Nuummi imarpissuaq qulaallugu mittarfik nutaaq 2024-mi ammassaaq
KAIR-ip Nuummi mittarfiup nutaap ammarnissaa ukiumik ataatsimik kinguartippaa - 2023-mit 2024-mut. Kinguartitsinermut pissutaapput COVID-19-imut atatillugu ajornartorsiutit kinguaattoornerillu, kiisalu mittarfiup atortuinut sananeqarneranullu pisortanit piumasaqaatit nutaat arlallit.
NUUK – Nuummi nunanut tamalaanut mittarfik nutaaq 2024-mi ammassaaq, aallaqqaammut pilersaarutigineqartutut 2023-mi pinnani. Ammarnissaanut kinguartitsinermut arlalinnik pissuteqarpoq, taakkunannga COVID-19 annertuumik pissutaaqataalluni.
Mittarfimmik kingusinnerusumik naammassinninnissaq KAIR-ip naatsorsuigallarneri malillugit maannakkut missingersuutigineqartut aamma saniatigut taarsigassarsiat 900 mio. kr.-it upernaaq siusinnerusukkut nalunaarutigineqartutut iluanni naammassineqarsinnaavoq.
“Uggoraarput, mittarfiup 2024-mut kingusinaarnissaa. Nalunngilarput suliffeqarfinnut, ammarnissaanut maannakkorpiaq piareersartunut kinguneqarsinnaasoq. Pisoq taanna pinngitsoortinniarlugu suna tamaat tikillugu sulisimavugut kisiannili ingammik COVID-19-eqarnera suliniummut pissuanartunik ilimaginngisanik arlalinnik kinguneqarsimavoq, taamalu ajoraluartumik aallaqqaammut piffissamut pilersaarutip eqqortinnissaa ajornarsisillugu, taama oqarpoq KAIR-imi pisortaaneq Jens Lauridsen.
Ingammik 2021-mi aasap ingerlanerani sanaartornermi killiffiit pisariaqartut angunissaat ajornakusoorsimavoq, pissutigalugu suliassinneqartuni immikkut ilisimasallit sulisullu amerlasuut Nuummut ingerlanissaat COVID-19 pissutigalugu pitsaalineqarsimammat. Taakku ukiup ilaani suliarineqarsinnaasut pingaarutillit arlallit sukkanerusumik naammassineqarnissaat suliassarisimavaat. Assersuutigalugu usserutaasamik qallersuinermi (asfalterinermi) suliareqqaagassat kinguartinneqarsimapput, pissutigalugu taakku taamaallaat aasaanerani qaammatialuinnarnik piffissaqarluni suliarineqarsinnaammata.
Taakkua saniatigut KAIR-i piumasaqaatit nutaat arlallit, aallaqqaammut piffissamut pilersaarutip aalajangiunneqarnerata kingorna ilanngunneqarsimasut ilanngunniarlugit aallussisimavoq. Assersuutigalugu timmisartunik angallannermut pisortaqarfinnit mittarfimmut aamma pisortanut uppernarsaanissamut piumasaqaatit nutaat atuutilersimapput.
“Allat saniatigut suliassat taakku ilaat ataaseq kisimi pineqanngilaq pisulli ataatsimut amerlassusaat, sanaartornermi 2021-mi aasaanerani qaammatit iluanni killiffiit pingaarutillit anguneqannginneri aalajangiisuusimapput. Naggataatigut ajoraluartumik Nuummi mittarfiup nutaap tunniunnissaata
ukiumik ataatsimik 2024-mut kinguartinnissaa pisariaqalersimavoq,” taama oqaaseqarpoq Jens Lauridsen.
“Kisianni maannakkut ammarnissaata tungaanut piffissamut pilersaarut nutaaq piareerpoq, qilanaarpugullu mittarfinnik nutaanik pilersitsinermi ingerlaqqinnissatsinnut, taakku Kalaallit Nunaanni siunissami ineriartornermut sakkunut pingaarnerpaanut ilaapput,” taama ilanngussivoq.
Paasissutissanik allanik pissarserusukkuit, inussiarnersumik atassuteqarfigiuk (tusagassiorfinnut nalunaarutit kisiisa pillugit):
Mikkel Bjarnø Lund, Kalaallit Airportsimi atassuteqarnermut sulisoq
Mobil: 231700 – MBL@kair.gl