Nuummi aamma Ilulissani mittarfissat sanaartorneqarnissaannut isumaqatigiissutit isumaqatigiissutigineqarput
Kalaallit Airports International A/S-ip aamma Munck Gruppen A/S-ip Nuummi aamma Ilulissani mittarfissat sanaartorneqarnissaat pillugu sanatitsisup sanaartortussallu akornanni isumaqatigiissutit pingaarnerit isumaqatigiissutigaat.
Mittarfiit marluusut tamarmik 2.200 meteriussapput, aammalu ILS-inik, eqqoqqissaartumik minnissamut atortunik, isikkivigippallaanngitsumi missinnaalersitsisussanik, taamaalillunilu mittarfinni piffissamik eqquisarnermik pitsaanerulersitsisussanik, atortulersugaassapput.
Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisaat nr. 4, 22. november 2018-imeersoq naapertorlugu aammalu tassani killissaliussat iluanni sanatitsisup sanaartortussallu akornanni isumaqatigiissutit isumaqatigiissutigineqarput.
Juulip qaammataani isumaqatigiissutissat pillugit isumaqatigiittoqareernerata kingorna Munck Gruppen A/ S-ip mittarfiliassanut suliassat marluk taakkua aallartinnissaat ingerlaannaq aallartippaa, aammalu sanaartornermik suliaqarnerpiaq pilersaarutit malillugit oktober 2019-imi aallartissaaq. Mittarfiit marluusut taakkua pilersaarutit malillugit 2023-ip naalernerani naammassissapput.
Mittarfinni marlunni taakkunani mittarfiit illutassai pilersaarutit malillugit 2020-imi neqeroortitsivigineqassapput, aammalu tassani ilaatinneqassallutik mittarfinni terminalit ullutsinnut naleqquttut nutaaliaasullu, nakkutiginninnermut napasuliaq nutaaq aamma sullissinermut illutassat nutaat. Aamma taakkua pilersaarutit malillugit 2023-ip naalernerani naammassissapput.
Munck Gruppen-imut sanatitsisup sanaartortussallu akornanni isumaqatigiissutit isumaqatigiissutiginerisa saniatigut Kalaallit Airports International A/S aammattaaq danskit naalagaaffiannut aamma Den Nordiske Investeringsbank-imut katillugit kr. 900 mio.-inik taarsigassarsinissamut inaarutaasumik isumaqatigiissuteqarpoq, taamaalilluni mittarfiliassat aningaasalersorneqarnissaat danskit naalakkersuisuisa, Naalakkersuisut aamma Kalaallit Airports International A/S-ip akornanni isumaqatigiissutigineqartoq inissitsinneqarluni.
”Ingerlatseqatigiiffiup tungaaniit ukiut pingasut sinnerlugit annertuumik piaareersaalluni suliaqareernerup kingorna, sanaartornermik suliaqarnerit pimoorussamik aallartinnissaat qilanaarisorujussuuarput. Sulisut siunnersuisartullu pikkorissut aammalu annertuumik aallussisut qanimut suleqatigalugit sulineq nuannersorujussuusimavoq, aammalu taamaaqataanik Munck Gruppen A/S-ip suleqatigilluarnerata ingerlaannarnissaa qilanaaraarput. Munck Gruppen A/S peqatigalugu piffissami akigititamullu isumaqatigiissutigineqartumi suliassat ingerlannissaat, aammalu suliaqarnerup ingerlanerani mittarfiup eqqaaniittunut akornutaasussat annikillisinnissaat, sulissutigissavarput, taamatullu suliassat siumut ingerlanerat pillugu ingerlaavartumik paasissutissiisassalluta”, oqarpoq pisortaaneq Peter Wistoft.
***
Tusagassiuutitigut nalunaarut manna pillugu saaffigineqarsinnaavoq pisortaaneq, Peter Wistoft, oqarasuaat +45 25 42 40 33. 13. august 2019 Pisortaqatigiit