Kalaallit Airports Domestic aamma MT Højgaard sanaartugassamut pilersaarusiornerup ingerlanissaa pillugu isumaqatigiissuteqarput

Qaqortumi mittarfissami terminalip illutassaanut tamakkiisunut sanaartugassanut akigititassanut isumaqatigiissuteqarnissaq siunertaralugu, ataatsimoorluni sanaartugassamut pilersaarusiornerata ingerlanissaa pillugu suleqatigiinnissamut isumaqatigiissut Kalaallit Airports Domestic-ip aamma MT Højgaard-ip atsioqqammerpaat.

• Qaqortumi terminalip illutassai sanaartugassanut akigititassanut isumaqatigiissutit angisuut, mittarfiliornerni pingasuusuni amigaatigisatta, kingullersaraat. MT Højgaard-imut suleqatigiinnissamut isumaqatigiissutip tamatuma inissitsinnissaanut qaninnerulersippaatigut, taamaattumik tamanna nuannaarutigaarput, oqarpoq Kalaallit Airports-imi suliniutinut pisortaq Aviaaja Karlshøj Knudsen.

Sanaartugassanut akigititassanut isumaqatigiissutip inaarutaasup ukiumi nutaami isumaqatigiissutiginissaa naatsorsuutigineqarluni, maannakkut sanaartugassamut pitsaanerpaanik aaqqiissuteqarnissaq ataatsimoorluta suliarisussanngorparput.

• Suliassaq annertuujuvoq pissanganarlunilu. Aallaqqaataaniilli peqataanissatsinnut aammalu suliassap pitsaanerulersinnissaanut ilaatigut Nuummi suliassamit misilittakkatta annertuut atorluarnissaannut, isumaqatigiissutip taassuma periarfissippaatigut. Aamma Qaqortumi Kalaallit Airports-ip suleqatigilluarnerata ingerlateqqinnissaa qilanaaraarput, oqarpoq MT Højgaard Grønland-imi pisortaq Torben Nielsen.

Qaqortumi mittarfik 2025-p qiteqqunnerani piariissasoq atorneqalissasorlu pilersaarutaavoq. Canadamiup entreprenørip Pennecon mittarfittaata sananissaa suliarisussaavaa, ilanngullugu terminaleqarfissamut sanaartorfissagissaaneq, tassani illuliornermut sanaartugassartaa aappaagu aasakkut aallartissalluni.