Tusagassiorfinnut nalunaarut:
Nuuk 19. december 2020
Kalaallit Nunaannut timmisartumik aqqutit nutaat pillugit Kalaallit Airports angusaqarluarniartumik suleqatigisaqalerpoq
Kalaallit Airports Holding A/S, KAIR, aamma Airport Strategy & Marketing, ASM, Kalaallit Nunaanni mittarfissanut nunanit assigiinngitsunit timmisartumik aqqutit ataqatigiiaat ineriartortinneqarnissaat pillugu ukiut pingasut suleqatigiinnissamik isumaqatigiissuteqarsimapput.
Kalaallit Nunaanni mittarfiit nutaat naammassippata, ullormit siullermit nunanit allanit timmisartunik mittarfimmiittoqassaaq. Tassa taanna KAIR-ip aamma ASM-ip akornanni suleqatigiinnermi ullumikkorpiaq pilersinneqartumi angorusunneqarpoq. Suleqatigiillutik atassuteqarnernik aamma siunissami nunani assigiinngitsuni timmisartortitseqatigiinnik, Kalaallit Nunaanni mittarfinnut nutaanut timmisartuussisartussanik, isumaqatigiissutinik pilersitsissapput.
ASM nunani assigiinngitsuni suliffeqarfiuvoq, nunarsuaq tamakkerlugu timmisartunut aqqutinik nutaanik pilersaarusiornermi siunnersuinermik aamma ajornaatsumik ineriartortitsinermik neqeroorutilik. Mittarfiit, timmisartortitseqatigiit aamma angalatitsisut akornanni ataqatigiinnermik naleqquttussarsiornermillu periarfissarsiornermi, suliffeqarfik ukiut 25-t sinnerlugit nunarsuaq tamakkerlugu siuttuusimavoq.
Kalaallit Nunaanni aningaasarsiornerup ineriartortinnissaanut periarfissaq asseqanngitsoq
David Stroud, ASM-imi pisortaasup, Kalaallit Nunaanni mittarfinni nutaani periarfissat annertuut takusinnaavai: ”Kalaallit Nunaat asseqanngitsumik niuernikkut periarfissaqarpoq aamma mittarfinnik ataqatigiimmik aaqqissuussinerit nutaat takornariat amerlassusaannik taamaallaat qaffaassanngillat. Qularinngilarput, Kalaallit Nunaanni mittarfinnut nutaanut aqqutinik ineriartortitsineq aningaasarsiornermik ineriartortitsissasoq, nunallu ilaanut tamanut periarfissanik nutaarluinnarnik pilersitsissasoq,” taama oqaaseqarpoq.
Europamit, Amerikamit Avannarlermit aamma Aasiamit toqqaannartumik Kalaallit Nunaannut timmisartuussinernut periarfissat takusinnaavai – erseqqissaatigalugulu najukkami ingerlatsisut suleqatigalugit piujuartitsisumik ineriartortitsinerup qulakkeerneqarnissaata pingaaruteqarnera.
Nunat assigiinngitsut akornanni peqateqarnerit pingaaruteqarnerat
Kalaallit Nunaanni 2016-ip aamma 2018-ip akornanni unnuisarnerit amerlassusaata 10,8 procentimik aamma nunanit assigiinngitsunit timmisartukkut angalasut amerlassusaata 3,3 procentimik qaffannerat misigineqarsimavoq. COVID19-ip kingorna ineriartorneq taanna ingerlaannaassasoq Jens Lauridsen, KAIR-imi pisortaaneq isumaqarpoq:
”Neriulluartorujussuuvugut. COVID-19-i sioqqullugu, takornariat aamma nunanit assigiinngitsunit Kalaallit Nunaannut timmisartut angallannerat aalajaatsumik qaffakkiartornerat takusimavarput. Kalaallit Nunaanni asseqanngitsumik takornariaqarnermut periarfissanik, mittarfinnillu nutaanik – nunani assigiinngitsuni timmisartortitseqatigiinnik isumaqatigiissusiornissamut aallaaveqarpugut pitsaasunik. Taamaattoq aqqutinik ineriartortitsineq sivisusarpoq, timmisartullu nammineerlutik takkunneq ajorput. Ilutigalugu timmisartortitsineq tamakkerluni maannakkut ajornartorsiorpoq. Taamaammat ASM-imik, niuerfimmik tassanilu peqataasunik tamanik ilisimasalimmik peqateqarnissaq pingaaruteqarluinnarpoq.”
ASM-ip KAIR-illu akornanni aqqutinik nutaanik ineriartortitsinissaq pillugu isumaqatigiissut ukiut pingasut sivisussuseqarpoq. Mittarfiit nutaat, timmisartortitseqatigiiffinnut angalasunullu sullissinernik sunik neqerooruteqarnissaanik suussusiineq, peqateqarnermi aamma suleqatigiissutigineqassapput.
Suli paasissutissanik piumaguit inussiarnersumik saaffigiuk
Jens R. Lauridsen, Pisortaaneq
Kalaallit Airports Holding A/S
Imaneq 33, 5. sal
Box 2000, 3900 Nuuk – Grønland
Mobil GRL: +299 55 38 04
Mobil DK: +45 53 36 22 40
Mail: JRL@kair.gl www.kair.gl