Atortut nutaaliaanerpaat mittarfissani taamaatitsisarnerit ikinnerpaatissavaat

Kalaallit Airports Nuummi Ilulissanilu mittarfissanut timmisartornermut teknikkikkut atortunik pilersuinissaq pillugu Spaniamiumut Comsa-mut isumaqatigiissuteqarpoq. Silarluttorujussuarmiluunniit minnissaq atortut isumannaatsuutissavaat, piffissamik eqquisarneq annertunerulersissallugu aammalu taamaatitsinerit ikinnerulersissallugit.

Kalaallit Airports spaniamiut suliffeqarfiannut Comsa Industrial-imut, Nuummi Ilulissanilu nunanit tamalaaneersunut mittarfissani timmisartornermut teknikkikkut atortunik nutaaliaasunik pilersuisussamut ikkussuisussamullu isumaqatigiissuteqarpoq.

Atortut minnissamut periarfissaqarnerulersitsissapput isumannaannerulersitsissallutillu, pingaartumik silarlunnerani pissutsit ajornakusoortillugit. Tamatuma taamaatitsinerit ikilisissavai aammalu sumiiffinni marlunni tamaginni piffissamik eqquisarneq annertunerulersissallugu.

Isumaqatigiissut nunani tamalaani neqeroortitsinerup Kalaallit Airportsip ingerlassimasaata, aammalu suliffeqarfiit Europameersut aamma USA-meersut peqataaffigisimasaasa, inerneraa. Comsa Industrial neqeroortitsinermi ajugaasuuvoq aammalu aallartinnissaminut qilanaarluni.

”Comsa Industrial-imi timmisartornermut teknikkikkut atortunik pilersuineq sivisuumik misilittagaqarfigaarput. Suliassamut ajugaagatta nuannaarutigaarput aammalu Kalaallit Nunaannut timmisartumik attaveqarnerup aalajaannerulernissaata isumannaannerusulernissaatalu qulakkeernissaata sapinngisatsinnik suliaqarfiginissaanut qilanaarluta”, oqarpoq Operations Manager Enrique Cano Samos, Comsa Industrial.

Aamma Kalaallit Airport-imi isumaqatigiissutip inissitsinnera naammagisimaarneqartorujussuuvoq.

”Isumaqatigiissut naammassimmat nuannaarutigaarput. Aallarniutaasumik oqaloqatigiinneq nuannerpoq, aammalu Comsa-p suliassaq pikkorissuseqarluni piginnaasaqarluarlunilu suliarisinnaagaa qularutiginagu misigisimavugut. Nunanit tamalaaneersunut mittarfissanut eqqortup tungaanut tamanna alloriarneruvoq annertoorujussuaq”, oqarpoq suliniummut pisortaq Jesper Nordskilde, Kalaallit Airports.

Timmisartornermut teknikkikkut periaatsit imatut isumannaannerulersitsissapput piffissamillu eqquisitsinerulissallutik

Nuummi aamma Ilulissani nunanit tamalaaneersunut mittarfissani teknikkikkut periaatsinik assigiinngitsunik arlalinnik atortulersuusersuisoqassaaq.

• Mittarfinni eqqoqqissaartumik miffiusussani mikkiartornermut nutaaliaalluinnartunik atortulersugaasuni, timmisartortartut mikkiartornermi timmisartup ingerlatinneranut atortui atorlugit ammuinnaq aamma sanimuinnaq ingerlatissinnaalissavaat.
• Ungasissutsinut uuttortaatit mittarfimmiittut ingerlatitsinermut naaralaartitsivittut atortut, timmisartumi eqqoqqissaartumik sumiiffimmik uuttortaasinnaalersitsissapput.
• Silasiornermut periaatsit nutaaliaalluinnartunik maluginiutitaqartut, putsut portussusaat, anori, kissassuseq kiisalu mittarfik sinerlugu isikkiviginnera uuttortartassavai.

Napasuliat nakkutiginniffiit nutaat

KAIR mittarfinni tamaginni napasuliamik nakkutiginniffimmik nutaamik allamik sanassaaq. Napasuliani soorunami silaannakkut angallattunik, sulisunik biiliniittunillu oqaloqateqarsinnaanissamut attaveqaqatigiinnermut atortunik atortulersuisoqassaaq. Kalaallit Nunaanni nutaatut aamma angallannermi tikittut aallartussallu iliuuseqarfiginissaannut periaatsinik elektroniskiusunik atortulersuusersuisoqassaaq, kiisalu elektroniskiusoq Air Traffic Service (ATS) alapernaarsueriaaseq ikkussorneqassalluni. ATS-mi periaaseq (ADS-B Ground Equipment), mittarfiup sumiiffiani biilit tamaasa alapernaarsornissaannut atorneqassaaq. Biilit tamarmik nassiussisartumik atortoqartinneqassapput, taamaalilluni napasuliami nakkutiginniffiusumi skærmikkut sukkulluunniit biilit sumiinnersut takuneqarsinnaassalluni. Tamanna pissaaq timmisartut biilillu akornanni ajutoortoqannginnissaa qulakkeerniarlugu. Napasuliaq nakkutiginniffiusoq tamatuma saniatigut mittarfiup tamakkerlugu alapernaarsornissaanut videukkut alapernaarsueriaatsimik nutaaliaalluinnartumik peqassaaq.

Kalaallit Airportsip naatsorsuutigaa Nuummi mittarfissami piffissamik eqquisarneq 95 procentimiissasoq - aammalu Ilulissani piffissamik eqquisarneq 98 procentimiissasoq.

Erseqqinnerusunik paasissutissanik piniarnermi attaveqarfigineqassaaq (taamaallaat tusagassiortuniit saaffiginninnerit):

Mikkel Bjarnø Lund, Attaveqaqatigiinnermi sulisoq, Kalaallit Airports – oqarasuaat angallattagaq: 231700 – mbl@kair.gl