Qaqortumi mittarfissami mittarfimmut isumaqatigiissut inissippoq

Qaqortumi mittarfissap mittarfittassaata sanaartornissaa Canadamiut Pennecon Heavy Civil suliassarilerpaa. Isumaqatigiissut atsiorneqareerpoq aammalu sanaartornermik suliaqarneq upernaamut aallartissaaq.

Pennecon Heavy Civil Qaqortumi mittarfissap mittarfittassaata neqeroortitsivigineqarnerini marluusuni tamaginni iluaqutissartaqarnerpaamik neqerooruteqarpoq. Maannakkut Kalaallit Airports Domestic-ip Canadamiut ingerlatseqatigiiffiannut isumaqatiginninniarnerit naammassereerpai aammalu mittarfiup sanaartorneqarnissaa pillugu isumaqatigiissut atsioreerlugu.

”Isumaqatigiissut inissimmat nuannaarutigaarput. Maannakkut sanaartornermik suliaqarnerup aallartilluarnissaa qilanaaraarput. Pennecon sumiiffinni pisunit peqqarniitsunit allanngorarsinnaasunillu sunnersimaneqartartuni, aamma Kalaallit Nunaanni ilisarnaataasuni, sanaartornermut suliassat annertuut sivisuumik misilittagaqarfigai. Aammalu qularutiginngilarput taakkua suliassap kivinnissaanut piukkunnarnerpaasut,” oqarpoq Jens Lauridsen, Kalaallit Airports Domestic-imi CEO.

Aamma Pennecon Heavy Civil-imi isumaqatigiissutip pissarsiarineqarnera nuannaarutigineqarpoq.

”Heavy Civil-imi suleqatigiit sulisutta mittarfimmik sanaartornissaq pingaaruteqartoq taanna pissarsiarimmassuk Pennecon-ip nuannaarutigisorujussuuaa. Kalaallit Airportsip suliaqatiginissaa aammalu sanaartornermi misilittakkatta Kalaallit Nunaanni atornissaat qilanaaraagut. Inissisimavinni tamaginni – naalakkersuisuni inuiaqatigiinnilu, kiisalu inuussutissarsiortuni suliffeqartunilu iluatsitsilluarnissap qulakkeernissaanut ataqqeqatigiinneq suleqatigiinnerlu ingerlatsinermut aallaavigisatsinnut tunngavigaarput, oqarpoq Pennecon-ip siulersuisuinut siulittaasoq Larry Puddister.

Sanaartornermik suliaqarneq upernaamut aallartissaaq. Isumaqatigiissut akigititanut isumaqatigiissutitut pingaarnertut isumaqatigiissutigineqarpoq aammalu ilaatigut ilaatinneqarput mittarfiliorneq, terminalip sumiiffissaanni sanaartorfissagissaaneq, timmisartut aqqutaat aamma timmisartut unittarfiat, biilinut unittarfiit nunaminertassai kiisalu Qaqortumut aqqusernut aqqutaasartussap naammassineqarnissaa.

Nunami suliaqarnissami annertuumi ilaatinneqassaaq qaqqaq 2 mio. m3, qaartiterneqartussaq atugassiissutigineqartussarlu. Sanaartornissamut piffissamut pilersaarut ukiut pingasut ingerlasussaavoq, aammalu mittarfissaq 2025-mi ukiaanerani atorneqalertussatut naammassissalluni.

Mittarfiup illutassai nutaat upernaap ingerlanerani neqeroortitsivigineqaqqissasut naatsorsuutigineqarpoq.

Apriilip naalernerani Kalaallit Airports Domestic aamma Pennecon Heavy Civil Qaqortumi innuttaasunik ataatsimiititsinissamut aggersaassapput. Suliaqarneq pisussaq mittarfissarlu pillugit ilisimatitsisoqassalluni. Paasissutissat erseqqinnerusut inaarutaasumik ulluliisoqareerpat nalunaarutigineqassapput.

Qaqortumi Mittarfik pillugu pissusiviusut:

• Mittarfik 1.500 meteri, 30 meterinik atitussuseqartoq. Mittarfiit isuini tamaginni ICAO Reference kode 3C nalunaaqutserneqartoq “non-precision approach” aamma localizers
• Teminali 2.000 m2 miss.
• Inissat: Nal.ak. ilaasut 200-t (ilaasut tikittut 100-t + aallartussat 100-t)

Qaqortumi Mittarfik 100%-imik Namminersorlutik Oqartussanit pigineqarpoq.

Pennecon uani paasisassarsiosinnaavutit – www.pennecom.com

Paasissutissanik erseqqinnerusunik piniarnermi inussiarnersumik attavigineqassaaq (taamaallaat tusagassiortuniit saaffiginninnerit):
Mikkel Bjarnø Lund, Attaveqaqatigiinnermut akisussaasuusoq, Kalaallit Airports – oqarasuaat angallattagaq: 231700 – mbl@kair.gl