat nr. 4, 22. november 2018-imeersumi (”sanaartornermut inatsit”) aalajangersagaammat. Munck Gruppen A/S-imut sanatitsisup aamma sanaartortussap isumaqatigiissutaannik ingerlatseqatigiiffiup isumaqatigiissuteqarnerani ingerlatseqatigiiffiup piginnaatitsissut Inatsisartunit akuerineqartoq avaqqunneqanngilaq imaluunniit avaqqunneqassanani.

Isumaqatigiissutip imarisai pillugit
Isumaqatigiissutip imarisai pillugit paasissutissinneqarnissaq kissaatigineqartoq pillugu Aningaasaqarnermut Akileraartarnermullu Ataatsimiititaliaq qanoq isumaqarnersoq paasinanngilaq. Isumaqatigiissutinut tunngavissat neqeroortitsinermut najoqqutassani, neqerooruteqartut neqerooruteqarnerminni tunngavigisaanni, ilaapput, aammalu tassaallutik isumaqatigiissutinut (inatsisitigut) tunngasut aammalu teknikkimut tunngasut (immikkoortunut nassuiaatit il.il.). Sanatitsisup aamma sanaartortussap isumaqatigiissutai nalinginnaasut AP95-imik aallaaveqartut tassani pineqarput, Kalaallit Airports International A/S-ip neqeroortitsinermut najoqqutassani aalajangersarsimasai allaassutaallutik, aammalu pisuni tamaginni Kalaallit Airports International A/S-imut iluaqutaasussanik allaassuteqarluni.

Munck Gruppen A/S-imut isumaqatiginninniarnerit nalaanni isumaqatigiissutinut tunngavissat aammattaaq annikinnerusunik iluarsineqarput.

Ataatsimoorlutik isumaqatigiissutit inatsisinut tunngasortai aamma teknikkimut tunngasortai allakkiaapput hunnorujunik arlalinnik qupperneqartut, naatsumik nassuiaanermi eqikkarneqarsinnaanngitsut, AP95, Kalaallit Nunaanni inatsisit, aamma isumaqatigiissitsiniartarneq malinneqartussaallutik sanatitsisup aamma sanaartortussap isumaqatigiissutaa pingaarneq nalinginnaalluinnartoq tassani pineqartoq oqaatigineqaannarsinnaalluni.

Mittarfiliassani aningaasaqarnermut sunniutaasussat pillugit
Aamma tassani mittarfiliassani aningaasaqarneq Aningaasaqarnermut Akileraartarnermullu Ataatsimiititaliap qanoq isumaqartinneraa paasinanngilaq.

Taaguummi ”mittarfiliassani aningaasaqarneq” sanaartornermut aningaasartuutissarpiaat innersuussutigineqarsimappata, makkua oqaatigineqassapput:

• Aningaasartuutissanut missingersorneqaqqaartut kr. 3,6 mia (2017-imi januaarimi akigititat) nalorninartortaqartut, Kalaallit Airports-ip aallaqqaataanilu erseqqissarpaa, tassami suliap pissusissamisoornerani aningaasartuutinut missingersuinerit taamaallaat tassani pineqarmata. Ingerlatseqatigiiffiup tamanna tunngavigalugu, sanaartornissamut inatsit naapertorlugu maannamut Namminersorlutik Oqartussanit kr. 2,1 mia., aammalu danskit Naalagaaffiannit kr. 1,6 mia., katillugit kr. 3,7 mia. aningaasalersuinissamut tamarmiusumut qulakkeerpai

• Aningaasartuutissanut missingersorneqaqqaartut kr. 3,6 mia. 2017-imi januaarimi akigititat malillugit naatsorsorneqartut, taamaattumillu 2023-imi sanaartornerup naammassinissaata tungaanut piffissamut aningaasartat nalinginnaasumik akinut iluarsineqartussaasut, taamatuttaaq Kalaallit Airports-ip aallaqqaataanilu erseqqissarpaa.

Avatangiisinut piumasaqaatit aammalu qaartiterutissanut toqqorsivimmik pilersitsinissamut aningaasartuutit qaffasikkaluartut, taakkua marluusut suliassamut akitsorsaataasimallutik, sanaartornermut akigititaq Munck Gruppen A/S-imut isumaqatigiissutiginissaa anguneqarsimasoq, aningaasartuutissanut missingersorneqaqqaartunut killissaliussat iluarsisat iluaniitinneqartut, oqaatigineqassaaq.

Kisiannili ingerlatseqatigiiffik sanaartornermut aningaasartuutinut aningaasalersuutissanik annertunerusunik pisariaqartitsilissagaluarpat, aningaasalersuinissamut pisariaqartitsinerup taamaattup aktiaatilinnit aningaasaatinut aannertunerusunik akiliuteqartitsinani, taarsigassarsinikkut aningaasalersorneqarnissaa ingerlatseqatigiiffiup siunertaraa. Ullumikkut annertussusiliussanut sanilliullugu ilaasunut akitsuutit qaffanneqartussaassanatik aammalu Nunap karsia nammakkersornagu, ingerlatseqatigiiffik ajornartorsiutitaqanngitsumik minnerpaamik kr. 500 mio.-inik akiitsoqqissinnaasoq sullissisinnaasorlu, ingerlatseqatigiiffimmi ingerlatsinermut aningaasaqarnikkut misissueqqissaarnerup taamaalilluni takutippaa.

Tassunga atatillugu eqqaamaneqassaaq, ingerlatseqatigiiffiup tamanna pisariaqartilissagaluarpagu, taamaattoq Naalagaaffimmit annertunerusunik aningaasalersuinissamut taamaattumut qularnaveeqqusiisoqarani, naalagaaffimmit appasissumik ernialinnik annertunerusunik taarsigassarsititseqqinnissamut danskit Naalagaaffiat akuersaartumik isummertoq, Namminersorlutik Oqartussat aamma danskit Naalagaaffiata akornanni isumaqatigiissummi isumaqatigiissutigineqarmat.

Taamaalilluni sanaartornermut aningaasartuutit aningaasalersuutissanut ingerlatseqatigiiffiup pissarsiarisimasaannut aammalu tamanna pisariaqartinneqalissagaluarpat ingerlatseqatigiiffiup pissarsiarisinnaasaannut killissaliussat avataanniissasut Munck Gruppen A/S-imut isumaqatigiissummi tikkuussisoqanngilaq, taamatullu isumaqatigiissut sanaartornermut inatsimmut Inatsisartut akuerisimasaannut killissaliussat iluaniillutik.

Aningaasaqarnermut Akileraartarnermullu Ataatsimiititaliap taaguummut ”mittarfiliassani aningaasaqarneq” ingerlatseqatigiiffiup aningaasaqarnera tamarmiusoq innersuussutigisimappagu, oqaatigineqassaaq ingerlatseqatigiiffiup ingerlatsinissamut pilersaarutaa taamanikkut suliarineqarmat tunngavigisanik pingaarutilinnik makkuninnga aallaaveqarmat (paasissutissat matuma siulianiittut saniatigut):

• Sanaartornermut aningaasartuutissat missingersorneqartut DKK 3,6 Mia. (2017-imi januaarimi akigititat)

• Ukiuni 4-ini sanaartornerup ingerlanissaa

• Aningaasalersuinermut aningaasartuutissat taarsigassarsianit akiitsut tamarmiusut 1,6 mia.-inik annertussuseqartut ukiumut 4%-ii

• Taarsigassarsiat ukiuni 25-ini akilersorneqartussat

• Ukiumut ilaasut amerleriarnerat agguaqatigiissillugu 2% CAGR (”Compound Annual Growth Rate”), aammalu nunani tamalaani ilaasunik angallassineq tamarmi (nunap immikkoortuani Islandimit aammalu Qaqortumi mittarfimmit nutaamit angallanneq ilaanani) Nuuk aamma/imaluunniit Ilulissat aqqutigalugu pisassasoq

Ingerlatseqatigiiffiup tamatuma kingorna ilaasunut missingersuinerit sukumiinerusumik suliarai aammalu tamakkiisumik suliareqqissaarlugit, tassani takutinneqarpoq ukiumut ilaasut amerleriarnerat agguaqatigiissillugu 3,5% CAGR, nunani tamalaani ilaasunik angallassineq tamarmi (nunap immikkoortuani Islandimit aammalu Qaqortumi mittarfimmit nutaamit angallanneq ilaanani) Nuuk aamma/imaluunniit Ilulissat aqqutigalugu pisassasoq, pillugu tunngavigisaq suli aallaavigineqartoq. Tassunga tunngasoq mittarfiliassat aningaasaqarneranni tamarmiusumi annertunerusumik pitsanngorsaaqqippoq.

Danskit Naalagaaffiata kr. 700 mio.-inik aningaasaatinut akiliuteqarnerata malitsigisaanik kr. 1,6 mia.-inik ernialinnik akiitsoqalernissaq naatsorsuutigineqaqqaartoq tamatuma saniatigut kr. 900 mio.-inut annikillisinneqarpoq, tamannalu mittarfiliassat aningaasaqarneranni tamarmiusumi annertunerusumik pitsanngorsaaqqippoq.

Ernialinnik akiitsoqalernissap annikillisinneqarnerata malitsigisaanik aammalu taarsigassarsititsisartuni erniat pitsaasumik ineriartornerisa malitsigisaanik, aammalu ingerlatseqatigiiffiup naalagaaffiup taarsigassarsititseqqittarneranik taaneqartartoq 2050 tungaanut aningaasalersorneqaqqissinnaasoq aqqutigalugu ingerlatseqatigiiffiup kr. 450 mio.-inik aammalu Den Nordiske Investeringsbank-imit (NIB) ukiuni 20-ini akilersorneqartussani aammalu danskit Naalagaaffiata NIB-imut qularnaveeqqusiinerata malitsigisaanik atugassarititaasut pitsaasorujussuit tunngavigalugit kr. 450 mio.-inik allanik taarsigassarsisinnaanerata malitsigisaanik, mittarfiliassat aningaasaqarnerat tamarmiusoq, aningaasalersuinermut aningaasartuutissanuinnaq tunngatillugu, ingerlatsinissamut pilersaarutaaqqaartumut sanilliullugu kr. 1 mia. missaanni pitsaanerulersinneqarpoq.

Kiisalu ingerlatseqatigiiffiup paasivaa, pingaartumik tax free-nut pisiniarfinnit assigisaannillu niuernermik tunngaveqartumik isertitassanut missingersuutit allanngortitsiviunngitsorujussuit naatsorsuutigineqartut amerlisinnissaannut tunngavissaqartoq, tamannalu aamma mittarfiliassat aningaasaqarneranni tamarmiusumi pitsanngortitsinissamut iluaqutaassaaq.

Ataatsimut isigalugu taamaalilluni 2017-imiilli mittarfiliassat aningaasaqarneranni tamarmiusumi annertuumik annertunerusumik pitsanngortitsisoqarpoq, tamannalu suliassami aningaasaqarnikkut tunngavissanik pitsanngortitsivoq, kisianni aamma ingerlatseqatigiiffik annertunerusumik aningaasalersuinissamut pisariaqartitsilissagaluarpat, tamanna kingusinnerusukkut pisariaqalissagaluarpat, aningaasartuuteqarnissamut malussarinnginnerulertussaalluni.

Ataatsimut isigalugu taamaalilluni oqaatigineqarsinnaavoq, sanaartornermut aningaasartuuterpiaat 2017- imi missingersorneqartunit (2023 tungaanut akigititat ineriartornerannut iluarsillugit) qaffasinnerulissagaluarpata, mittarfiliassat aningaasaqarneranni tamarmiusumi pitsanngorsaanerit allat annertoorujussuupput, taakkua sanaartornermut aningaasartuutit qaffasinnerulissagaluarpata sunniinerlunnissanit annertunerusussaallutik.

Inuiaqatigiit aningaasaqarnerannut sunniutaasussat pillugit
Mittarfiliassani ataatsimoortitani inuiaqatigiit aningaasaqarnerannut sunniutaasussat tamanna pillugu nalunaarusiani marlunni, Ineqarnermut Attaveqaqatigiinnermullu Naalakkersuisoqarfiup suliarititaanni, aammalu Aningaasaqarnermut Akileraartarnermullu Ataatsimiititaliap ilisimariigaanni, sukumiisumik paasinarsisinneqarput.

Munck Gruppen A/S-imut isumaqatigiissutini inuiaqatigiit aningaasaqarneranni misissueqqissaarnerit pitsaanngitsumik allanngortinneqarnissaannik pissutissaqalersitsisunut tunngasunik ingerlatseqatigiiffik ilisimasaqanngilaq.

Illuatungaatigut danskit Naalagaaffianut aamma NIB-imut isumaqatigiissutit malillugit ingerlatseqatigiiffiup aningaasalersuinermut aningaasartuutaasa annertuumik annikillisinneqarnerisa, mittarfiliassat inuiaqatigiit aningaasaqarnerannut sunniutissaat annertunerusumik pitsaanerulersikkaat paasinarsisissinnaavaat.

Kalaallit Airports International A/S sinnerlugu

Johannus Egholm Hansen

Siulersuisunut siulittaasoq