Nuummi Ilulissanilu mittarfiliornerit ukiuunerani unissanngillat
Kaperlalluni taaraluartoq, aputeqaraluartoq, sermernaraluartoq issittorujussuugaluartorlu ukiuunerata ingerlanerani mittarfissanik sanaartornermut ujaqqanik qaartiterinermeersunillu inissiivissat sanaartorlugit – aammalu suliassat kissatsikkiartoqqilerpat tulleriiaarneqartussat tamaasa piareersarlugit Kalaallit Airports aamma Munck Gruppen sulissapput.
NUUK, 10. decemberi 2021 –– Maani Kalaallit Nunaanni ukiorluinnalerpoq, kisianni Nuummi Ilulissanilu sanaartornernik suliaqarnerit qaammatini issinnerpaaniluunniit tamakkiisumik ingerlaannassapput, taamaalilluni nunanit tamalaaneersunut mittarfiit pilersaarutit malillugit 2024-mi naammassisinnaassallutik.
”Ukiuunerata ingerlanerani ingerlatassarpassuit pilersaarutaapput. Kisianni soorunami aasaanerani suliarineqartartut suliassat tamakkiisumik suliarisinnaanngilagut, pissutigalugu immiilluni suliaqarnerit pitsaassusissaannut piumasaqaatit sukannersuummata,” oqarpoq suliniutinut pisortaq Aviaaja Karlshøj Knudsen, Kalaallit Airports.
”Qaartiterinerit ingerlaannassapput, soorlu tamanna ingerlanneqartuaannarsimasoq. Tamatuma saniatigut ujaqqat piiakkatta pitsaassusaannik misissuisuaannarpugut, taamaalilluta ujaqqat pitsaanerpaat siunertamut eqqortumut atorsinnaallutigu. Tulliullugu ujaqqat sequtsertarpagut, taamaalillutik taakkua atorneqarfissaminnut naleqquttumik angissuseqassallutik, aammalu inissiisarfimmukaanneqartarlutik,” ilanngullugu oqarpoq.
Pitsaassutsinik sukumiisumik misileraanissaq pisariaqarpoq, tassami qaqqami sumiiffiup annikitsuaraaqqalluunniit iluani ujaqqat piiarneqartut assigiinngitsorujussuusinnaammata – aammalu atortussat eqqortumik atorneqarnissaat aalajangiisuulluinnartumik pingaaruteqarpoq. Assersuutigalugu ujaqqat manngernerpaat pitsaassuseqarnerpaajusut asfaltilersuinermut imaluunniit mittarfimmi immiunneqartussat qallersaannut atorneqassapput.
”Timmisartut angisuut oqimaatsut ukiumiit ukiumut ullormut arlaleriarlutik mittartussaammata tingisartussaallutillu, tamanna sanaartugassamut annertoorujussuarnik piumasaqaateqarfiuvoq. Pingaartumik maani Issittumi silap pissusaa attaveqaasersuutinut peqqarniittarmat. Taamaattumik mittarfiit siunissami akisoorsuarnik iluarsaassinissaq pisariaqarani ukiorpassuarni isumannaatsumik sunniuteqarluartumillu atorsinnaanissaannut sanaartornerannut sapinngisarput tamaat iliuuseqarpugut,” nassuiaavoq Aviaaja Karlshøj Knudsen.
Tamatuma saniatigut KAIR-ip aamma Munck Gruppen sanaartugassat aqqusernillu kissatsikkiartoqqilerpat inissereersimasussat piareersarlugit ukiuunera atussavaat, aammalu suliassat allat suliarineqarsinnaapput.
”Aasap sivikitsup sapinngisamik sunniuteqarluarnerpaamik atornissaa eqqumaffigisorujussuuarput. Taamaattumik aamma ukiuunerani suliassarpassuit upernaakkut aasakkullu aatsaat ingerlanneqarsinnaasut piareersartarpagut. Tassani assersuutigalugu pineqarput asfaltilersuineq, kabelinik nunamut assaassineq imaluunniit teknikkikkut atortulersuutinik qerisinnaasunik ikkussuinerit,” oqarpoq Aviaaja Karlshøj Knudsen.
Kalaallit Airports-ip Nuummi sanaartorfimmi ukioq manna siusinnerusukkut ammasumik qaaqqusineq ingerlappaa, aammalu innuttaasunik ataatsimiititsinermi pisussami Ilulissani mittarfiliorneq pillugu annertunerusunik paasisaqartoqarsinnaavoq. Tamanna Ilulissani Mathias Storchip Atuarfiani ingerlanneqassaaq ulloq 12. januar 2022 nal.19:00-21:30.
Paasissutissanik erseqqinnerusunik piniarnermi attaveqarfigineqassaaq (tusagassiortut saaffiginninneri kisimik):
Mikkel Bjarnø Lund, attaveqaqatigiinnermut sulisoq, Kalaallit Airports - mobil: 231700 – mbl@kair.gl