KJ Greenland-ip Qaqortumi mittarfiup illutassai sanaartussavai

KJ Greenland Qaqortumi mittarfissami terminalip, AFIS-it napasuliartaata sullissinermullu illutassat nutaat sanaartornissaannik suliakkerneqarpoq Qaqortoq. Isumaqatigiissut inaarutaasumik inissitsillugu isumaqatiginninniutigineqaqqammerpoq, tamannalu Aviaaja Karlshøj Knudsenip, Kalaallit Airportsimi suliniutinut pisortap, nuannaarutigaa.

”Neriuutigisatsinniit suliap ingerlanera sivisunerusimavoq ajornakusoornerusimallunilu. Kisianni maannakkut suliassami isumaqatigiissutit anginerusut kingullersaat anguarput aammalu illutassai aamma aallartissinnaalerlugit, tamannalu soorunami nuannaarutigaarput oqiliallaatigalugulu. KJ Ilulissani suleqatigilluareerparput, tassani aamma mittarfittaassami illutassanik sanaartorneq taakkua suliarimmassuk, aammalu suliassaq pikkorissuseqarlutik piginnaaneqarfigalugulu suliariumaaraat qularinngilarput,” oqarpoq Aviaaja Karlshøj Knudsen.

Aamma KJ Greenland-imi isumaqatigiissuteqarneq nuannaarutigineqarpoq:

”Tamanna uagutsinni KJ Greenlandimi aamma suliassaavoq annertooq pingaaruteqartorlu, akisussaaffigileratsigulu nuannaarutigaarput. Ilulissani illutassat sanaartorlugit ingerlallualereerpugut, tassanilu arlalippassuarnik iluaqutaasunik misilittagaqalereerluta atorluarsinnaasatsinnik. Taamaattumik aamma Qaqortumi suliassaq kivissinnaagipput qularinngilarput, aallartinnissaalu qilanaaralutigu,” oqarpoq Karl Jensen, KJ Greenlandimi pisortaq.

Qaqortumi mittarfiup saqqaatalu il.il. sanaartorneqarnerat canadamiut entreprenørit suliffeqarfiannit Pennecon-imit isumagineqarpoq aammalu piffissamut pilersaarut malinneqarluni. KJ upernaamut mittarfiup illutassaannik sanaartorluni aallartissaaq aammalu illutassat 2025-mi decembarimi naammassinissaat naatsorsuutigineqarpoq.

Tassa imaappoq, suliassaq pilersaarutaaqqaartunut sanilliullugu annikitsuinnarmik kinguaattuussaaq, aammalu mittarfiup 2026-p aallartinnerani ingerlanneqarsinnaalernissaa naatsorsuutigineqarluni.

”Ilisimaneqartutut illutassanut sanaartornermi akigititassat isumaqatigiissutiginissaasa inissitsinnissaat pilersaarutaasunit sivisunerusumik ingerlanneqarpoq. Taamaattumik piffissamut pilersaarutip pingaarnerup annertuumik kinguaattoorfiusussaannginnera nuannaarutigisorujussuuarput, tamannami soorunami suliassamut, Kalaallit Nunaannut aammalu KAIR-imi uagutsinnut aalajangiisuulluinnartumik pingaaruteqarpoq. maannakkut Qaqortumi mittarfittaassap sanaartorneqarnera 100 procentimik ukkatarisinnaalerparput, tamannalu misigisaavoq nuannersoq,” oqarpoq Aviaaja Karlshøj Knudsen.

Mittarfittaassami terminali 2.530 m2-inik angissuseqartussaavoq aammalu nalunaaquttap akunneranut ilaasunik 200-nik sullissisinnaanissamut angissusiligaalluni. Sullissinermut illutassaq 2.130 m²-nik aammalu AFIS-inut napasuliaq 160 m² nik angissuseqartussaapput