Biilinut inissiisarfik Nuummi mittarfiup illutaata saavaniittoq, maajip aallaqqaataanni matuneqarallassaaq
Nuummi mittarfiliorneq maannakkut sumiiffimmut, terminalip eqqaani biilit uninngasarfiannut qanittumiittumut, killippoq. Tassani entreprenørip ilaatigut mittarfissamut, aqqusinernut aqqutaasussanut isumannaallisaavimmullu inissaqalersitsiniarluni qaarsoq qaartitertussaavaa.
Kisianni isumannaallisaanermik pissuteqartumik aammalu biilit eqqarsaatigalugit, biilit biilit uninngasarfianni uninngatinneqarneranni suliaqarneq ingerlanneqarsinnaanngilaq. Taamaattumik suliaqarnerup ingerlanerani biilit uninngasarfiat 1. maj matuneqarallassaaq. Taamaattoq suli terminalip saavanut aatittoqarsinnaassaaq imaluunniit niutittoqarsinnaassalluni, taamatullu tassunga taxat bussilli pisarnertut tikissinnaallutik.
”Angalasussat ilaannut tamanna annertuumik ajoqutaasussaasoq ilisimavarput, tamannalu ajuusaarutigisorujussuuarput. Kisianni ajoraluartumik mittarfissap naammassinissaanut tamanna pisariaqarluinnarpoq,” oqarpoq Jens Lauridsen, Kalaallit Airportsimi pisortaaneq.
Nunap assingani matuma kingulianiittumi takuneqarsinnaasutut, suliaqarnerup ingerlanerani mittarfiup qanitaani sumiiffinni allani suli biilit uninngatinneqarsinnaassapput. Kisianni ajornanngippat biilit angerlarsimaffimmiitiinnarneqassasut allatullu iliorluni mittarfimmukartoqartassasoq, Kalaallit Airportsip kaammattuutigaa.
”Taavani inissaq ilumoortumik annikitsuaraavoq. Taamaattumik sumiiffimmi biilinik uninngatitsinngilluinnaruit ajunnginnerpaajuvoq. Ikinnguternut, sanilernut imaluunniit suleqaternut biiliutsigit imaluunniit busserit imaluunniit taxarlutit,” oqarpoq Jens Lauridsen nangillunilu:
”Biilitit sumiiffimmi matuneqartumi tassaniippata, ajornarunnaarniariarnerani nuunneqassasut ilungersorluta qinnuigaatsigit. Tassami taanna sukkasuumik imaarneqarpat, sukkanerusumik aallartissinnaalissagatta suliassallu naammassisinnaassagatsigit, oqarpoq Jens Lauridsen.
KAIR-ip sumiiffimmi qaartiterilluni 1. maj aallartinnissaq pilersaarutigaa, tassanilu biilit uninngasarfianni tassa biileerutereersimassaaq. KAIR-ip naatsorsuutigaa decembarimi suliaqarneq naammassisimassasoq aammalu biilit uninngasarfiat atorneqaqqilernissamut piareersimassasoq.
Taamaattoq oqaatigineqartutut suli terminalip saavanut niutittoqarsinnaassaaq imaluunniit aatittoqarsinnaassalluni, taamatullu taxat bussillu pisarnermittut inunnik aallersinnaallutik aggiussisinnaallutillu.
Kisianni sumiiffimmi nalunaaqutsigaasumi biilit uninngatinnissaat periarfissaassanngilaq, aammalu sumiiffimmi unioqqutitsilluni biilinik uninngatitsisoqarpat, biilit piffissami tassani peerneqassapput.
