TUSAGASSIUUTITIGUT NALUNAARUT

Qaqortumi mittarfiliassaq pillugu innuttaasunik ataatsimiititsineq

Mittarfik qanoq isikkoqassava? Sanaartorneq qanoq ingerlassava aammalu suliassaq najukkami innuttaasunut qanoq sunniissava? Ulloq 27. april Campus Kujallermi nammineerlutit aggerlutit apeqqutit tamaasa akissutissarsikkit aammalu apeqqutissatit nammineq apeqqutigalugit.

NUUK, 18. april 2022 ––Qaqortumi nunap immikkoortuani mittarfissamik sanaartornissaq suliassaavoq annertooq, Nuummi aamma Ilulissani suliassat assigalugit, 2025-mi mittarfissap ammarneqarsinnaalernissaanut ukiuni arlalinni qaammatit tamaasa qaarsumik tonsinik tuusintilippassuarnik qaartiterinissaq, aserorterinissaq nussuinissarlu pisariaqartussaalluni, tamatumalu kingorna mittarfiit, saqqai aqqusernillu sanaartorneqartussaallutik, kabelit kilometererpassuit siaarneqartussaallutik, asfalterisoqartussaalluni terminalimillu sanasoqartussaalluni.

suliassaq pillugu innuttaasunik ataatsimiititsinermi, ulloq 27. april 2022 nal.18.30-21:00 Qaqortumi Campus Kujallermi inersuarmi ingerlanneqartussami, taakkua tamaasa annertunerusumik tusagaqarfigineqarsinnaapput.

”Qaqortumi suliassaq annertuumik sammineqarsimavoq, aammalu aallartinniarneq ajornakusooreersorlu, kiisami pimoorullugu aallartittussanngorparput. Tamanna qilanaarisorujussuuarput”, Oqarpoq Kalaallit Airports Domestic-imi pisortaaneq Jens Lauridsen.

”Suliassaq, ammarnissaata tungaanut pilersaarutit ataasiakkaat aammalu siunissami periarfissaqarfiusut oqaluttuarerusuppagut. Kisianni pingaarnerpaavoq Qaqortumi innuttaasut suliffeqarfiillu – maannakkut aammalu ukiuni aggersuni – oqaloqatigilluartarnissaasa qulakkeernissaa. Tassani neriuutigaarput ilaatigut suliassaq pillugu apeqqutiminnik kikkut tamarmik akissuteqarfigineqarnissaasa qulakkeernissaanut, innuttaasunik ataatsimiititsineq iluaqutaalaarumaartoq”, nangippoq Jens Lauridsen.

Innuttaasunik ataatsimiititsinermi pisortaaneq Jens Lauridsen aamma suliniutinut pisortaq Aviaaja Karlshøj Knudsen Kalaallit Airportsimeersut kiisalu Pennecon Heavy Civil-imi entreprenørit aallartitaat aamma Kommune Kujalleq saqqummiissapput apeqqutillu akissuteqarfigissallugit.

Innuttaasunik ataatsimiititsinermi aamma kaffillertoqassaaq kaagillertoqassallunilu aammalu kikkut tamarmik tikilluaqqusaapput.

Paasissutissanik erseqqinnerusunik piniarnermi inussiarnersumik attaveqarfigineqassaaq (tusagassiortuniit saaffiginnissutit kisimik):  

Mikkel Bjarnø Lund, attaveqaqatigiinnermut akisussaasoq, Kalaallit Airports - mobil: 231700 – mbl@kair.gl