Kalaallit Airportsimi allamik siulittaasortaarneq pillugu tusagassiorfinnut nalunaarut
Ullumikkut Kalaallit Airports Holding a/s-imi aamma Kalaallit Airports Domestic a/s-imi immikkut ittumik ataatsimeersuarnerit ingerlanneqarsimapput, tassani Kjeld Zacho Jørgensen ingerlatseqatigiiffinni siulittaasunngorsimavoq. Kalaallit Airports International a/s-imi piaarnerpaamik immikkut ittumik ataatsimeersuartoqassaaq, tassani aammattaaq Kjeldip siulittaasunngornissaa naatsorsuutigineqarpoq.
Kjeldip, Johannus Egholm Hansen taarserpaa, taanna siulersuisunit ulloq 30. septembari 2020 tunuarsimavoq. Piffissami qaangiuttumi Christian Berg siulittaasumut sinniisuusimavoq. Christian ingerlatseqatigiiffiup siulersuisuini siulittaasup tulliatut ingerlaannassasoq naatsorsuutigineqarpoq.
Ingerlatseqatigiiffiup Johannus ingerlatseqatigiiffimmik massakkut killiffianut ingerlatsilluni sulisimaneranut qutsavigerusuppaa. Ingerlatseqatigiiffiup taamatut aamma Christian piffissami qaangiuttumi siulittaasumut sinniisutut sulisimaneranut qutsavigerusuppaa, aamma suleqatigiilluarnerup ingerlaannarnissaa qilanaaraa.
Kjeldi ingerlatseqatigiiffinnik pisortanit pigineqartunik aamma immikkut timmisartukkut angallannermi ingerlatseqatigiiffinnik aqutsinerup iluani sivisuumik angusaqarluarluni atorfeqarsimavoq. Kjeldi piffissami kingullermi Air Greenlandimi siulersuisuni siulittaasuusimavoq aamma siusinnerusukkut Billundimi mittarfimmi pisortaanertut sulisimavoq.
Kjeldi siulittaasunngornini pillugu ima oqaaseqarpoq:
”Kalaallit Airportsimi siulittaasunngornera tulluunnartippara ajukkunnaralugulu. Taanna Kalaallit Nunaata oqaluttuarisaanerani ataqatigiimmik aaqqissuussinernik suliniutit annersaraat, ukiuni aggersuni amerlasuuni Kalaallit Nunaanni inuiaqatigiit ineriartornerannut annertuumik pingaaruteqartussaq. Billundip mittarfiani ukiut arfineq-pingasut sulisimaninnit ilisimavara, mittarfik aningaasarsiornikkut siuariartornermut ingerlatsisuusoq nukittooq. Sulisut aamma qullersaqarfik, siulersuisut, soqutigisaqaqatigiit aamma piginnittut peqatigalugit suliniutip matuma ingerlatseqqinnissaanut qilanaarpunga. Oqaloqatigiinneq aamma ataatsimut paaseqatigiinneq aqqutigalugit inuiaqatigiinnut aamma Kalaallit Nunaannut iluaqutaasumik aningaasaliinerup iluatsilluarnissaanut aqqutissiuussisinnaavugut.”
Kalaallit Airports Holding a/s-imi aamma Kalaallit Airports Domestic a/s-imi siulersuisut tamanna pillugu maannamiit tulliuttunik ilaqassapput:
Kjeld Zacho Jørgensen – Siulittaasoq
Christian Berg
Finn Gaarsmand
Niels Thomsen
Ingerlatseqatigiiffiup Kjeldip siulersuisullu sinnerisa pitsaasumik kinguneqartussamillu suleqatiginissaat qilanaaraa.
Ingerlatseqatigiiffik sinnerlugu
Jens R. Lauridsen
Pisortaaneq