Ilulissani mittarfiliorfimmi ammasumik qaaqqusineq

Ilaqutatit katersukkit, kamippatit singersukkit aammalu sapaat ulloq 28. august nal. 13 aamma 16 akornanni Ilulissani nunanit tamalaaniit timmisartunut mittarfissap nutaap sanaartorneqarnerani sumut killinnersugut takuniarlugu aggerit.

NUUK, 16. august 2022 – Kalaallit Airports aammalu entreprenørigut Ilulissani mittarfissaq sanaartorlugu tamakkiisumik sulipput, tamannalu aasaanerani matumani immikkut sukkasoorujussuarmik ingerlavoq.

Suliassaq soqutigineqartorujussuuvoq, tamannalu nuannaarutigaarput. Kisianni sanaartorfiusumi isumannaallisaaneq eqqarsaatigalugu nalinginnaasumik tamanut matoqqatinneqarpoq, tassami entreprenørit maskiinarujussui ulloq unnuarlu sulilluni atorneqarmata aammalu mittarfiit illutassaasalu sanaartorneqarnissaat piareersarniarlugu akuttunngitsumik tamaani qaartiterisoqartarmat.

Kisianni aamma suliaq qanoq siumut ingerlanersoq takutikkusuttorujussuuarput.

Taamaattumik Ilulissani soqutiginnittunut tamaginnut ammasumik qaaqqusineq ingerlatissavarput. Aaqqissuussinerup nalaani sulineq unikkallartinneqassaaq, aammalu sumut killinnersugut illit nammineerlutit takusinnaassavat. Aamma maskiinarujussuit qanilleqqinnaarnissamut periarfissinneqassaatit – allaat qaqiffigisinnaassallugit.

Ilulissani mittarfiliorfimmi ulloq 28. august nalunaaquttap 13 aamma 16 akornanni ammasumik qaaqqusivugut. Aqqutissamik piareersaassaagut, taamaalillutit isumannaatsumik angalaarsinnaassallutit sanaartornermilu suliaq takusinnaassallugu. Aamma suliassaq pillugu apeqqutitit tamaasa akissuteqarfiginissaannut piareersimassaagut, tamatumalu saniatigut kaffillerlutalu kaagillissalluta.

Neriuutigaarput mittarfiliorluni suliap siumut ingerlanerata takunissaanut periarfissaq sapinngisamik amerlanerpaat atorluassagaat aammalu tikilluaqqunissarsi qilanaaraarput!

Paasissutissanik erseqqinnerusunik piniarnermi attaveqarfigineqassaaq (tusagassiortut saaffiginnissutaat kisiisa):

Michael Svendsen, Attaveqaqatigiinnermi sulisoq Kalaallit Airports - oqarasuaat angallattagaq: +4561282670 - zms@kair.gl

Mikkel Bjarnø Lund, attaveqaqatigiinnermut akisussaasuusoq Kalaallit Airports– oqarasuaat angallattagaq: 231700 – mbl@kair.gl