Tusagassiuutitigut nalunaarut

Mittarfittaassanut qatserisartut annaassiniartartullu biilii nutaat

Nuummi, Ilulissani Qaqortumilu mittarfittaassanut qatserisartut annaassiniartartullu biiliinik, crashtenders-inik taagorneqartunik, tamakkiisumik atortulersugaasunik arfineq-pingasunik pisinissaq pillugu Kalaallit Airports Østrigimiut ingerlatseqatigiiffiannut Rosenbauer International AG.-imut isumaqatigiissuteqarpoq.

”Isumaqatigiissutip inissinneqarnera nuannaarutigisorujussuuarput. Rosenbauer qatserisartut biiliisa iluanni siuttuuvoq aammalu tunisassianik misilerarluarneqarsimasunik qaffasissumillu pitsaassusilinnik, mittarfittaassanilu nukittuumik upalungaarsimanermut iluaqutaasussanik pilersuissalluni. Suleqatigiinnissaq qilanaaraarput, oqarpoq Suliniutinut Direktøri Aviaaja Karlshøj Knudsen.

Isumaqatigiissummi ilaatinneqarput Panther crashtenderit sisamat, tamarmik immikkut imermik 12.500 literit missaanit aammlu imerpalasumik qapuliortartumik 1.500 literinik imaqarsinnaasut, 100 meterillu missaanni ungasissusilimmut seqersitsisinnaasut. Crashtenderit taamaattut nunarsuup annersaani atorneqarput, aatsaallu siullermeertumik Kalaallit Nunaanniilissallutik.

Affaata aappaaniipput Buffalot sisamat, crashtenderiniit minnerulaartut, imermik 6500 literit missaani imerpalasumillu qapuliortartunik 400 literinik nassarsinnaasut, 70 meterit missaannik ungasissusilimmut seqersitsisinnaasut.

Nuuk aamma Ilulissat tamarmik immikkut Pantherinik marlunnik aammalu Buffalomik ataatsimik pissarsissapput, Qaqortoq Buffalonik marlunnik pissarsissalluni.

”Rosenbauerimi ukiunit 150-init sivisunerusumi qatserisartut biiliisa qatserinermullu atortut ilusilersorneqartarnerisa iluanni nutaaliornernik annertoorujussuarnik teknikkinillu aqqutissiuussisunik suliaqarsimavugut. Atortut tunniussagut Kalaallit Nunaanni mittarfittaassani upalungaarsimanermut annertuumik iluaqusiinissaat qularutiginngilarput. Aallartinnissatsinnut qilanaarpugut, oqarpoq Manuel Angermayr, Rosenbauerimi Nunap immikkoortuini Pisiniartarnernut aqutsisoq.

Rosenbauerip Kalaallit Nunaanni pilersuinermini aamma biilit nutaat taakkua ingerlatinnissaannik upalungaarsimasut ilinniartissavai. Tamatuma saniatigut mekanikerit sananeqarsimarneranni iluarsaanneqartarnerannilu teknikkikkut annertuumik pikkorissartinneqartussat Østrigimi tunisassiorfimmukartinneqassapput.

Naatsorsuutigineqarpoq biilit Nuummut Ilulissanullu 2024-mi septembarimi tunniunneqassasut.

Paasissutissanik annertunerusunik piniarnermi attaveqarfigineqassaaq (tusagassiortut saaffiginninneri kisimik):

Mikkel Bjarnø Lund, Attaveqaqatigiinnermut akisussaasoq Kalaallit Airports – oqarasuaat angallattagaq: 231700 – mbl@kair.gl