Silaannakkut angallannermut nuisitsinermi ataatsimoorluni suliniuteqarneq: Soqutiginninneq annertoorujussuuvoq – kisianni Kalaallit Nunaata asseqannginnera naammanngilaq
Nuisitsinermi Routes Europe 2022, naammasseqqammersumi nunani tamalaani silaannakkut angallannermut ingerlatseqatigiiffinnit soqutiginninneq annertoorujussuusoq Visit Greenlandip aamma Kalaallit Airportsip malugaat – aammalu mittarfissat nutaat ammarpata Kalaallit Nunaannut tikeraarusuttunut neqeroorutit atortorissaarutillu amerlanerusut sulissutiginissaat pisariaqartinneqartoq tikkuarlugu.NUUK, 25. maj 2022 –– Sapaatip akunnerata siuliani Europami silaannakkut angallannermut nuisitsineq annertooq Routes Europe 2022 Bergen-imi ingerlanneqarpoq, aammalu neriulluarnartumik isummersimaarneq Visit Greenlandip aamma Kalaallit Airportsip tamarmik tupaallaatigaat.
"Ukiuni kingullerni marlussunni isummertarneq Routes-imi suliap pissusissamisoornerani malunnannginnerusimavoq. Kisianni ukioq manna pimoorullugu neriulluartoqaqqilersimasoq malugineqarsinnaavoq, aammalu Covid-19-ip siornatigut pisartutut peqataasut amerlatigalutik," oqarpoq pisortaaneq Jens Lauridsen, Kalaallit Airports.
Timmisartuutileqatigiiffiit akornanni Kalaallit Nunaata ornigassatut siunissaqarnera annertoorujussuarmik eqqumaffigineqartoq nammineq aammalu Visit Greenlandimi Head of PR Tanny Por-ip malugaat.
"Europami aammalu amerikap nunavittaani timmisartuutileqatigiiffiit 17-it pisortatigoortumik ataatsimiinneranni Visit Greenland aamma Kalaallit Airports peqatigiillutik peqataapput. Kalaallit Nunaanni marlunnik nunanit tamalaaneersunut mittarfeqalertussaasoq, aammalu tamanna siunissami pissanganartunik qanoq periarfissaqalersitsisussaasoq, nunanit allaneersut eqqumaffigisorujussuugaat qularutissaanngilluinnarpoq," oqarpoq Tanny Por.
“Kisianni angallavinnik ineriartortitsinermut tunngatillugu unammilleqatigiinneq annertoorujussuuvoq, ornigassarpassuit pilerigineqarput – aammalu Kalaallit Nunaata ornigassatut asseqannginerata takorloorneqarnerinnaa timmisartumik angallavinnut pilerilersitsisinnaanngilaq. Annertunerusunik pisoqartariaqarpoq, aammalu niuernertut aamma ingerlanneqartussaavoq ", nangippoq Jens Lauridsen.
Taamaattumik suliassaqarfippassuarni, ornigassanik timmisartuutileqatigiiffinnik takornarianillu amerlanerusunik tikisitsinissamut piareersimalersitsisinnaasuni, aningaasaliinissaq pisariaqartinneqarpoq. Nunarput tamakkerlugu akunnittarfinni, neriniartarfinni misigisassarsiornermullu atortorissaarutit ineriartortinneqartussaapput. Aamma takornariartitsisarnerup ineriartortinneqarnerata Kalaallit Nunaat tamakkerlugu iluaqutaalernissaata qulakkeernissaanut, nittarsaassinermik suliniuteqarneq ataqatigiissaarneqartussaavoq.
"Kalaallit Nunaanni ornigassat arlallit piffissani aalajangersimasuni pisinnaasatigut unammilligassaqareersut misigineqarpoq, tamannalu unnuisarfinni, neriniartarfinni misigisassarsiornernillu neqeroorutini pivoq. Taamaattumik takornariartitsinermik inuussutissarsiornerup annertunerusumik ineriartortinneqarnissaata uumarissarnissaa, tamatumalu piujuartitsiviusumik aammalu nunap immikkoortuini ornigassani aqutsinermi suliffeqarfiit aammalu inuiaqatigiit nalinginnaasumik, suleqatigalugit pinissaa, Visit Greenlandimi annertoorujussuarmik ukkataraarput," oqarpoq Tanny Por.
Taamaattoq ileqquusumik takornariarpassuit eqqarsaatigineqartarnerannut taarsiullugu piujuartitsiviusumik misigisassarsiortitsilluni takornariartitsisarnerup salliutinneqarnissaa pisariaqartinneqartoq, taakkua tamarmik erseqqissarpaat – taamaalilluni ineriartorneq Kalaallit Nunaanni innuttaasut pinngortitarlu malinnaasinnaalerlugit pissalluni.
Paasissutissanik erseqqinnerusunik piniarnermi inussiarnersumik attaveqarfigineqassaaq (taamaallaat tusagassiortunit saaffiginnissutit):
Mikkel Bjarnø Lund, attaveqaqatigiinnermut akisussaasuusoq, Kalaallit Airports - oqarasuaat angallattagaq: 231700 – mbl@kair.gl
Tanny Por, Head of PR, Visit Greenland - oqarasuaat angallattagaq +45 20 76 96 90, tanny@visitgreenland.com