Ilulissani mittarfissaq pillugu innuttaasunik ataatsimiititsinermut aggerit
Maannakkorpiaq sanaartorfimmi susoqarpa? Suut pilersaarutaappat? Sanaartorneq qanoq ingerlassava aammalu suliassaq najukkami innuttaasunut qanoq sunniuteqassava? Ulloq 23.marts apeqqutit tamaasa akissutissarsikkit allanillu arlalinnik nammineerlutit apeqquteqarlutit.
NUUK, 10. marts 2022 ––Ilulissani nunanit tamalaanit mittarfissap sanaartorneqarnera suliassaavoq annertoorujussuaq, ukiut arlallit ingerlaneranni qaammatit tamaasa qaarsoq tonsit tuusintillit arlallit qaartitertariaqarlutik, sequtsertariaqarlutik nussortariaqarlutillu. Kisianni 2024-p naalernerani mittarfiup ammarsinnaalinnginnerani aamma mittarfittaa, saqqaa aqqusernillu sanaartorneqartussaapput, kabelit kilometererpassuit siaarneqartussaallutik, asfaltilersuisoqartussaalluni aammalu terminali sanaartorneqartussaalluni.
Taakkua tamaasa suliassaq pillugu innuttaasunik ataatsimiititsinermi 23. marts 2022 nal.18:30-21:30 Ilulissani Mathias Storchip Atuarfiata inersuaani ingerlanneqartussami annertunerusumik tusagaqarfigineqarsinnaapput.
”Mittarfik Ilulissanut aammalu Kalaallit Nunaat tamaat isigalugu annertuumik iluaqutaalertussaavoq. Kisianni ajoqutissartaasut sapinngisamik annertunerpaamik killilersimaarniarlugit uagut aamma entreprenørit ilungersoraluartugut, sanaartornerup suliarineqarnera aamma najukkami innuttaasunut sunniisussaavoq,” oqarpoq Suliniutinut pisortaq Aviaaja Karlshøj Knudsen, Kalaallit Airports.
”Suliassaq, ammarnissaata tungaanut pilersaarutit aalajangersimasut aammalu siunissami periarfissaqarfiusut oqaluttuarerusuppagut. Kisianni pingaarnerpaajuvoq Ilulissani innuttaasut suliffeqarfiillu oqaloqatigilluarnissaasa qulakkeernissaa – maannakkut aammalu siunissami ukiuni aggersuni. Tassani neriuutigaarput suliassaq pillugu apeqqutigineqartut tamaasa akissuteqarfiginissaasa qulakkeerneratigut ulloq 23. marts innuttaasunik ataatsimiititsineq iluaqutaalaarsinnaasoq,” ilassuteqarpoq Aviaaja Karlshøj Knudsen.
Innuttaasunik ataatsimiititsinermi Aviaaja Karlshøj Knudsen aamma allat Kalaallit Airports-imiit aallartitat najuutissapput, saqqummiillutik aammalu apeqqutit akissuteqarfigalugit. Taamatuttaaq Munck Gruppen-imi aamma KJ Greenland-imi entreprenøriniit kiisalu Avannaata Kommunianiit aallartitat saqqummiissapput – aammalu taakkununnga apeqquteqarnissamut periarfissaqassalluni.
Innuttaasunik ataatsimiititsinermi aamma kaaginik kaffimillu sassaalliisoqassaaq, aammalu kikkut tamarmik tikilluaqqusaapput.
Paasissutissanik erseqqinnerusunik piniarnermi attaveqarfigineqassaaq (taamaallaat tusagassiortuniit saaffiginnissutit):
Mikkel Bjarnø Lund, attaveqaqatigiinnermut akisussaasoq, Kalaallit Airports - oqarasuaat angallattagaq: 231700 – mbl@kair.gl