Kalaallit Airportsimi ukioq naammaginartoq pisoqarfiusorlu

Ukioq 2022, Kalaallit Airportsimi ingerlalluarpoq pisoqarfiungaatsiarlunilu. Qaqortumi suliassaq aallartilluareerpoq, suliassat siumut ingerlapput aammalu novembarimi Nuummi sanaartornermi killiffissaq annertooq siulleq anguarput, tassami mittarfiup kujasinnerusortaa akuerineqarmat atorneqalerlunilu.

Aamma ukioq 2022, Mittarfeqarfiit suliffeqarfittut imminut ingerlattup aktiaatileqatigiiffinngortinneqarnissaa pillugu Inatsisartut inatsisaat Inatsisartuni akuerineqarpoq, tamatumalu kingorna Kalaallit Airports Holding A/S-imut ingerlatseqatigiiffittut immikkoortortaqarfinngorluni aallarniutissatut akiliutigineqarluni.

Aalajangiineq taanna pingaaruteqarpoq aammalu tamatumunnga pissutaasut arlaqarlutik:

• Ingerlatseqatigiiffiup ataasiinnaanerani, sulisunik misilittagalinnik immikkuullarilluinnartunik piginnaasalinnik, mittarfimmi aaqqissuussaanerup nutaaliaasup ingerlannissaanut pisariaqartinneqartunik, ataatsimoortunik sulisoqarniarnissaq sulisorinniinnarnissarlu
• Ingerlatseqatigiiffiit kattutsinneqarneranni suliassaqarfinni arlalippassuarni marloqiusamik allaffissornissamik pisariaqartitsinerup ilarujussua
• Timmisartuutileqatigiiffiit takornariartitsinermillu suliallit Kalaallit Nunaanni timmisartuunneqarnissamik suliaqarnissamillu kissaateqartut, qitiusumi mittarfinnik sulialimmut ataasiinnarmut attaveqartussaassapput. Tamatuma Kalaallit Nunaanni taakkua suliaqartuusut suliaqarnissaat pisariinnerulersittussaavaa, akikinnerulersittussaavaa orniginarnerulersittussaallugulu aammalu – naggataatigut – siuariartornerup ingerlaqqinnissaanut periarfissat pitsaanerulersittussaallugit.

Kalaallit Airportsimi aningaasaqarneq

Kalaallit Airportsimi aningaasaqarneq tulluartumik inissisimavoq.

Ukiumi ingerlatsinermi sinneqartoorutit 62 mio. koruuniupput, 2021-mi ingerlatsinermi amigartoorutit 19 mio. koruuniusimallutik.

Taarsigassarsiareqqitat allanngortinneqarnerannut atatillugu  aningaasaqarnikkut isertitaqarsimaneq, ingerlatsinermi sinneqartooruteqarnermut pingaartumik pissutaavoq, tamannami sinneqartoorfiusumik aningaasat nalingannit iluanaaruteqarnermik kiisalu erniat taakkununnga atasut akilerneranni iluanaaruteqarnermik, kinguneqarsimammat.

“Issittumi mittarfiliorneq unammilligassartaqanngitsoortanngilaq, kisianni suliassat tulluartumik siumut ingerlapput, aningaasaqarneq tulluartutut isikkoqarpoq aammalu killiffissap anguniakkatta annertuut siullersaat anguarput. Tamaasa ataatsimut katillugit angusat naammaginarput patajaatsuullutillu, tulluusimaarutigisorujussuusatsinnik,” oqarpoq Kalaallit Airports Holding-imi siulersuisut siulittaasuat, Kjeld Zacho Jørgensen.

”Taamatuttaaq mittarfissat nutaat attaveqaasersuutaammata pingaaruteqarluinnartut, PM generalforsamling Kalaallit Nunaannut tamarmut iluaqutaasussat, Kalaallit Nunaanni maani neriulluarnartumik paasilluarneqartoq paasivarput," siulersuisut siulittaasuata ilassutigalugu oqaatigaa.

Suliassat killiffii:

Nuuk:

Ukioq 2022 pisoqarfiungaatsiarpoq, mittarfiup kujasinnerusortaata tunniunneqarnerani ammarneqarneranilu sanaartugassani killiffissaq annertooq siulleq anguneqarluni, tamannalu suliassap ingerlaqqinnissaanut aalajangiisuulluinnarsimavoq.

Mittarfiup illutassaasa sananeqarnerat aamma siumut ingerlalluartorujussuuvoq. MT Højgaard A/S- ip terminalissaq, sullissinermi illutassat aammalu AFIS-inut napasuliaq nutaat tamakkiisunut isumaqatigiissuteqarnermi suliarai.

Suliassaq 2024-mi qaammatit pingasukkaat sisamaanni naammassineqassasoq suli naatsorsuutigineqarpoq.

Ilulissat:

Ilulissani aamma siumut ingerlasoqarpoq.

Terminalip sullissinermullu illutassat sananeqarnerat aallartereerpoq aammalu sukkasuumik siumut ingerlalluni. AFIS-inut napasuliap sananeqarnera 2023-mi maj/juni aallartinneqarpoq. KJ Greenland Ilulissani illuliortiternermut isumaqatigiissummi sulisorineqarpoq.

Sanaartornermut tunngasortaani oqaatigineqartariaqarpoq, sanaartugassaq ajoraluartumik isumaqatigiissutitigut piffissamut pilersaarummut sanilliullugu kinguaattoorujussualereersimammat, taamaattoq maannakkorpiaq piffissaq tunniussiviusussaq allanngortinneqanngikkallarpoq.

Qaqortoq:

Ulloq 22. februar 2022 Pennecon Heavy Civil Ltd. Qaqortumi sanaartugassanut isumaqatigiissuteqarfigineqarpoq, ulloq 31. juli 2025 mittarfissamut tunniussinissamut ulluliunneqarluni.

Sulineq aallartilluareerpoq aammalu 2023-p ingerlanerani ilaatigut qaartitigassat annertunerpaartaasa naammassinissai Pennecon-ip naatsorsuutigaa. Tassani taamatuttaaq illoqarfimmiit aqqusinissap pitsanngorsarnissaa aammalu asfaltilersorneqarnissaanut piareersarnissaa ukkatarisussaavarput.

Nunani tamalaani soqutiginninneq annertooq

Suliassaq ingerlalluartorujussuuvoq Kalaallit Airports-ip ingerlatsilernissamut piareernissaq ukkatarilersimallugu. Tassani Mittarfeqarfiit qanimut suleqatigalugu ingerlatsilernissamut suliniut aallartinneqarpoq, siunertaalluni mittarfissap ingerlanneqalernissaata sukumiisortai tamarmik aqunneqarsinnaassasut. Ilanngullugu atuuffiit tamarmik sumiissusersineqassapput pilersaarusiorneqassallutillu, sulisut qassiussanersut kiisalu maannakkut sulisut sulisunngortussallu

ilinniartitaanerat sungiusarneqarnissaallu aqunneqarsinnaassaaq, taamaalillutik mittarfiit timmisartunik ilaasunillu isumannaatsumik sunniuteqarluartumillu sullissinissamut akuerineqarsinnaalissallutik.

Tassani aamma mittarfissap ingerlanneqalernissaanut tapiiffigineqanngitsumik ingerlanissaq aamma ukkatarineqalereerpoq. Kalaallit Airports nunarsuarmi ataatsimeersuarnerni akuttunngitsumik peqataasarpoq, tassani ilaatigut timmisartuutileqatigiiffiit naapeqatigiittarlutik angallavissanillu nutaanik ineriartortitsinissaq oqallisigisarlugu. Tassani periarfissat nutaat Kalaallit Nunaanni mittarfissat periarfissiissutigisassai soqutigineqartorujussuusoq maluginiarparput. Aalajangersimasunik suli inissittoqanngilaq, kisianni oqaloqatigiittoqarpoq soqutiginnittoqarlunilu.

Tamatuma saniatigut 2023-mi suliassat siumut ingerlanerisa ingerlaannarnissaa suli ukkatarineqassaaq. Ilaatigut Nuummi Ilulissanilu terminalit sullissinermullu illutassat ukiup ingerlanerani naammassilluinnagajassimasussaapput.