Kalaallit Airport-imi suliniutinut pisortaq soraarpoq
Suliniutinut pisortaq, Johannes Ehmanns, Kalaallit Airports Holding A/S-imi, aamma ingerlatseqatigiiffinni immikkoortortaqarfiusuni Kalaallit Airports International A/S-imi aamma Kalaallit Airports Domestic A/S-imi atorfimminit ullumi ulloq soraarpoq.
Suliniutinut pisortap soraarnera illuatungeriit isumaqatigiinnerat malillugu pivoq.
Ingerlatseqatigiiffimmi sanaartornermut pisortap, Erlingur Leifsson-ip, pisortaatitat ataaniilluni maannamuugallartoq Nuummi, Ilulissani aamma Qaqortumi sanaartornermik suliassat aqunneqarnerannut suliassat ingerlateqqissavai. Erlingur Leifsson Island-iminngaaneersuuvoq, aammalu University of Icelandimi civilingeniøritut aammalu USA-mi University of Illinois-imi ”construction engineering andmmanagement”-imi ilinniarsimasuulluni. Erlingur Leifsson tamatuma saniatigut mittarfiliassanut suliniutini aammalu Island-imi suliniutini annertunerusuni allani suliaqarnermik ukiuni arlalinni misilittagaqarpoq, kiisalu nunani tamalaani, ilaatigut Norge-mi, USA-mi aamma Jamaica-mi sulinermik misilittagaqarluni.
Nuummi aamma Ilulissani mittarfinnut sanaartornermik suliaqarnerup aallartinneqarnissaata aammalu Qaqortumi mittarfiup sanaartornissamut pilersaarusiorneqarnerata inaarsarneqarnissaata, suliarineqarnerat allannguuteqaratik ingerlaannassapput.
”Siulersuisut soorunami suliniutinut pisortap soraarnera uggoraat, kisianni sanaartornermut pisortap Erlingur Leifsson-ip, mittarfiliassanut suliniutinut annertuumik ilisimannittup, aammalu Munck Gruppen A/S-imut isumaqatiginninniarnermi akuusimasup, siunissami pisortaaqatigiit katititaanerat pillugu aalajangiisoqarnissaata tungaanut suliniutini aqutsinermik suliassaq tamakkiisumik isumagisinnaagaa, tatigilluinnarlugu,”, oqarpoq siulersuisunut siulittaasoq Johannus Egholm Hansen, peqatigisaanillu Johannes Ehmanns suliaqarsimaneranut qutsavigalugu.
***
Nuuk, ulloq 18. august 2019
Siulersuisut