Tusagassiuutitigut nalunaarut:

Nuuk 2. november 2022

Nuummi mittarfittaassap immikkoortua siulleq ammarpoq

Nuup Mittarfiani mittarfittaassap kujasinnerusortaa maannakkut akuerineqarpoq atorneqarnissaminullu piareerluni. Taamaattumik timmisartut siulliit pilersaarutit malillugit ulloq 3. november qangattarlutillu missapput. Mittarfiup kujasinnerusortaata naammassinera mittarfiliassanik sanaartornermi killiffiuvoq annertooq.

Trafikstyrelsen-imit, mittarfinnik ingerlatsinermut oqartussat qullersaannit, inaarutaasumik akuersissuteqarnerit, sapaatip akunnerani kingullermi sukumiisumik misissuereernermi, inissipput, tamannalu Kalaallit Airports-imi pisortaanerup Jens Lauridsenip nuannaarutigaa:

"Nuummi mittarfiup kujasinnerusortaata ammarnera mittarfiliassanik sanaartornermi tamarmiusumi piffissamut killigititat annertoorujussuit ilagaat. Mittarfik angallannermi pisussami tunngavissaavoq, aammalu tassunga tunngasortaa angugatsigu nuannaarutigisorujussuuarput. Isumaqarpunga tulluusimaarnissamut pissutissaqarluartugut. Piffissamut killigititap taassuma naammassinissaa suliassamut tatiginninnermut pingaaruteqarsimavoq, Kalaallit Nunaannut pingaaruteqarpoq aammalu tamatsinnut pingaaruteqarpoq," oqarpoq.

Aqqutissami alloriarneq pingaarutilik – kisianni suliaq naammassineqanngilaq
mittarfiup ammarnera Nuummi mittarfiliornermi alloriarneq annertuujugaluartoq, mittarfik inaarutaasumik naammassinngimmat eqqumaffigissallugu pingaaruteqarpoq. Assersuutigalugu mittarfiup kujasinnerusortaa tamakkiisumik atortulersugaanngilaq, aammalu suliassat annertunerusut ingerlanneqartussaapput. Taamaattumik 2024-p ingerlanerani mittarfiup naammassinissaata tungaanut angallannerup pissusissamisuunngissinnaanera aarlerinaateqarnerulersimasinnaavoq.

”Mittarfiup pioreersup sumiiffiata missaani nutaamik mittarfiliorneq unammillernertuuvoq. Taamaattumik piffissami aalajangersimasumi teknikkikkut killilersorneqalissaagut, kisianni ilaasutsinnut suleqatigisartakkatsinnullu ikaarsaarnerup oqinnerpaajunissaanut sapinngisarput tamaat iliuuseqarpugut,” oqarpoq Aviaaja Karlshøj Knudsen, Kalaallit Airports-imi suliniutinut pisortaasoq.

Akuersissuteqarnissap tungaanut sulineq nalunaaquttap akunnikkaartumik pilersaaruteqarluni ulloq unnuarlu ingerlasimavoq. Ukiumi kingusissukkut asfaltilersuineq, aammalu mittarfitoqaq suli atorneqartoq mittarfissamut atortunik ikkussuineq unammilligassaasimapput. Mittarfiit nutaat Kalaallit Airports-imiit pigineqarpoq aammalu Mittarfeqarfinnit ingerlanneqarluni.

Paasissutissanik annertunerusunik piniarnermi attaveqarfigineqassaaq (tusagassiortut saaffiginninneri kisimik):

Mikkel Bjarnø Lund, Attaveqaqatigiinnermut akisussaasoq Kalaallit Airports – oqarasuaat angallattagaq: 231700 – mbl@kair.gl