Naalakkersuisut Siulittaasuat mittarfiliorluni sanaartorfimmut mippoq

Naalakkersuisut Siulittaasuat Múte Bourup Egede ataasinngormat Kalaallit Airportsimut pulaarpoq. Naapinneq Nuummi mittarfiliorluni sanaartorfiup eqqaani tammaarsimaarfimmi pivoq, tassani Kalaallit Airportsimi siulersuisut siulittaasuat Kjeld Zacho Jørgensen aamma pisortaaneq Jens Lauridsen tikilluaqqusisuupput.

Qaqortumi, Ilulissani Nuummilu sanaartornerit killiffii kiisalu siunissamut suliffeqarfiup eqqarsaatai periusissaalu pulaarnermi ilaatigut sammineqarput. Naggataatigut aamma sanaartorfik angalaarfigineqarpoq, tassani mittarfissaq 2A, pilersaarutit malillugit novembarimi ammarneqartussaq, ilusinikkiartuaalersimalluni, soorlu matuma kinguliani assilisani aamma takutinneqartoq.

Aammalu Naalakkersuisut Siulittaasuata pulaarnini nuannaarutigaa

• Mittarfiliassat pissusissamisoortumik ingerlasut aammalu ingerlatseqatigiiffiup siunertani inuiaqatigiinnullu akisussaaffeqarnini tamakkiisumik paasisimaarigaa, siulersuisut siulittaasuata Kjeld Zacho Jørgensenip pisortallu Jens Lauridsenip naapinneranni qularutissaanngitsumik paasivara. Kalaallit Airports mittarfissat ammarpata ingerlatsinerup ineriartortinneqarnissaa piujuartitsinissarlu, peqqinnartumik siuariartornissamik akisussaassusilimmillu ingerlatsinissamik qulakkeerisussaq, iliuuseqarluni sulissutigimmagit nuannaarutigaara. Kalaallit Nunaata tamakkerluni mittarfissat taakkua iluaqutigissagaat pingaaruteqartoq Kalaallit Airportsip uannut oqaatigaa, tamannalu tamatumunnga Naalakkersuisut kissaatigisaannut naapertuulluinnarpoq, oqarpoq Naalakkersuisut Siulittaasuat Múte Bourup Egede naapeqatigeereernerup kingorna.

Kalaallit Airports suliap ingerlaqqinnissaa suleqatigiinnissarlu qilanaaraat.