Aviisip Sermitsiap ilanngutassiaanut oqaaseqaatit

Aviisimi ilanngutassiap quleqataani allanneqarsimavoq, ”KAIR aningaasaqarnermut tunngasumik ernummatiginnittoq”, Naalakkersuisut aamma Illersornissamut ministeriaqarfiup, Kangerlussuarmi mittarfiup mittarfissuartut atatsiinnarneqarnissaa pillugu isumaqatigiissuteqarnerata kingorna.

Aviisip qulequtaa ilumuunngilaq.

Ataani atsiortoq, Kangerlussuaq pillugu isumaqatigiissutsip tamanit ilisimaneqalernerata kinguninngua, Sermitsiami aviisiliortumit saaffigineqarsimavoq. Siusinnerusukkut oqarsimanngilanga, Kalaallit Airports International A/S-i ”aningaasaqarnermut tunngasumik ernummatiginnittoq”, kisianni taamaallaat oqarpunga, ”Kangerlussuaq pillugu isumaqatigiissut, Nuummi Ilulissanilu mittarfinnut nutaanut ilaasunut missingersuutit pillugit nalorninermik kinguneqarsinnaasoq, kisianni tamanna isummerfigissallugu siusippallaarujussuartoq, pissutigalugu Kalaallit Airports International A/S-imut sunniutinut apeqqutaalluinnarmat, Nuummi Ilulissanilu mittarfiit naammassippata timmisartortitseqatigiit qanoq annertutigisumik siunissami Kangerlussuarmi mittarfimmik atuisarnissaat”.

Kalaallit Airports International A/S-ip aqutsisui, Kangerlussuaq pillugu isumaqatigiissutip nutaap pissusissamisoortumik kinguneranik, isumaqatigiissutip Nuummi Ilulissanilu mittarfinni nutaani, ilaasunut tunngavigisanut sunniutaasinnaasunut naleqqiullugit akilersinnaassutsimik naatsorsuinerit pisariaqartut ingerlanniarpai.

Kalaallit Nunaannut Kalaallit Nunaanniillu angalasut 60 %-iisa missaat, Nuummut Nuummiillu ingerlaartarnerat eqqarsaatigalugu, aamma Kalaallit Nunaata iluani angalasut agguataarnerat ataatsimut isigalugu tassunga assingummat, maannakkut inerniliunneqarsinnaavoq, ilimananngilluinnartoq, Kangerlussuarmi mittarfik pillugu isumaqatigiissutip, Nuummi mittarfimmut nutaamut arlaannaatigulluunniit annertuumik sunniuteqarnissaa, taassuma aningaasaqarnikkut tunngavilersorluagaanera pissutigalugu. Akerlianik, Kangerlussuaq pillugu isumaqatigiissutip Ilulissani mittarfimmut nutaamut annerulaartumik sunniuteqarsinnaanera mattunneqarsinnaanngilaq, timmisartortitseqatigiit timmisartutik takornarianik ilaasullit, taakku Ilulissani mittarfimmut ilaasunut tunngavimmut ilaasut, Kangerlussuarmut timmisartuutissallugit qinissappassuk, tassanngaaniillu Ilulissanut ingerlatseqqillugit. Angallannermut aaqqissuussineq taamaattoq ilaasunit piumaneqarnerunavianngilaq, pissutigalugu toqqaannartumik timmisartukkut attaveqarnerit angalasut ornitassaminik qinersineranni pingaartinneqarnerusarmat, aamma takussutissaqanngilaq, sunniut taamaattoq suliniutip aningaasaqarnera ataatsimut isigalugu aseruisinnaassasoq.

Aviisip Sermitsiap qulequtaa, taamaalilluniaasiit piviusorsiunngitsumik aviisiliortutut, innuttaasut mittarfinnut suliniutinut tatiginninnerannik akornusersuiniarnermut, misiliinerit ilagiinnarpaat.

20. septembari 2019

Kalaallit Airports International A/S-i sinnerlugu

Johannus Egholm Hansen

Siulersuisut siulittaasuat