Kalaallit Airports Gruppen pisortaanermik aamma aningaasaqarnermut pisortamik atorfinititsivoq

Kalaallit Airports-imi suliffissuarmi pisortaaqatigiit nukittorsarneqarput aammalu Jens Lauridsen pisortaanertut aamma Steen Montgomery-Andersen aningaasaqarnermut aningaasalersuinermullu pisortatut atorfinitsinneqarlutik.

Peter Wistoft-ip ukiuni pingasuni pisortatut atorfeqareerluni, Danmarkimi nutaanik unammilligassanik ujartuiniarluni juunip qaammataani atorfimminit soraarniuteqareernerata kingorna Kalaallit Airports Holding A/S-ip, Kalaallit Airports Domestic A/S-ip aamma Kalaallit Airports International A/S-ip Jens Lauridsen pisortaanertut atorfinitsippaat.

Jens Lauridsen, 47-nik ukioqartoq, timmisartuutileqatigiiffimmi Jet Time A/S-imi Vice President-itut, Technical-itut, atorfimmeersuuvoq. Jet Time A/S-imi atorfininnginnermini Jens Lauridsen ukiuni sisamani Mittarfeqarfinni pisortaanertut atorfeqarsimavoq (2012 – 2016) aammalu Air Greenland-imi ukiuni marlunni teknikkinut pisortatut atorfeqarsimalluni (2016 – 2018), aamma ukiuni 9-ini Danfoss-imi aammalu Samson Agro-mi ukiuni 5-ini siusinnerusukkut atorfeqarsimalluni.

Jens Lauridsen maannakkut atorfimminit soraarsinnaalerniariarluni atorfimmi sulilissaaq.

”Jens Lauridsen-ip Kalaallit Nunaannut aammalu Kalaallit Nunaanni mittarfinnut aamma mittarfinni suliffissuaqarnermut annertuumik ilisimasaqartup, Kalaallit Airports-ip suliffissuani pisortaanertut atorfimmi neqeroorfigineqarnini akuerimmagu, aammalu siusinnerusukkut pisortaanerusup atorfimminiit soraarnissani kissaatigalugu nalunaaruteqareernerata kingorna piffissap sivikitsuaqqap ingerlanerani pisortaaninngortussamik atorfinitsitsinissap iluatsilluarnera, siulersuisut naammagisimaartorujussuuaat. Nuummi, Ilulissani aamma Qaqortumi mittarfiliassat annertoorujussuit piviusunngortinneqarnissaat pillugu Jens Lauridsen-ip suleqatigilernissaa siulersuisut qilanaarisorujussuuaat, peqatigisaanillu Peter Wistoft ukiuni kingullerni pingasuni ingerlatseqatigiiffimmi annertuumik suliaqarneranut qutsavigalugu” oqarpoq siulersuisut siulittaasuat Johannus Egholm Hansen.

Steen Montgomery-Andersen aningaasaqarnermut aningaasalersuinermullu pisortatut atorfinitsillugu pisortaaqatigiit nukittorsarniarlugit Kalaallit Airports-ip suliffissuani siulersuisut peqatigisaanik aalajangerput. Steen Montgomery-Andersen ingerlatseqatigiiffimmi atorfeqareersoq, 63-nik ukioqarpoq aammalu Kalaallit Nunaanni sivisoorujussuarmik inuussutissarsiornermi sulisimalluni, ilaatigut Tele Greenland A/S-imi 2005-imiit 2019-mut pisortap tulliatut aningaasaqarnermullu pisortatut, KNI A/S-imi 1997 – 2001-imi aningaasaqarnermut pisortatut, aammalu KNI A/S-imi 2019-imiilli aamma Sikuki Nuuk Harbour A/S-imi 2020-imi maajimiit siulersuisuni ilaasortaalluni.

Steen Montgomery-Andersen ulloq 1. august 2020 atorfimmi sulilerpoq.

”Steen Montgomery-Andersen-ip pisortaaqatigiinniilernerani aningaasaqarnikkut aqutsinerup, aningaasalersuinerup, periusissatigut aqutsinerup, attaveqaqatigiinnerup aamma aaqqissuussaanermi inerisaanerup iluanni annertoorujussuarmik misilittagalimmik, aammalu ukiuni 25-ini Kalaallit Nunaanni inuussutissarsiornermi misilittagalimmik, ingerlatseqatigiiffik pisortartaarpoq”, oqarpoq Jóhannus Egholm Hansen, nangillunilu; ”Ingerlatseqatigiiffimmi ulluinnarni aqutsisut nukittuut suleqatigiilersinnerat siulersuisut nuannaarutigaat, aammalu mittarfiit illutassaannut aammalu ukioq manna kingusinnerusukkut teknikkikkut atortunut neqeroortitsinerit kingulliit ingerlanneqarnissaat qilanaaralugu.”

Kalaallit Airports Holding A/S-imi, Kalaallit Airports Domestic A/S-imi aamma Kalaallit Airports International A/S-imi pisortaaqatigiit matuma kingorna tassaalerput:

Jens Lauridsen, pisortaaneq

Aviaaja Karlshøj Knudsen, suliniutinut pisortaq

Steen Montgomery-Andersen, aningaasaqarnermut aningaasalersuinermullu pisortaq

******

Tusagassiuutitigut nalunaarut manna pillugu saaffigineqarsinnaavoq siulersuisut siulittaasuat Johannus Egholm Hansen, oqarasuaat +299 55 06 31 imaluunniit +45 2389 8008.

Nuuk, ulloq 3. august 2020

Siulersuisut